VOV4.Êđê - Ƀri hriê jih jang mnuih ƀuôn sang myơr êrah 7-4, hŏng akŏ “Myơr êrah hrah - đru ba klei hdĭp”. Anôk bruă gĭt gai mtrŭt mjhar myơr êrah čar Kon Tum mkŏ mjing knăm mit tinh mâo dŭm êtuh čô mnuih nao myơr êrah. Thŭn 2020 grăp mlan Êpul hgŭm gru bi kal hrah čar bi hgŭm hŏng dŭm anôk bruă mkŏ mjing mơ̆ng 3 truh 5 gưl myơr êrah tŭ mă 5.300 ênoh êrah doh êbeh hdră kčah.

Ară anei kluôm čar mâo êbeh 9 êbâo čô mnuih čih anăn myơr êrah, mđĭ lar 7 êpul bruă myơr êrah leh anăn phung mkăp myơr êrah hŏng êbeh 480 čô nao hgŭm srăng myơr êrah mdrao mnuih hlăm boh klei mjêč. Leh knăm mit tinh mđing truh hruê kluôm rŏng lăn myơr êrah hruê 7-4, Sang êa drao prŏng čar Kon Tum mkŏ mjing klei tŭ mă ti năn mtam êbeh 200 ênoh êrah doh mơ̆ng phung myơr.