VOV4.Êđê - Ti čar Kon Tum truh kơ ară anei mâo 30 čô mâo klei ruă tưp Covid-19. Khădah jih jang phung ruă anei dưi bi klah mtam leh wĭt ti čar lehanăn čar Kon Tum ară anei jing alŭ wăl ti krĭng Lăn Dap Kngư ka mâo ôh mnuih mâo klei ruă tưp hlăm êpul êya yang ƀuôn. Klă klơ̆ng, hlăm bruă gang mkhư̆ klei ruă tưp Covid-19 ti čar Kon Tum brei ƀuh, mbĭt hŏng anôk gak răng mâo klei tŭ dưn jing kang êlan mŭt hlăm čar, bruă ngă gang mkhư̆ klei ruă tưp hlăm ƀuôn sang ăt đru mguôp yuôm bhăn hlăm bruă gang mkhư̆ klei tưp lar hlăm êpul êya yang ƀuôn.

Knhal jih mlan 8 mrâo êgao, să Hơ Moong, kdriêk Sa Thầy mâo 16 čô mă bruă wĭt mơ̆ng čar dôk bluh mâo klei ruă - ti Bình Dương. Leh jih 14 hruê bi ktlah mklin sa anôk ti čar hluê si klei kčah mtrŭn, khădah ênguôt kơ anak čô, adei đeh pô, ƀiădah dŭm gŏ sang mâo msĕ klei mĭn akâo hŏng anôk bruă sang čư̆ êa brei găp djuê pô lŏ bi ktlah ti să 14 hruê dơ̆ng, huĭ tăm mâo klei amâo jăk gơ̆ amâo hmăi truh kơ êpul êya.

A Đứu, Khua bruă Đảng ƀuôn Kà Bầy brei thâo, čiăng kơ mnuih ƀuôn sang mâo klei thâo săng kjăp hlăm hdră gang mkhư̆ klei ruă msĕ snăn, grăp hruê 4 čô Đảng viên mơ̆ng Anôk bruă Đảng kreh nao gak răng ti Anôk ksiêm dlăng klei ruă Covid 19 mâo să mkŏ mjing ti dŭm ktuê êlan găn mŭt hlăm ƀuôn. Tinei, grăp čô mnuih ƀuôn sang nao kơ pưk hma amâo dah nao ti lŏ wĭt kơ sang phung Đảng viên srăng hnêč êmuh kơ hdră duh mkra pla mjing lehanăn klei suaih pral grăp čô. Mbĭt hŏng anăn mguôp hâo hưn kơ hdră gang mkhư̆ klei ruă Covid 19 čiăng kơ mnuih ƀuôn sang thâo săng klei huĭ hyưt mơ̆ng klei ruă tưp anei hŏng klei suaih pral pô lehanăn yang ƀuôn. Êngao anăn lŏ hnêč mmông adiê tlam mmăt, grăp Đảng viên kreh nao ti grăp gŏ sang hlăm ƀuôn ktrâo lač, mtô mblang, mtrŭt mjhar mnuih ƀuôn sang hluê ngă kjăp hdră  gang mkhư̆ klei ruă tưp: “Đảng viên hlăm Anôk bruă Đảng alŭ hluê ngă kjăp klei gĭt gai mơ̆ng gưl dlông. Hdră gang mkhư̆ klei ruă tưp diñu dôk gak răng, mtrŭt mjhar mnuih ƀuôn sang truă čhiăm guôm ƀô̆ tơdah kbiă ti tač. Đảng viên hlăm anôk bruă Đảng alŭ ba akŏ nanao hlăm djăp bruă lehanăn mtrŭt mjhar jih jang mnuih ƀuôn sang nao hgŭm mbĭt.

