VOV4.Êđê- Ti anăp klei mâo dleh dưi ksiêm dlăng mơ̆ng klei ruă Covid 19 ti ƀuôn prŏng Đà Nẵng, mơ̆ng hruê 21/6, Knơ̆ng bruă Êlan klông dŭ mdiăng čar Kon Tum mdei leh hdră du mdiăng tuẻ nao truh kơ alŭ wăl anei. Êngao kơ hdră dŭ mdiăng tuê (hluê êlan bi kčah, êdeh bi kuôl kă, êdeh taxi, êdeh atăt hiu čhưn ênguê) mâo ktuê êlan găn ƀuôn prŏng Đà Nẵng snăn amâo dưi mjưh, drông tuê đĭ hlăm êdeh ôh. Hŏng mnuih nao truh kơ ƀuôn prŏng Đà Nẵng kyua mâo bruă knŭk kna, êdeh mdiăng mnuih ruă, mnuih jih wưng bi ktlah, êdeh mdiăng mnơ̆ng dhơ̆ng mkăp kơ hdră gang mkhư̆ klei ruă lehanăn dŭm boh klei mjêč mkăn dưi mâo klei brei găn êrô mơ̆ng anôk bruă djŏ tuôm. Knơ̆ng bruă Êlan klông dŭ mdiăng čar Kon Tum jao kơ Dhar bruă ksiêm dlăng mơ̆ng knơ̆ng bruă lŏ dơ̆ng bi hgŭm hŏng alŭ wăl, êpul djŏ tuôm mđĭ hdră ktrâo lač, ksiêm dlăng lehanăn hyuă kjăp bruă hluê ngă dŭm hdră gang mkhư̆ klei ruă tưp ti dŭm kdrăp găn êrô hlăm êlan klông./.

Pô mblang: H’Nêč Êñuôl