VOV4.Êđê- Ti anăp klei hâo hưn ƀuôn prŏng Hồ Chí Minh hin djam tam hlăm dŭm hruê bi ktlah mdrơ̆ng hŏng klei ruă tưp Covid-19, lu êpul bruă kyua êpul êya hŏng dŭm êtuh čô mnuih ti čar Kon Tum mkŏ mjing hrui êmiêt djam tam čiăng dŭ mdiăng đru kơ mnuih ƀuôn sang ƀuôn prŏng.

Mơ̆ng čang rang aguah, amai Nguyễn Thị Thảo Nguyên, khua kiă kriê êpul bi mguôp jih hnơ̆ng alŭ wăl čar Kon Tum lehanăn krĭng Lăn Dap Kngư, truh leh hlăm sa đang djam ti alŭ Nguyễn Trãi, ƀuôn prŏng Kon Tum. Amai Nguyên brei thâo, ktuê dlăng hlăm Internet, ƀuh dŭm bruă ngă yuôm bhăn mơ̆ng dŭm êpul bi mguôp, pô đang djam čŏng duah leh êlan blŭ hrăm hŏng êpul bi mguôp čiăng đru mguôp 2 mbuôn djam bei doh mơ̆ng gŏ sang pô. Bruă dôk anăn jing dŭm čô hlăm êpul bi mguôp nao buč lehanăn ba mklin sa anôk, răng pioh čiăng kơ djam anăn dôk mtah mda:

“Djam anei djŏ hruê mmông buč leh, rơ̆ng mâo nanao klei mtah lehanăn doh. Ba truh kơ anăn tơdah jhat hĕ ăt jing hơăi mang mơh. Hmei bi mguôp leh hŏng dŭm êpul bi mguôp hlăm kdriêk čiăng mkŏ mjing anôk mă mnơ̆ng đru mơ̆ng mnuih ƀuôn sang. Lehanăn hmei srăng bi mklin sa anôk ti ƀuôn prŏng Kon Tum, dưm hlăm êdeh ba kơ ƀuôn prŏng Hồ Chí Minh yơh. ”

Phung hlăm êpul hgŭm hrah hrah krĭng wăl Kon Tum leh anăn Lăn Dap Kngư hrui pĕ djam tam

Hrăm mbĭt ngă bruă bi mguôp djam mtam đru kơ mnuih ƀuôn sang ti ƀuôn prŏng Hồ Chí Minh, dŭm êpul bi mguôp, êpul čŏng kơ bruă kyua yang ƀuôn ti čar Kon Tum dưi bi mguôp leh 10 tôn djam tam mtah mơĭt kơ ƀuôn prŏng Hồ Chí Minh. Êngao kơ dŭm mta djam dưi pioh ƀiă hruê msĕ si djam hbei, djam mlăng, djam djă.. lŏ mâo dŭm mta msĕ si boh giêt, boh plei, êtac êbai dưi pioh sui hruê. Klei yuôm bhăn kơ nei jing dŭm bruă đru mguôp djam mtam mơĭt kơ ƀuôn prŏng Hồ Chí Minh dôk dưi ngă lu mơ̆ng mnuih ƀuôn sang ti čar Kon Tum. Amai Bùi Thị Tuyết Yên, ti êpul 2, ƀuôn hgŭm Nguyễn Trãi, ƀuôn prŏng Kon Tum, mâo đang djam djă čhĭ grăp hruê lehanăn bi klă đru jih đang djam pô brei thâo:

“Gŏ sang kâo thơ̆ng kơ pla djam djă, ară anei, dŭm khăt srăng ba mguôp dŭm anăn kơ mnuih ƀuôn sang ti ƀuôn prŏng Hồ Chí Minh. Mâo leh êdeh ba mdiăng sơnăn, pô ăt mâo klei bi mguôp mơh. Sa mbah êjai êpa mđơr hŏng sa hruh leh trei. ”

Mbĭt hŏng bruă bi mguôp lu djam mtam mơ̆ng lu anôk ti ƀuôn prŏng Kon Tum lehanăn dŭm kdriêk msĕ si: Đăk Ha, Đăk Tô, Kon Plông… dŭm čô hlăm êpul bi mguôp jih ai alŭ wăl Kon Tum lehanăn krĭng Lăn Dap Kngư, Kâo khăp kơ Kon Tum, Team Kon Tum… ngă leh bruă bi mbha, răng pioh čiăng dưi ba truh djam mtam anei kơ ƀuôn prŏng Hồ Chí Minh. Ayŏng Trần Văn Cao Sang, khua êpul bi mguôp Kâo khăp kơ Kon Tum brei thâo, hdră êlan dŭ mdiăng lehanăn bi mbha djam mtam mtah hlăm wưng klei ruă tưp Covid-19 dưi mâo klei tĭng mkă čiăng rơ̆ng truh kơ kngan mnuih ƀuôn sang ti ƀuôn prŏng Hồ Chí Minh hŏng klei hmăr hĭn lehanăn êđăp ênang hĭn.

“Êlâo hĭn jing klei mưn êdeh mdiăng ba, mưn êdeh srăng ngă klei ksiêm mkă kman Covid-19. Kâo dưi blŭ hrăm dŭm êpul bi mguôp ti čar Gia Lai lehanăn diñu mâo dŭm gưl êdeh amâo mâo mă sa prăk kăk ôh. Pô ba mdiăng truh kơ năn lehanăn bi mguôp hŏng diñu. Bi kơ leh truh ti ƀuôn prŏng Hồ Chí Minh, kâo blŭ hrăm leh hŏng dŭm êpul bi mguôp ti anăn čiăng diñu mă dŭm mta mnơ̆ng anăn lehanăn nao ba truh ti anôk bi ktlah, čuăl krĭng.”

Pô mblang: Y-Ƀel Êban