VOV4.Êđê- Bruă Đảng čar Kon Tum kčah hdră kñăm hlăm 5 thŭn kơ anăp gĭr ktưn mâo 4 kdriêk leh anăn ƀuôn prŏng Kon Tum djăp hnơ̆ng čuăn krĭng ƀuôn sang mrâo amâo dah bi leh bruă klam rŭ mdơ̆ng krĭng ƀuôn sang mrâo. Čiăng dưi ngă hdră kñăm anei, čar Kon Tum bi mklă brei pŏk ngă jăk 8 êpul bruă klam, hdră msir, hlăm anăn mđing kơ bruă hâo hưn mtô mblang čiăng kơ mnuih ƀuôn sang gĭr đru mkŏ mkra krĭng ƀuôn sang mrâo.

Truh kơ ară anei, čar Kon Tum mâo 28 să dưi tŭ yap djăp hnơ̆ng čuăn krĭng ƀuôn sang mrâo. Êngao anăn mâo 10 să djăp mơ̆ng 15 – 18 hnơ̆ng čuăn, 45 să djăp mơ̆ng 10 truh kơ 14 hnơ̆ng čuăn lehanăn 2 să djăp mơ̆ng 8 – 9 hnơ̆ng čuăn. Bruă Đảng čar Kon Tum mâo hdră kñăm hlăm 5 thŭn ti anăp gĭr mâo 4 kdriêk lehanăn ƀuôn prŏng Kon Tum djăp hnơ̆ng čuăn mkŏ mkra krĭng ƀuôn sang mrâo amâo dah ngă leh bruă mkŏ mkra krĭng ƀuôn sang mrâo. Mâo mơ̆ng 60 să djăp hnơ̆ng čuăn krĭng ƀuôn sang mrâo kơ dlông lehanăn 100% să djăp hnơ̆ng čuăn yuôm bhăn hlăm bruă mkŏ mkra krĭng ƀuôn sang mrâo, msĕ si: Čuăl mkă, êlan klông, knơ̆ng kdơ̆ng êa, pui kmlă, anôk bruă dhar kreh, sang dôk, ênoh mnuih mâo bruă mă nanao… Mrâo anei, ti anôk bi kƀĭn tal 3, Anôk gĭt gai bruă Đảng čar gưl XVI, bruă Đảng čar Kon Tum kƀĭn bi trông kơ bruă mkŏ mkra krĭng ƀuôn sang mrâo. Blŭ hrăm ti anôk bi kƀĭn, Dương Văn Trang, Khua hlăm anôk bruă Đảng gưl dlông, Khua bruă Đảng čar Kon Tum brei thâo:

    “Anôk kriê dlăng bruă Đảng čar gĭt gai brei ksiêm dlăng, tĭng dlăng boh tŭ dưi mâo, bi hrŏ klei dleh dlan, gun kpăk hlăm hdră mkŏ mkra krĭng ƀuôn sang mrâo ti alŭ wăl. Bi mklă mta phŭn ngă mâo klei gun kpăk. Hluê hŏng klei mâo sĭt ti čar, dŭm klei gĭt gai mơ̆ng gưl dlông kơ bruă mkŏ mkra krĭng ƀuôn sang mrâo čiăng bi mklă mta kñăm, hdră msir čiăng mkŏ mkra krĭng ƀuôn sang mrâo ti alŭ wăl čar wưng thŭn 2021- 2025”.

Knăm trŭn ngă bruă mkŏ mkra krĭng ƀuôn sang mrâo

Čiăng bi leh hdră kñăm truh kơ thŭn 2025 mâo 4 kdriêk lehanăn ƀuôn prŏng Kon Tum mâo djăp hnơ̆ng čuăn mkŏ mkra krĭng ƀuôn sang mrâo amâo dah ngă leh bruă mkŏ mkra krĭng ƀuôn sang mrâo, bruă Đảng čar Kon Tum bi mklă pŏk ngă jăk 8 bruă klam phŭn, dŭm hdră mâo: Mđĭ hdră mtô mblang kơ bruă mkŏ mkra krĭng ƀuôn sang mrâo, mđĭ hnơ̆ng tŭ hdră čuăl mkă, kriê dlăng lehanăn hluê ngă hdră čuăl mkă, boh nik hdră mđĭ kyar bruă lŏ hma, krĭng ngă lŏ hma, duh bi liê mkŏ mkra anôk bruă duh mkra nah gŭ – bruă ala ƀuôn mguôp hŏng hdră mđĭ kyar ƀuôn prŏng, lŏ mkŏ dăp bruă lŏ hma mđĭ hnư hrui wĭt kơ mnuih ƀuôn sang, mđĭ kyar bruă mtô bi hriăm, mdrao mgŭn, bruă dhar kreh, răng mgang wăl hdĭp mda, mđĭ hnơ̆ng tŭ bruă mkŏ mkra Đảng lehanăn anôk bruă kđi čar nah gŭ, bi lu jơr mnuih mă bruă duh mkra mkŏ mkra krĭng ƀuôn sang mrâo, mđĭ klei gĭt gai mơ̆ng dŭm gưl bruă Đảng, kriê dlăng mơ̆ng Anôk bruă sang čư̆ êa dŭm gưl lehanăn mđĭ lar ai ktang êpul êya bruă kđi čar – ala ƀuôn hlăm krĭng ƀuôn sang kơ hdră mkŏ mkra krĭng ƀuôn sang mrâo.

