VOV4.Êđê- Amâo mâo msĕ si đa đa djuê ƀiă ti Lăn Dap Kngư - Trường Sơn mkra kpei knŏng hŏng dŭm mta hla kyâo dliê, kpei kpiê čeh mnuih Brâu jing klei bi mguôp pluh mta hla kyâo hŏng ana, hla, agha, hbei mdê mdê, dưi mâo êa ƀâo mngưi, hăng. Kyua klei mdê hjăn kpei hla kyâo, snăn kpiê čeh mnuih Brâu ƀâo mngưi, jăk êdi ti ƀuôn Đăk Mế, să Pờ Y, kdriêk Ngọc Hôì, čar Kon Tum.

Jing mnuih hlăm wưng ênuk 7X ti ƀuôn Dak Mê̆, să Pờ Y, kdriêk Ngọc Hồi ƀiădah mâo klei thâo hlăm bruă knă kpiê čeh mâo kpei hŏng hla kyâo dưi mâo klei mnuih ƀuôn sang khăp êdi, amai Y Nóp Lač: Čiăng dưi knă sa čeh kpiê jăk, êngao kơ mnơ̆ng dhơ̆ng phŭn jing braih điŏ hlăm hma mơ̆ng mnuih ƀuôn sang, mnơ̆ng yuôm bhăn hĭn jing kpei srăng mâo klei jăk. Kpei jăk dưi mâo klei mkra mjing djŏ hŏng knhuah gru mơ̆ng mnuih Brâu. Thâo hlăm bruă knă kpiê, amâo djŏ knŏng hjăn amai Y Nóp ôh ƀiădah jih jang dŭm čô amai adei mkăn ăt thâo kral dŭm mta ana kyâo, hla kyâo, hbei leh anăn hla kyâo hlăm dliê čiăng wĭt yua hlăm bruă mkra mjing kpei. Hlăm ênoh 10 mta ana kyâo kreh yua hlăm bruă mkra mjing kpei, dŭm ana mâo mnâo mmih jĭng dŭm ana kyâo msĕ si: Ana mnŭt, ana êguôl, hruê̆ tác tờ rác. Dŭm ana mâo mnâo phĭ mâo ana wăk, ana chờ ia ăng…

Dŭm mta hla kyâo npioh mkra kpei kpiê čeh

Êngao kơ năn lŏ mâo tô̆k ana dác, ana pờ em, năng van, ana ca xôm.. mâo ana mă gha leh anăn mă hbei. Grăp mta mâo mnâo mdê mdê, ƀiădah jih jang mâo klei bi lŭk mbĭt jing kpei jăk. Êdei anei, mnuih Brâu lŏ ba yua wăt ana kbâo čiăng mkra kpei. Boh nĭk tui hluê klei khăp mơ̆ng djuê ana, čiăng dưi mâo klei mgang kơ kpei, amâo dưi kƀah ôh ana chiết ta kreh yua hlăm bruă suôt đuê̆ klei jhat.

Klei mkra mjing kpei mơ̆ng mnuih Brâu jing mă dŭm mta hruê̆, ana kyâo, agha kyâo, tô̆k kyâo ba rao doh, mtlai mbĭt hŏng braih, tuh hlăm êsung, tlê ƀhĭ leh anăn tuh êa ƀiă hlăm anăn. Leh anăn yua kngan kmuôn mnơ̆ng anei jing dŭm klŏ điêt msĕ hŏng boh dă êa amâo dah kčok dôk mkup, leh anăn ba nao ƀhu (kreh ƀhu ti dlông kpur pui). Čiăng dưi djă pioh sui, boh kpei leh thu dưi jeh hlăm đĭng đrao, amâo dah kă hŏng klei lehanăn yuôl hlăm sang pui. Sui hruê, kpei mâo êa mil msĕ hŏng tŭk kmrui, dưi yua ƀiă êdi hlăm 3 mlan, mâo blư̆ truh kơ sa thŭn.

Mâo kpei msĕ hŏng klei čiăng, leh anăn phung amai adei nao hlăm bruă mđam kpiê čeh, tui hluê amai Y Phoong ti ƀuôn Dak Mê̆: bruă ngă klă klơ̆ng jing mă hnơ̆ng braih điŏ čiăng yua, leh anăn bi lŭk hŏng mdiê bô tui hlue hnơ̆ng 50:50, ba rao doh lehanăn knă ksă, hoai tuh hlăm ê’i. Čiăng kơ ñu êăt ƀiă, êjai dôk đao đao lŏ pruôi kpei leh tlê lĭk bi lŭk mbĭt. Điŏ leh anăn mdiê pô leh bi lŭk hŏng kpei dưi dưm hlăm êi, guôm hŏng sa mta hla dliê (hla tang) hlăm ƀrô 1 hruê čiăng mâo mnâo ƀâo mngưi, leh anăn tuh hlăm čeh leh anăn kđăl krĭp. Mđam kpiê hlăm 5 hruê srăng dưi ba mnăn. Čeh kpiê lui sơnăn dŭm mlan ăt dôk jăk, amâo mâo jhat ôh.

 Bi luk điŏ hŏng kam mdiê

 Hŏng anăn knăl sui thŭn, giăm anei, kpiê čeh mâo kpei hŏng hla kyâo mơ̆ng mnuih Brâu ti ƀuôn Dak Mê̆, să Pờ y dưi mâo klei čuăn ruah jing mnơ̆ng dhơ̆ng OCOP. Tui hluê aduôn Võ Thị Thu Hà - khua êpul bi mguôp bruă knă kpiê hŏng kpei mơ̆ng hla kyâo mnuih Brâu: Kñăm hlăm bruă mkra mjing êa mnăm anei srăng dưi bi lar bruă ngă knhuah gru, đru mguôp hlăm bruă răng kriê klei siam dhar kreh djuê ana, leh anăn hmăng hmưi mâo klei bi mguôp srăng mkŏ mkra mnơ̆ng dhơ̆ng dưi mâo prăk ba wĭt kơ mnuih ƀuôn sang hlăm alŭ wăl.

Pô mblang: Y-Khem Niê