VOV4.Êđê - Ơ ƀĭng dôk hmư̆! Kđông răng mgang knông lăn Lai Hoà, êpul lĭng kahan răng mgang knông lăn Sóc Trăng jing sa hlăm dŭm kđông răng mgang knông lăn êdeh kdlưn hlăm bruă hluê ngă hdră êlan đru ba ala ƀuôn kơ mnuih ƀuôn sang, boh nik hŏng mnuih djuê ƀiă ti alŭ wăl. Hjăn gru hmô Anôk bruă mdrao mgŭn mơ̆ng kahan knông lăn amâo djŏ knŏng ngă jăk bruă ksiêm mkă klei suaih pral kơ knuă druh, lĭng kahan răng mgang knông lăn đuič ôh ƀiădah lŏ ngă jăk bruă ksiêm mkă kơ mnuih ƀuôn sang ti alŭ wăl. Thạch Hồng - pô čih klei mrâo Sang mđung asăp blŭ Việt Nam ti krĭng wăl dap mnai krông Cửu Long mâo klei čih lač kơ klei anei:

Lai Hòa jing să adôk dleh dlan mơ̆ng wăl krah Vĩnh Cưủ, mâo mnuih djuê ana Khmer, mnuih ƀuôn sang hdĭp mda hŏng bruă lŏ hma leh anăn nao trah mă kan. Kyua anăn, čiăng hnêč duh ƀơ̆ng, mnuih ƀuôn sang khăng nao ksiêm mkă klei ruă mơ̆ng hnưm. Hluê si Thái Minh Phong, Khua Anôk bruă mdrao mgŭn mơ̆ng kahan knông lăn Lai Hoà, čiăng hmao ksiêm mkă kơ mnuih ƀuôn sang, 6 mmông aguah grăp hruê phung knuă druh mdrao mgŭn mơ̆ng anôk bruă nao leh čiăng ngă bruă ksiêm mkă. Boh nik, mnuih ƀuôn sang nao ksiêm mkă lu jing êngao mmông mă bruă, kyua anăn, anôk bruă mbha knuă druh mdrao mgŭn ngă bruă jih hruê mlam čiăng ngă jăk bruă kriê dlăng klei suiah pral leh anăn bi leh bruă klam mơ̆ng phung aê mdrao hŏng mnuih ruă. Knuă druh lĭng kahan, mnuih mă bruă ti anôk anei ngă jăk, jih ai tiê, mnuih ƀuôn sang hriê snăn pô kriê dlăng, ksiêm mkă, amâo brei mnuih ƀuôn sang dôk guôn sui ôh. Ksiêm mkă leh anăn hmao mbha êa drao čiăng kơ mnuih ƀuôn sang nao mă bruă. Mnuih ƀuôn sang bi mni kơ anôk bruă anei.

Kyua phung aê mdrao hơô ao mtah jih ai tiê ngă bruă leh anăn jih ai tiê hŏng mnuih ƀuôn sang mjing klei đaŏ knang hlăm mnuih ƀuôn sang. Ară anei, kah knar sa hruê anôk bruă tŭ jum ksiêm mkă leh anăn mbha êa drao kơ êbeh 30 gưl čô mnuih. Aê mdrao Kiên Na Riêl - knuă druh mdrao mgŭn mơ̆ng anôk bruă brei thâo, ñu jing mnuih Khmer anăn thâo săng kơ klei hdĭp mnuih ƀuôn sang hlăm krĭng ƀuôn sang, amâo đei thâo blŭ klei Yuăn ôh. Sĭt ƀuh phung aê mdrao nao hnưm čiăng ksiêm mkă, blŭ klei Khmer leh anăn ktrâo lač jih ai tiê kơ hdră kriê dlăng klei suaih pral snăn mnuih ƀuôn sang mơak snăk. Anei jing ăt boh kdrŭt čiăng kơ aê mdrao ti Anôk bruă mdrao kahan knông lăn Lai Hoà ngă jăk bruă klam pô. Lu mnuih ƀuôn sang amâo raih klei Yuăn ôh, sĭt pô blŭ klei Khmer snăn mơak snăk. Sĭt pô blŭ klei Khmer snăn ăt ênưih ktrâo lač kơ mnuih ƀuôn sang ba yua êa drao, ktrâo lač kriê dlăng klei suaih pral, gang mkhư̆ klei ruă tưp… msĕ si êngoh bi ƀlĕ êrah, hnơ̆ng êrah đĭ amâodah mâo mta mmih hlăm êrah…

