VOV4.Êđê -   Truh tlam hruê 6-5, čar Kon Tum bi leh bruă tlŏ vaccin covid-19 tal 1, mbĭt anăn lŏ dơ̆ng pŏk ngă dŭm hdră mjêč gang mkhư̆ klei ruă tưp. Ti čar Kon Tum mâo jih jang giăm 11 êbâo čô mnuih dưi tlŏ vaccin gang mkhư̆ klei ruă Covid-19 tal 1, mâo êbeh 835 ênoh mnuih dưi mđing tlŏ gưl tal 1. Anei jing phung mă bruă ti dŭm anôk bruă mdrao mgŭn leh anăn phung gang mkhư̆ klei ruă Covid-19.

Kơ bruă gang mkhư̆ klei ruă Covid-19 ti čar Kon Tum, truh tlam 6-5, bruă mdrao mgŭn alŭ wăl mâo leh 2 čô F1 ti kdriêk Sa Thầy leh anăn Ngọc Hôì. Bruă hiu duah leh anăn ktuê dlăng phung F2, F3 mâo êpul bruă djŏ tuôm ngă mjêč. Ti anăp klei ruă tưp Covid-19 tưp pral, dleh ktuê dlăng, Anôk bruă gĭt gai lĭng kahan čar Kon Tum mâo leh hră mơĭt kơ Knơ̆ng bruă sang čư̆ êa čar lehanăn Anôk bruă gĭt gai gang mkhư̆ klei ruă Covid-19 čar Kon Tum kčĕ hdră êlan mkŏ mjing dŭm anôk gak răng, ksiêm dlăng kñăm gang mkhư̆ phung mŭt hlăm ala čar soh hŏng hdră bhiăn ti 2 anôk (hlăm alŭ wăl bi knông ti knông lăn).

H Zawut pô mblang