Čiăng gang mkhư̆ klei ruă Covid 19, să Hơ Moong, kdriêk Sa Thầy mkŏ mjing leh 2 anôk ksiêm dlăng mnuih ƀuôn sang nao mŭt hlăm alŭ wăl mơ̆ng kdriêk Đăk Tô lehanăn Đăk Hà. Êpul mă bruă klam ti anôk gak răng mbĭt hŏng phung knuă druh djŏ tuôm mơ̆ng să lŏ mâo klei nao hgŭm mơ̆ng mnuih hlăm Êpul ngă bruă mơ̆ng êpul êya gang mkhư̆ klei ruă Covid 19 ti 2 boh ƀuôn dôk gak răng. Mrô ksiêm dlăng ti 2 anôk ksiêm dlăng klei ruă tưp mơ̆ng să brei thâo, mơ̆ng krah mlan 5 truh kơ akŏ mlan 9 mâo êbeh 4.600 čô mnuih mŭt hlăm alŭ wăl lu mơ̆ng să Đăk Mar, kdriêk Đăk Hà lehanăn să Pô Kô kdriêk Đăk Tô. Klei hưn mơ̆ng grăp čô mâo čih djăp ênŭm boh nik kơ anôk dôk, mrô đĭng blŭ hâo hưn lehanăn hnơ̆ng hlơr asei mlei êjai găn anôk ksiêm dlăng. Lê Khắc Tuấn, Khua bruă Đảng să Hơ Moong brei thâo, čiăng mđĭ boh tŭ hlăm hdră gang mkhư̆ klei ruă Covid 19, mbĭt hŏng bruă krơ̆ng kjăp hdră ngă bruă mơ̆ng 2 anôk ksiêm dlăng jih hruê mlam, bruă sang čư̆ êa să bi mklă brei mđĭ hĭn klei thâo săng hlăm bruă gang mkhư̆ klei ruă tưp kơ mnuih ƀuôn sang: “Să Hơ Moong mnuih ƀuôn sang djuê ana ƀiă mâo êbeh 90% kyua anăn hdră mtô mblang lar êdi. 1 h truh kơ 2 h ti hdră mđung asăp mtô mblang nanao. Bi ti dŭm alŭ mâo loa bi kčaĭ asăp gưl să, Anôk kiă kriê alŭ djă hiu nanao loa kčaĭ asăp hưn mthâo. Truh ară anei klei thâo săng mnuih ƀuôn sang dưi mkra mđĭ klă sĭt.

Hrăm mbĭt hŏng êpul bruă mdrao mgŭn, lĭng kahan, kahan ksiêm hlăm hdră gang mkhư̆ klei ruă, truh kơ ară anei, dŭm alŭ, ƀuôn mơ̆ng čar Kon Tum mkŏ mjing leh êbeh 2.800 Êpul mă bruă mơ̆ng êpul êya kơ hdră gang mkhư̆ klei ruă Covid 19. Grăp êpul mă bruă mâo mơ̆ng 2 truh kơ 3 čô jing knuă druh alŭ, ƀuôn; dŭm êpul êya, phung ba anăp mâo klei đua klam kriê dlăng 30 truh kơ 50 gŏ sang. Y Dim, K’iăng khua bruă Đảng, Khua êpul gơ̆ng bruă mnuih ƀuôn sang să Đăk Pxi, kdriêk Đăk Hà brei thâo, klei mđĭ lar bruă klam mơ̆ng dŭm êpul gang mkhư̆ klei ruă Covid 19 hlăm yang ƀuôn, krĭng ƀuôn sang jing yuôm bhăn êdi: “Dŭm êpul gang mkhư̆ klei ruă tưp grăp hruê mâo bruă klam nao ksiêm dlăng jih jang alŭ, ƀuôn hlăm să. Dŭm êpul bi hgŭm hŏng kahan ksiêm dôk gak răng ksiêm dlăng mnuih amâo truă čhiăm guôm ƀô̆. Ksiêm dlăng kjăp mnuih ƀuôn sang ti êngao čar wĭt kơ sang. Kriê dlăng kjăp klei kčah mtrŭn kơ hdră bi ktlah. Hlăm alŭ, ƀuôn ăt ksiêm dlăng amâo brei dôk bi ngi lu mnuih. Êngao anăn ktrâo lač kơ mnuih ƀuôn sang hdră bi mdoh wăl hdĭp mda, Ti sang brei mâo êa rao bi mdjiê kman. Mnuih ƀuôn sang amâo mâo klei găl dưi brei êa drao kngan hmei ăt ktrâo lač kơ mnuih ƀuôn sang blei kƀu rao nanao kiê kngan lehanăn truă čhiăm guôm ƀô̆ djŏ hdră.

Truh ară anei ti čar Kon Tum, jih jang mnuih ruă Covid 19 dưi ba bi ktlah mtam leh wĭt kơ čar lehanăn Kon Tum ară anei jing čar ti krĭng Lăn dap kngư ka mâo mnuih ruă hlăm êpul êya. Čiăng krơ̆ng kjăp boh tŭ hlăm hdră ksiêm dlăng klei ruă mbĭt hŏng klei mđĭ hĭn êpul nao ksiêm dlăng ti dŭm êlan mŭt hlăm čar kñăm gang mkhư̆ phŭn bi mtưp klei ruă mŭt hlăm alŭ wăl, Kon Tum ăt dôk krơ̆ng kjăp lehanăn mkŏ mkra lu alŭ, ƀuôn êđăp ênang čiăng kơ klei hdĭp lŏ wĭt jăk msĕ êlâo./.