Leh hruê Tết nguyên đán Tân Sửu 2021, jih 10 kdriêk, ƀuôn prŏng mơ̆ng čar Kon Tum mđrăm mbĭt mkŏ mjing Knăm trŭn kơ bruă akŏ thŭn mtrŭt mjhar jih jang mnuih ƀuôn sang hgŭm ai mkŏ mkra krĭng buôn sang mrâo lehanăn dhar kreh ƀuôn prŏng. Ti ƀuôn prŏng Kon Tum, bruă sang čư̆ êa lehanăn mnuih ƀuôn sang 21 să, ƀuôn hgŭm mđrăm mbĭt hluê ngă bruă pla ana kyâo akŏ thŭn gĭr hlăm thŭn pla ƀiă êdi 2 êbâo phŭn ana kyâo mtah, ngă bi kjăp êlan klông krĭng ƀuôn sang, trŭn kơ bruă bi mdoh, bi msiam krĭng ƀuôn prŏng.

 Khua gĭt gai ƀuôn prŏng Kon Tum pla ana kyâo ti ƀuôn prŏng

Nguyễn Thanh Mân, khua anôk bruă sang čư̆ êa ƀuôn prŏng Kon Tum brei thâo, thŭn anei ƀuôn prŏng gĭr srăng mâo 2 să Čư̆ Hreng lehanăn Kroong ngă leh bruă mkŏ mkra krĭng ƀuôn sang mrâo. Truh thŭn 2023, ƀuôn prŏng srăng mâo djăp hnơ̆ng čuăn mkŏ mkra krĭng ƀuôn sang mrâo lehanăn djăp hnơ̆ng čuăn ƀuôn prŏng mta 2 êlâo kơ thŭn 2025. Bruă sang čư̆ êa jao leh bruă klam klă klơ̆ng kơ grăp să, ƀuôn hgŭm, anôk bruă djŏ tuôm rơ̆ng hluê ngă bruă hŏng klei tŭ dưn, klă sĭt.

“Hŏng dŭm să trŭn kơ bruă ngă mkra êlan klông, mkŏ mkra dŭm hdră bruă hlăm alŭ wăl mđing truh kơ bruă mkŏ mkra dŭm hnơ̆ng čuăn čiăng mâo djăp hnơ̆ng čuăn mkŏ mkra krĭng ƀuôn sang mrâo. Hŏng ƀuôn prŏng lŏ mkŏ wĭt klei êđăp ênang, êpul êya bruă ƀuăn rơ̆ng hŏng dŭm gŏ êsei ngă bruă kriê dlăng anôk bruă nah gŭ krĭng ƀuôn prŏng, kriê dlăng ana kyâo mtah. Mbĭt hŏng anăn, anôk bruă sang čư̆ êa ƀuôn prŏng srăng lŏ mkra mlih, bi msiam ƀuôn prŏng boh nik duah bi liê kơ 2 ping êlan, anôk mđoh mđuĕ êa, ana kyâo mtah, pui kmlă ti dŭm ktuê êlan hlăm ƀuôn prŏng. Mđing truh kơ bruă mkŏ mkra ƀuôn prŏng Kon Tum djăp hnơ̆ng čuăn ƀuôn prŏng mta 2, ƀuôn prŏng srăng pŏk hluê ngă dŭm hdră bruă phŭn čiăng pŏk mlar wăl anôk ƀuôn prŏng’’.

Mbĭt hŏng dŭm hdră msir kluôm, bruă sang čư̆ êa grăp să, kdriêk mơ̆ng čar Kon Tum hluê hŏng klei mâo mơ̆ng grăp alŭ wăl čiăng mâo hdră msir mdê mdê, kñăm krơ̆ng kjăp lehanăn mđĭ grăp hnơ̆ng čuăn mkŏ mkra krĭng ƀuôn sang mrâo. Nguyễn Văn Thủy, K’iăng khua anôk bruă sang čư̆ êa kdriêk Kon Braih brei thâo:

“Hlăm lu hdră anăn, hdră phŭn jing mtrŭt mjhar mnuih ƀuôn sang ba yua dŭm kdrăp mrâo hlăm bruă pla mjing, ngă lŏ hma čiăng mđĭ boh tŭ yuôm, hnư hrui wĭt jăk hĭn hlăm sa ênhă lăn kñăm msir mghaih klei kơ hnư hrui wĭt lehanăn tlaih kơ ƀun h’ĭt kjăp. Klă klơ̆ng jing ba dŭm mta mjeh mrâo mâo hnơ̆ng tŭ jăk ba yua kdrăp mrâo hlăm bruă duh mkra, pla mjing mơ̆ng anăn mđĭ hnơ̆ng boh tŭ yuôm, mđĭ hnơ̆ng mâo boh mnga srăng dưi msir mghaih klei kơ hnư hrui wĭt mơ̆ng mnuih ƀuôn sang’.

Čiăng dưi krơ̆ng kjăp, mđĭ boh tŭ yuôm dŭm hnơ̆ng čuăn, bruă sang čư̆ êa 28 să djăp hnơ̆ng čuăn krĭng ƀuôn sang mrâo mơ̆ng čar Kon Tum lŏ dơ̆ng mđĭ hdră mtô mblang kơ bruă mkŏ mkra krĭng ƀuôn sang mrâo, krơ̆ng kjăp hdră bi ktưn “Kon Tum hgŭm ai mkŏ mkra krĭng ƀuôn sang mrâo’’, iêu mtrŭt, ba yua djăp ai dưi, klei mâo čiăng bi kjăp lehanăn mđĭ hnơ̆ng tŭ dŭm hnơ̆ng čuăn./.

Pô mblang: H’Nêč Êñuôl