VOV4.Êđê- Hruê mbruê, 29/11, knơ̆ng bruă mdrao mgŭn čar KonTum kčưm leh bruă tlŏ mgang kluôm gưl tal 1 vaccine gang mkhư̆ klei ruă tưp Covid-19 kơ giăm 66.000 čô hđeh mơ̆ng 12 -17 thŭn. Hlăm klei tlŏ mgang gưl tal 1 anei, knơ̆ng bruă mdrao mgŭn čar Kon Tum bi mguôp hŏng knơ̆ng bruă mtô mjuăt bi hriăm čar KonTum tlŏ mgang kơ phung hđeh sang hră gưl 3, sang hră gưl 3 knŭk kna rông ba hđeh sang hră djuê ƀiă, anôk mtô mjuăt bi hriăm klei mă bruă, leh anăn anôk thơ̆ng kơ bruă mtô mjuăt.

Yap truh kơ aguah mbruê, mâo leh giăm 8.500 čô hđeh sang hră hlăm 31/38 anôk bruă sang hră dưi tlŏ mgang aruăt vaccine Pfzer tal 1. Tui si knơ̆ng bruă mtô mjuăt bi hriăm čar Kon Tum, hđeh mơ̆ng 15 – 17 thŭn dưi tlŏ mgang tla êlâo hĭn leh anăn srăng mtrŭn ênoh thŭn tui si klei mkăp brei vaccine mơ̆ng knơ̆ng bruă mdrao mgŭn. Čiăng rơ̆ng klei êđăp ênang, kluôm ênŭm hlăm bruă tlŏ mgang kơ phung hđeh, êpul khua gĭt gai sang hră mâo leh klei hâo hưn, mtrŭt mjhar amĭ ama bi klă klei ƀuăn rơ̆ng brei anak tlŏ mgang vaccine.

Pô mblang: Y-Khem Niê