VOV4.Êđê - Sa hlăm dŭm hdră msir gang mkhư̆ Covid 19 tŭ dưn mâo leh anôk bruă djŏ tuôm mtă jing 5 Asăp mtă + vaccine. Mrâo êgao, Khua knŭk kna ba mdah leh Asăp mtrŭn brei mtrŭt mđĭ hdră tlŏ vaccine gang mkhư̆ Covid 19. Hlăm hruê kăm êgao, Dhar bruă gĭt gai Quốc hội bi mklă ba yua 12.000 êklai prăk mơ̆ng phŭn prăk mkiêt mkriêm thŭn 2020 čiăng blei vaccine gang mkhư̆ Covid 19. Ti lăn dap kngư, truh kơ ară anei, dŭm alŭ wăl ngă ruê̆ leh bruă tlŏ vaccine Covid 19 gưl 1, knŏng ti Gia Lai ruê̆ leh hdră tlŏ mgang gưl 2.

Tui hluê klei hưn mdah mơ̆ng knơ̆ng bruă mdrao mgŭn čar Kon Tum, truh kơ ară anei dưi bi leh klei tlŏ mgang vaccine klei ruă tưp Covid-19 gưl tal 1, mbĭt hŏng anăn lŏ mkŏ mjing lehanăn tui ngă dŭm hdră êlan mjêč hlăm bruă gang mkhư̆ klei ruă tưp. Kluôm ênŭm čar Kon Tum mâo giăm 11.000 čô mnuih mâo leh klei tlŏ mgang aruăt tal 1, mâo êbeh 83% ênoh mnuih srăng tlŏ mgang êlâo hĭn ti gưl anei. Dŭm čô anăn jing dŭm čô mă bruă hlăm dŭm anôk mdrao mgŭn lehanăn nao hlăm bruă gang mkhư̆ klei ruă tưp Covid-19. Êjai hlăm mmông tlŏ mgang, knơ̆ng bruă mdrao mgŭn čar Kon Tum brei thâo mâo 2 čô mâo êa drao ngă ti sang êa drao prŏng čar lehanăn sang êa drao ti kdriêk Ngọc Hồi. Ară anei 2 čô anei mâo leh klei hơĭt kơ klei suaih pral.

Ăt hlăm gưl tlŏ leh êgao, čar Dak Nông dưi mâo 9.000 hnơ̆ng vaccine Covid-19, leh kơ tŭ mă hnơ̆ng vaccine anei, knơ̆ng bruă mdrao mgŭn čar gĭt gai kơ dŭm anôk bruă čiăng čih anăn dŭm čô srăng tlŏ êlâo hĭn, mkŏ jing klei hriăm, mtô hlăm klei yua, djă pioh vaccine lehanăn mkŏ mjing bruă tlŏ mgang. Čiăng mâo klei tŭ dưn hlăm bruă tlŏ mgang, knơ̆ng bruă mdrao mgŭn čar Dak Nông ngă klei tlŏ mgang hlăm 8 bĭt anôk msĕ si: sang êa drao prŏng čar Kon Tum lehanăn 7 anôk bruă mdrao mgŭn hlăm dŭm kdriêk. Dŭm čô mâo klei tlŏ mgang tal êlâo hĭn jing: dŭm čô knuă druh, mnuih mă bruă mdrao mgŭn, dŭm čô hlăm êpul gĭt gai, dŭm čô ba anăp hlăm bruă gang mkhư̆ klei ruă tưp… tui hluê hră mtrŭn mrô 21 mơ̆ng knŭk kna. Hà Văn Hùng k’iăng khua gĭt gai knơ̆ng bruă mdrao mgŭn čar Dak Nông brei thâo, hlăm čar mâo êbeh 10.200 čô mnuih dưi tlŏ leh aruăt tal 1 vaccine gang mkhư̆ klei ruă tưp Covid-19. Leh tlŏ mâo 1.700 čô mnuih mâo klei êa drao ngă msĕ si: êngoh, bi ktal, ruă anôk tlŏ, ƀlĕ ô̆ lehanăn amâo mâo ôh klei bi kdơ̆ng kjham hŏng êa drao, ară anei dŭm čô leh tlŏ mâo klei hơĭt kjăp hlăm klei suaih pral. “Dhar bruă mdrao mgŭn hrăm mbĭt hŏng dŭm anôk bruă, knơ̆ng, dhar bruă srăng mkŏ mjing jăk. Hmei mprăp ênŭm leh dŭm mnơ̆ng dhơ̆ng yua, kdrăp masin, mnuih bruă bruă tlŏ mgang djŏ hŏng hdră bhiăn. Hlăm mmông tlŏ mgang mkăn hmei srăng ngă klei tlŏ mgang hlăm dŭm anôk mdrao mgŭn grăp să. Bi kơ bruă tlŏ vaccne Covid-19 srăng kñăm tlŏ hlăm dŭm sang êa drao prŏng hlăm čar lehanăn kdriêk. Kyuadah vaccine Covid-19 jing mrâo, sơnăn hmei dlăng kơ klei êđăp ênang jing klưn hĭn, kyuanăn tơdah leh tlŏ mâo klei êa drao ngă, anôk bruă mdao mgŭn mâo ênŭm leh mnơ̆ng dhơ̆ng mgaih msir rơ̆ng mâo klei êđăp ênang kơ mnuih leh tlŏ.”

