VOV4.Êđê - Ti čar Kon Tum hlăm hruê 23/5, mâo giăm 347 êbâo čô mnuih hlăm čar nao mplĕ hră ruah khua hlăm Hruê m’ak prŏng mơ̆ng ala čar čiăng ruah mnuih mâo klei thâo, mâo knhuah hdĭp jăk. Knăm mphŭn pŏk hruê m’ak ruah khua ti 660 krĭng mplĕ hră hlăm čar dưi mkŏ mjing hŏng klei mpŭ, khuăt, djŏ hŏng klei kčah mtrŭn lehanăn dưi bi êdah ai êwa mơ̆ng Hruê m’ak nao ruah khua mơ̆ng jih jang mnuih ƀuôn sang.

Ti dŭm krĭng mplĕ hră mâo s’aĭ êpul mă bruă mdrao mgŭn kñăm gang mkhư̆ klei ruă Covid 19 lehanăn mnuih ƀuôn sang ăt hluê ngă kjăp klei mtă mơ̆ng phung knuă druh mă bruă mdrao mgŭn. Leh bi ala kơ êbeh 1.100 čô mnuih ƀuôn sang ti ƀuôn Kon Hra Chot, hlăm krĭng mplĕ hră mrô 6, ƀuôn hgŭm Thống Nhất, ƀuôn prŏng Kon Tum mplĕ hră ruah khua tal êlâo hlăm huôm mplĕ hră, A Huy hơ̆k m’ak brei thâo: “Mnuih ƀuôn sang tinei ăt dua, tlâo hruê leh mơh dôk čang guôn hruê ruah khua. Kâo jing khua mduôn ti alŭ Kon Hra Chot. Ƀuôn hmei hơ̆k kdơ̆k čiăng nao ruah mnuih mŭt hlăm Quốc hội, HĐND mâo djăp klei thâo. Tơ hlei pô djŏ ruah mŭt hlăm Êpul hgŭm, Quốc hội, hmei čang hmăng si srăng ngă čiăng mâo hdră đru kơ mnuih ƀuôn sang”.

Hlăm hruê ruah pô bi ala Quốc hội gưl XV lehanăn bi ala HĐND dŭm gưl, wưng thŭn 2021 – 2026, čar Kon Tum mâo 2 Anôk bruă ruah khua ti 2 êpul êya ruah mnuih phung bi ala Quốc hội, 13 Anôk bruă ruah khua ti dŭm êpul êya ruah pô bi ala HĐND čar; 83 Anôk bruă ruah pô bi ala HĐND gưl kdriêk lehanăn 625 Anôk bruă ruah pô bi ala HĐND gưl să. Mnuih ƀuôn sang čar Kon Tum srăng ruah 6 čô bi ala Quốc hội mơ̆ng 10 čô mgơ̆ng ruah; ruah 50 čô bi ala HĐND čar mơ̆ng 85 čô mgơ̆ng ruah; ruah 316 čô bi ala HĐND kdriêk mơ̆ng 531 čô mgơ̆ng ruah lehanăn 2.132 čô bi ala HĐND să mơ̆ng 3.607 čô mgơ̆ng ruah./.

H’Nêč pô mblang