VOV4.Êđê - Leh giăm mkrah mlan dôk ksiêm dlăng, čih mkra hdră kčah ngă bruă, hruê 4/8, čar Kon Tum mâo leh hdră kčah klă klơ̆ng tŭ drông 1 êbâo čô mơ̆ng krĭng dôk bluh mâo klei ruă ti kwar Dhŭng, mâo Ƀuôn prŏng Hồ Chí Minh lehanăn 2 čar Bình Dương, Đồng Nai wĭt kơ čar. Hluê anăn, anôk bruă sang čư̆ êa čar Kon Tum srăng drông gưl tal êlâo 1 êbâo čô. Mnuih mâo klei mđing tal êlâo hĭng jing mnuih djuê ana ƀiă, mnuih dôk hlăm gŏ êsei ƀun, mnuih khua thŭn, phung mniê ba tian, phung hđeh, mnuih nao ksiêm mkă dlăng klei ruă, mnuih mă bruă luič bruă mă lehanăn phung hđeh hriăm hră, sinh viên. Čiăng kơ bruă tŭ drông mnuih wĭt kơ čar dưi mkŏ mjing hŏng klei êđăp ênang, rơ̆ng kjăp hdră gang mkhư̆ klei ruă Covid 19, ară anei dŭm alŭ wăl mơ̆ng čar Kon Tum mprăp tŭ drông leh mnuih dưi wĭt kơ ƀuôn sang djŏ hŏng klei kčah mtrŭn. Mơ̆ng hdră ksiêm dlăng tal êlâo, kluôm čar Kon Tum mâo giăm 4 êbâo čô dôk hdĭp, mă bruă ti dŭm dôk mâo klei ruă tưp ti kwar Dhŭng mâo klei čiăng wĭt kơ čar./.

H Nêc pô mblang