Hdră tlŏ mgang vaccine Covid-19 gưl anei, čar Dak Lak dưi mâo 17.050 hnơ̆ng vaccine čiăng tlŏ mgang kơ 3 êpul mnuih jing dŭm čô mă bruă hlăm dŭm anôk mdrao mgŭn, dŭm čô mnuih nao hgŭm hlăm bruă gang mkhư̆ klei ruă tưp lehanăn êpul răng mgang klei êđăp ênang. Hruê tlŏ mgang mơ̆ng hruê 24/4 truh 05/05/2021. Čiăng dưi truh klei knăm 95% dŭm čô mnuih anăn dưi mâo klei tlŏ mgang, čar Dak lak ba yua kdrăp tlŏ mgang mâo leh mơ̆ng êlâo lehanăn lŏ thiăm 2 klei bi hmô bruă tlŏ mgang êđăp ênang ti sang êa drao prŏng krĭng Lăn Dap Kngư lehanăn sang êa drao ƀuôn prŏng Ƀuôn Ama Thuôt. Hlăm klei čiăng mjêč, knơ̆ng bruă mdrao mgŭn srăng iêu mthưr kơ dŭm anôk tlŏ mgang lehanăn dŭm anôk bruă mdrao mgŭn mâo ênŭm klei găl srăng hgŭm mbĭt bruă anei.

Čiăng rơ̆ng kơ klei êđăp ênang lehanăn boh tŭ dưn hlăm bruă tlŏ mgang vaccine gang mkhư̆ klei ruă tưp Covid-19, knơ̆ng bruă mdrao mgŭn čar Dak Lak mkŏ mjing klei mtô hriăm kơ dŭm čô gĭt gai, knuă druh, mnuih mă bruă tlŏ mgang hlăm dŭm klei čih kơ vaccine, si ngă srăng yua vaccine, ksiêm mkă êlâo kơ tlŏ, mtô kơ bruă đru dŏng tơdah mâo klei êa drao ngă leh tlŏ vaccine Covid-19. Aê mdrao Trịnh Hồng Nhựt, khua êpul Aê mdao hlăm anôk bruă đru dŏng ai ktang mnuih lehanăn gang mnkư̆ mnơ̆ng dhơ̆ng jhat kơ asei mlei ti sang êa drao krĭng Lăn Dap Kngư mtă: “Êjai tlŏ vaccine čiăng ksiêm dlăng dŭm klei bi knăl: bi kơ mnuih ƀuôn sang čiăng hmao ƀuh klei êa drao ngă grăp mnĭt mmông. Anăn jing leh tlŏ vaccine srăng mâo klei knăl êngao klĭt amâo ruă tian lehanăn blĕ ô̆, ƀuh dleh bi êwa amâo dah amâo klei amâo jăk, srăng nao kơ dŭm anôk mdrao mgŭn. Bi kơ dŭm čô mă bruă mdrao mgŭn ăt ksiêm dlăng kơ jih jang mnơ̆ng dhơ̆ng yua, êa drao gŭn mprăp čiăng mgaih msir dŭm klei êa drao ngă, hmao ƀuh hnưm lehanăn mdrao djăl čiăng dưi ba klei tŭ dưn kơ gưl tlŏ mgang anei.”

