VOV4.Êđê- Hruê mbruê 21/7, knơ̆ng bruă mdrao mgŭn čar Kon Tum čih yap lŏ mâo mnuih tal 3 mâo klei ruă tưp Covid-19, pô anei anăn jing B.T.X. dôk ti să Đăk Môn, kdriêk Đăk Glei. Êjai nao ti kdriêk Kbang, čar Gia Lai tuôm bi mjĕ hŏng mnuih mâo klei ruă tưp Covid-19. Pô anei mơ̆ng čar Gia Lai wĭt kơ čar Kon Tum truh ti anôk ksiêm dlăng klei ruă tưp mrô 1 Sao Mai, ti să Hòa Bình, ƀuôn prŏng Kon Tum dưi ba nao ngă klei ksiêm mkă kman lehanăn ƀuh pô anei mâo klei ruă tưp Covid-19. Tui  si êpul gĭt gai bruă gang mkhư̆ klei ruă tưp Covid-19 čar Kon Tum, pô ruă jing F0 anei ăt msĕ hŏng 2 čô F0 êlâo anăn dưi hmao ƀuh lehanăn bi ktlah ti anôk ksiêm dlăng klei ruă tưp, ka mâo nao mŭt hlăm alŭ wăl čar Kon Tum ôh. čiăng rơ̆ng kơ bruă gang mkhư̆ klei ruă tưp Covid-19, knơ̆ng bruă mdrao mgŭn čar Kon Tum mâo leh klei hâo hưn mjêč čiăng tui duah dŭm čô tuôm nao ti anôk ksiêm dlăng klei ruă tưp Sao Mai ti êlan dơ̆ng mrô 14, hlăm alŭ 2 să Hòa Bình, ƀuôn prŏng Kon Tum.

Pô mblang: Y-Ƀel Êban