VOV4.Êđê - Hŏng klei mprăp kluôm ênŭm, khădah jing alŭ wăl taih kbưi, ƀiădah klei ruă khua ti krĭng lăn dap kngư ăt mâo klei mơak mñai msĕ hŏng hruê knăm prŏng. Wăt tơdah dôk hlăm anôk bi ktlah, anôk čuăl krĭng mrâo ƀuh mnuih mâo klei ruă tưp Covid-19, phung mplĕ hră ăt hơ̆k mơak tui ngă klei dưi lehanăn bruă klam kơ pô. Pô mplĕ hră Nguyễn Ngọc Liên, ti anôk čuăl krĭng klei ruă tưp Covid-19, ƀuôn hgŭm Tân Thành, ƀuôn prŏng Ƀuôn Ama Thuôt, čar Dak Lak lač: “Khădah dôk hlăm anôk bi ktlah, ƀiădah hmei ăt hơ̆k mơak, dưi ngă leh klei dưi lehanăn bruă klam pô. Hmei ăt ksiêm dlăng čiăng dưi čuăn ruah dŭm čô mâo klei knhâo, klei thâo bruă lehanăn klei đăo knang”

Tĭng truh kơ 11 mmông hruê 23/5, klei ruah khua ti krĭng Lan Dap Kngư mâo klei êđăp ênang, lu alŭ wăl ti nei mâo hnơ̆ng nao ruah khua lu, msĕ hŏng čar Lâm Đồng, mâo 5/12 ƀuôn prŏng mâo hnơ̆ng ti dlông 80%, Cát Tiên jing kdriêk taih kbưi hĭn mâo hnơ̆ng êbeh kơ 90%. Ti čar Dak Lak, kdriêk Čư̆ Kuiñ, mâo 100% phŭng mplĕ hră nao ruah khua.

Y Khem pô mblang