VOV4.Êđê - Aguah 22-7, ti ƀuôn prŏng Kon Tum, Knơ̆ng bruă sang čư̆ êa čar Kon Tum mkŏ mjing Knăm hưn mdah dŭm Hdră mtrŭn mơ̆ng Knơ̆ng bruă kriê dlăng klei thâo, Phŭn bruă kreh knhâo leh anăn kdrăp mrâo mkăp Hră bi mklă čih anăn knăl hŏng 11 mnơ̆ng dhơ̆ng ti alŭ wăl. 11 mnơ̆ng dhơ̆ng mơ̆ng čar Kon Tum mâo Knơ̆ng bruă kriê dlăng klei thâo, Phŭn bruă kreh knhâo leh anăn kdrăp mrâo mkăp Hră bi mklă anăn knăl mâo: Sâm Ngọc Linh Kon Tum, kphê krĭng êăt Kon Tum leh anăn 9 mta ana êa drao: mmao ĭt, Đảng sâm, Đương quy, Lan kim tuyến, Ý dĩ, Đinh lăng, kñĭt triêl tiê kñĭ, Ngũ vị tử, Sa nhân tím. Anei jing dŭm mta mnơ̆ng dhơ̆ng phŭn leh anăn mâo mă hjăn ti čar Kon Tum. Knơ̆ng bruă sang čư̆ êa čar Kon Tum brei thâo, bruă 11 mnơ̆ng dhơ̆ng ti čar dưi Mkăp hră bi mklă čih anăn knăl jing bruă yuôm bhăn hŏng phung mkra mjing, mnia blei leh anăn phung blei yua.

H Zawut pô mblang