Kyua dôk kbưi hŏng wăl krah să anăn lu mnuih ƀuôn sang ti dŭm alŭ ti să Vĩnh Tân, dŭm alŭ Prey Chóp, Prey Chóp A, Prey Chóp B, hlăm să Lai Hoà nao ksiêm mkă sơaĭ, mdrao klei ruă ti anôk mdrao. Thiếu tá Thái Minh Phong, Khua Anôk bruă mdrao mgŭn mơ̆ng kahan knông lăn Lai Hoà brei thâo, mnuih ƀuôn sang ti dŭm ktuê hang ksĭ hlăm wăl krah Vĩnh Châu, čar Sóc Trăng leh anăn mnuih ƀuôn sang ti să bi knông hlăm čar Bạc Liêu ăt hriê tinei čiăng mdrao mgŭn. Kah knar grăp thŭn, Anôk bruă ksiêm mkă, mdrao mgŭn leh anăn mkăp êa drao kơ hlăm brô 10 êbâo gưl mnuih ruă. Mbĭt hŏng anăn, anôk bruă lŏ hâo hưn mtô mblang kơ mnuih ƀuôn sang kơ hdră gang mkhư̆ klei ruă tưp msĕ si êngoh bi ktư̆, bi ƀlĕ êrah, jơ̆ng -kngan - ƀăng êgei… boh nik, knuă druh mdrao mgŭn nao ti grăp boh sang čiăng hâo hưn kơ hdră gang mkhư̆ klei ruă Covid-19 kơ mnuih ƀuôn sang thâo săng. Mơ̆ng anăn, hrăm mbĭt hŏng bruă sang čư̆ êa gang mkhư̆ klei ruă Covid-19 tŭ dưn: Kâo ăt hâo hưn grăp hruê, msĕ si mbha hră hâo hưn kơ klei ruă Covid-19, hlăm wưng klei ruă mâo klei bi knăl lŏ bluh mâo snăn anôk bruă mdrao mgŭn ăt hâo hưn kơ mnuih ƀuôn sang amâo bi dôk bi nghi lu mnuih ôh, truă čhiăm guôm ƀô̆, bi doh asei mlei hŏng ƀu, bi doh pưk sang. Hâo hưn grăp hruê, tơdah mnuih ƀuôn sang mâo klei bi knăl êngoh hlơr snăn pô mtă kơ mnuih ƀuôn sang dôk hlăm sang, anôk bruă mdrao mgŭn srăng nao mkă hnơ̆ng hlơr asei mlei sa hruê 2 blư̆.

Ară anei, Anôk bruă sang êa drao kahan knông lăn Lai Hoà mâo 5 čô knuă druh mdrao mgŭn čiăng ngă bruă ksiêm mkă klei ruă. Khăgơ̆ ka mâo ôh phung aê mdrao, ƀiădah anôk bruă mdrao mgŭn ăt mjing klei đaŏ knang hlăm mnuih ƀuôn sang sĭt hriê nao ksiêm. Ƀuh mnuih ƀuôn sang amâo uêñ kơ êlan taih kbưi nao ksiêm mkă, phung aê mdrao, lĭng kahan gĭr jih ai tiê mdrao mgŭn, amâo uêñ hruê mlam. Mnuih ƀuôn sang mơak leh dưi hlao klei ruă jing sa boh kdrŭt čiăng kơ phung digơ̆ dôk ti alŭ wăl, mbĭt hŏng mnuih ƀuôn sang, bi leh bruă klam dưi jao.

 Giăm 20 thŭn êgao, Anôk bruă sang êa drao kahan knông lăn Lai Hoà, Êpul kahan knông lăn Sóc Trăng jing leh anôk đaŏ knang, ba klei čang hmăng, klei jăk mơak kơ mnuih ƀuôn sang ƀun, boh nik mnuih ƀuôn sang Khmer ti knông lăn êa ksĭ./.

H’Zawut pô mblang