VOV4.Êđê- Aguah hruê 14/7, ti Wăl msat kahan djiê êngiă čar Kon Tum, bruă Đảng ƀuôn prŏng, Êpul gơ̆ng bruă ƀuôn sang, Anôk bruă sang čư̆ êa, Dhar bruă mặt trận ƀuôn prŏng Kon Tum mkŏ mjing leh Knăm čang ênuh lehanăn ba dơr klang kleh 2 čô kahan djiê êngiă hlăm ênuk bi blah dưi suaih kƀĭn hlăm alŭ wăl ƀuôn prŏng. Klang kleh dua čô kahan djiê êngiă anei mâo Anôk gĭt gai lĭng kahan ƀuôn prŏng Kon Tum bi hgŭm hŏng Anôk gĭt gai lĭng kahan să Ngọc Bay lehanăn Kroong mâo suai hlăm dŭm hruê akŏ mlan 7 leh hmư̆ klei mnuih ƀuôn sang alŭ wăl hưn.

Hluê si klei hưn mơ̆ng Anôk gĭt gai lĭng kahan ƀuôn prŏng Kon Tum, klang kleh kahan djiê êngiă anei dưi hmao ƀuh hlăm ƀăng mur bi blah. Mnơ̆ng adôk mâo čhum ao kahan lehanăn jih dua čô kahan djiê êngiă anei ka mâo bi mklă anăn ôh. Hlăm ênuk bi blah bi kdơ̆ng hŏng Mi mtlaih ala hlăm alŭ wăl ƀuôn prŏng Kon Tum, čar Kon Tum jing kdrăn mblah ktang phĭt. Êbeh 46 thŭn mtlaih êngiê kwar Dhŭng hluh lir lăn čar, bruă Đảng, bruă sang čư̆ êa, êpul bruă djŏ tuôm lehanăn mnuih ƀuôn sang ƀuôn prŏng Kon Tum ăt dôk tui duah, suai ba wĭt klang kleh phung kahan djiê êngă adôk hlăm kdrăn mblah./.

                                                    Pô mblang: H’Nêč Êñuôl