VOV4.Êđê - Ti anăp klei hưn, lu mnuih ƀuôn sang ƀuôn prŏng Hồ Chí Minh kƀah djam mtam ƀơ̆ng hlăm dŭm hruê bi ktlah yang ƀuôn kñăm mdrơ̆ng hŏng klei ruă Covid 19, mơ̆ng aguah mbruê, hruê 12/7, lu Êpul bruă, Êpul ba anăp, êpul đru kơ mnuih knap mñai, êpul kyua yang ƀuôn mbĭt hŏng dŭm êtuh čô mnuih hgŭm ti čar Kon Tum mkŏ mjing leh bruă hrui mƀĭn djam mtam hŏng mta kñăm truh kơ tlam hruê anei, 13/7 srăng mdiăng ba hlăm brô 10 ton djam mtam doh đru kơ mnuih ƀuôn sang ƀuôn prŏng. Bi hgŭm hluê ngă hdră đru mguôp djam mtam đru kơ mnuih ƀuôn sang ƀuôn prŏng Hồ Chí Minh, dŭm Êpul bruă, Êpul ba anăp, êpul đru kơ mnuih knap mñai kyua yang ƀuôn ti Kom Tum mkăp hlăm brô 10 ton djam mtam ba m’ĭt kơ mnuih ƀuôn sang ti ƀuôn prŏng.

Mbĭt hŏng dŭm mta djam mtam hlŏng dưi tŭk mtam msĕ si: Djam bei, mlăng, djam djă...lŏ mâo plei, boh êdak, êtak êbai dưi pioh sui hruê. Khua êpul hgŭm kâo khăp Kon Tum brei thâo, hdră dŭ mdiăng lehanăn kah mbha djam mta anei hlăm wưng dôk mâo klei ruă Covid 19 dưi tĭng dlăng klă klơ̆ng rơ̆ng jih jang djam mtam anei dưi truh ti kiê kngan mnuih ƀuôn sang ƀuôn prŏng hŏng klei pral lehanăn êđăp ênang./.

H Nêč pô mblang