Bi kơ čar Gia Lai, alŭ wăl tal êlâo jing anôk klei ruă tưp Covid-19 ti krĭng Lăn Dap Kngư, kyuanăn dưi bi leh klei tlŏ mgang gưl tal 2 ti kŏ mlan 5. Gưl anei, čar Gia dưi mâo 16.560 hnơ̆ng vaccine. Phung mâo klei tlŏ mgang tal êlâo hĭn jing dŭm čô ba anăp hlăm bruă gang mkhư̆ klei ruă tưp, dŭm čô mă bruă hlăm dŭm anôk mdrao mgŭn, dŭm čô mnuih hlăm êpul gĭt gai bruă gang mkhư̆ klei ruă tưp Covid-19 gưl kdiêk, să, mnuih mă bruă hlăm dŭm anôk bi ktlah, ngă bruă tui duah, ksiêm mkă kman, êpul êya Covid-19 hlăm yang ƀuôn, êpul lĭng kahan knông lăn, kahan ksiêm, mnuih mă bruă êdeh phiơr, phung čih klei mrâo, mnuih mă bruă anôk mđung asăp blŭ. Êngao kơnăn, 1.883 čô mnuih dưi tlŏ leh aruăt tal 1 hlăm gưl anei lehanăn srăng lŏ tlŏ aruăt tal 2 leh ênŭm 4 hruê kăm.

Sa ai hŏng klei iêu mthưr mơ̆ng khua knŭk kna kơ bruă hnưm tlŏ vaccine Covid-19 kơ mnuih ƀuôn sang ăt msĕ hŏng bruă hrăm mbĭt bi mlih yang ƀuôn, dhar bruă ngăn prăk mâo leh klei đru mguôp prŏng truh kơ dŭm êtuh êklai prăk. 4 knơ̆ng bruă ngăn prăk mnia blei jing Vietcombank, Vietinbank, BIDV lehanăn Agribank hlăm sa knơ̆ng bruă đru mguôp 25 êklai prăk čiăng blei vaccine. Boh nik mrâo anei, khua Quốc Hội Vương Đình Huệ bi klă leh hdră mtrŭn mơ̆ng dhar bruă gĭt gai Quốc Hội kơ bruă srăng yua prăk mkiêt mkriêm lehanăn dŭm prăk adôk mơ̆ng thŭn 2020. Tui hluê anăn dhar bruă gĭt gai Quốc Hội bi mklă srăng yua 12.100 êklei prăk mơ̆ng prăk mkiêt thŭn 2020 blei vaccine gang mkhư̆ klei ruă tưp Covid-19. Dhar bruă gĭt gai Quốc Hội jao kơ dŭm phŭn, anôk bruă gưl dlông lehanăn alŭ wăl srăng ngă hmar hlăm bruă blei vaccine gang mkhư̆ klei ruă tưp Covid-19, rơ̆ng srăng mâo klei tŭ dưn, êđăp ênang kơ mnuih ƀuôn sang lehanăn kluôm yang ƀuôn.