VOV4.Êđê- Čar Kon Tum mrâo mâo leh hră mơĭt kơ knơ̆ng bruă pui kmlă krĭng kwar krah, akâo klei ksiêm dlăng, ngă bruă duh bi liê mjêč mkŏ mkra anok bi hrŏ hnơ̆ng pui kmlă 110kV Đăk Glei lehanăn êlan klei pui kmlă 110kV Bờ Y - Đăk Glei tui si hră mâo leh. Tui si bruă sang čư̆ êa čar Kon Tum, bruă duh bi liê čiăng mkŏ mra anôk bi hrŏ hnơ̆ng pui kmlă 110kV Đăk Glei lehanăn êlan klei pui kmlă 110kV Bờ Y - Đăk Glei jing bruă năng lehanăn mâo klei čiăng mjêč. Boh phŭn jing anôk bi hrŏ hnơ̆ng pui kmlă mrao anei srăng ngă klei găl kơ bruă bi mguôp dŭm sang măi mkra mjing pui kmlă êran hŏng ai êa ti alŭ wăl kdriêk Dak Glei. Đru kơ bruă mđĭ kyar bruă duh mkra ala ƀuôn, rơ̆ng klei ngă bruă duh bi liê mkŏ mkra dŭm sang măi mkra mjing pui kmlă êran hŏng ai êa lehanăn mđĭ klei đăo knang klei bruă mkăp brei pui kmlă ti kdriêk Đăk Glei. Dưi thâo, anôk bi hrŏ hnơ̆ng pui kmlă 110kV Đăk Glei lehanăn êlan klei pui kmlă 110kV Bờ Y - Đăk Glei mâo leh hlăm hdră mkăp mđĭ kyar pui kmlă čar Kon Tum wưng thŭn 2016-2025. Khădah truh kơ ară anei êmưt leh 3 thŭn mkă hŏng hdră êlan êlâo anăn, anôk bi hrŏ hnơ̆ng pui kmlă anei ăt ka mâo ôh klei duh bi liê rŭ mdơ̆ng mơ̆ng knơ̆ng bruă pui kmlă krĭng kwar krah. Amei jing anôk dôk ka thâo êra hlăm klei ba mkăp pui kmlă mơ̆ng pui kmlă êran hŏng ai êa lehanăn pui kmlă êran hŏng ai angĭn ti 2 kdriêk Ngọc Hồi, Đăk Glei hlăm čar Kon Tum Ktuê knông lăn hŏng ala čar Lào.

Pô mblang: Y- Ƀel Êban