VOV4.Êđê-  Knơ̆ng bruă sang hră mtô bi hriăm čar Kon Tum bi mklă mphŭn pŏk thŭn hriăm mrâo 2021-2022 hŏng phung hđeh sang hră dŭm gưl hlăm hruê 5-9 leh anăn hruê êdei 6-9 mphŭn hruê hriăm tal êlâo. Čiăng rơ̆ng êđăp ênang hlăm boh klei ruă tưp Covid-19 dleh ktuê dlăng, leh anăn phung hđeh krĭng taih kbưi, krĭng mnuih djuê ƀiă mâo djăp mnơ̆ng yua hriăm hră kơ thŭn hriăm mrâo, Khua sang hră dŭm sang hră ti Kon Tum dôk gĭr bi leh jih bruă mprăp.

Truh wưng anei lu phung hđeh ti dŭm kdriêk tiah kbưi, krĭng mnuih djuê ƀiă, msĕ si: Đăk Glei, Tu Mơ Rông, Kon Plông… ti čar Kon Tum bi leh jih bruă kih mdoh sang hră, adŭ hriăm. Khua sang hră gưl sa Nguyễn Văn Cừ, ti să dleh dlan êdi Đăk Pxi, kdriêk Đăk Hà, brei thâo, thŭn hriăm mrâo anei sang hră mâo 278 čô hđeh sang hră hŏng êbeh 90% jing anak čô mnuih djuê ana Sê dang. Truh ară anei bruă mprăp kơ hruê mphŭn pŏk thŭn hriăm mrâo leh anăn thŭn hriăm mrâo ti sang hră dưi bi leh ênŭm.

H Zawut pô mblang