VOV4.Êđê - Ară anei păt čiăng jih alŭ wăl hlăm krĭng Dap mnai êa krông Cưủ Long čih mkra leh hdră kčah tlŏ vaccine kơ phung hđeh gưl tlâo. Hlăm hdră pŏk ngă, dŭm čar mđing kơ bruă ksiêm mkă dlăng êlâo, rơ̆ng kjăp klei êđăp ênang kơ mnuih nao tlŏ. Mphŭn mơ̆ng hruê 3/11, Kiên Giang tlŏ leh vaccine kơ êbeh 13.300 čô hđeh adŭ 12 hlăm alŭ wăl čar. Phung hđeh adŭ 12 srăng dưi tlŏ hlăm 1 hruê lehanăn srăng tlŏ jih phung hđeh adôk hlăm hruê êdei anăn ti sang hră hđeh hriăm amâo dah anôk bruă mdrao mgŭn gưl kdriêk, să, ƀuôn hgŭm. Ti čar Hậu Giang, hluê si hdră kčah mơ̆ng Anôk bruă sang čư̆ êa čar mơ̆ng hruê 4 truh kơ hruê 6/11 ti anăp, alŭ wăl srăng mkŏ mjing hdră tlŏ vaccine gang mkhư̆ Covid 19 kơ phung hđeh mơ̆ng 12 truh kơ gŭ 18 thŭn hŏng vaccine Pfizer hluê si klei kčah mtrŭn mơ̆ng Phŭn bruă mdrao mgŭn./.

H Nêč pô mblang