VOV4.Êđê- Hlăm wưng êgao, ƀri knăm 30/4 lehanăn 1/5 mrâo anei, gru hmô tui ksiêm kơ knhuah dhar kreh mơ̆ng dŭm djuê ƀiă tinei mtam mbĭt hŏng dŭm hdră jăk siam, mrâo mrang jak iêu leh lu phung tuê hiu čhưn ênguê. Ti Dak Lak, gru hmô anei dôk bi êdah hdră êlan djŏ ba wĭt boh tŭ dưn kơ êpul êya mnuih djuê ƀiă ngă bruă hiu čhưn ênguê ti krĭng ƀuôn sang pô.

Dŭm bruă ngă hiu dlăng dhar kreh dŭm djuê ana ti ƀuôn prŏng Ƀuôn Ama Thuôt ƀri gưl mdei thŭn anei mâo: Rang mdah kdrăp tông ayŭ djuê ana, bruă djuê ana; bi lông ênhiang mmuiñ djuê ana Lăn Dap Kngư, lông mnăm kpiê čeh, mnơ̆ng ƀơ̆ng djuê ana leh anăn dŭm klei bhiăn djuê ana Êđê.

Mdah klei kdŏ mmuiñ ênhiang djuê ana leh anăn kdrăp tông ayŭ djuê ana

Ayŏng Lê Ngọc Tân, tuê hriê mơ̆ng ƀuôn prŏng Hà Nội, nao hlăm knăm hơêč hmưi klei suaih pral djuê ana Êđê ti ƀuôn Tơ̆ng Jŭ, să Ea Kao, brei thâo:

 Gưl tal êlâo kao nao hlăm knăm ngă yang asei ƀuh mơak snăk leh anăn dưi ƀuh Têt djuê ana tinei yuôm bhăn snăk. Mâo lu mta mdê hĭn mơ̆ng kdrăp djuê ana tinei, mơ̆ng phung êkei truh phung mniê amâodah kdrăp čing čhar, tông ayŭ khăng mâo hdră dăp, mâo anôk rang mdah mdê snăk hŏng ƀuôn prŏng phŭn Hà Nội amâodah djuê ana Yuăn. Mâo lu klei tal sa, ƀiădah ăt čang hmăng mâo lu gưl dưi lŏ hriê tinei čiăng nao hlăm sa knăm mơak mnuih djuê ƀiă hnưm hĭn leh anăn dưi nao hlăm knăm anei kluôm ênŭm hĭn.”

Mnăm kpiê čeh

 H’Yam Buôn Krông, Khua Êpul hiu čhưn ênguê êpul êya ƀuôn kač rup Tơ̆ng Jŭ, să Ea Kao brei thâo, hŏng klei lŏ wĭt mkŏ mjing knăm ngă yang asei djuê ana, hlăm gưl mdei thŭn anei, ti wăl hiu čhưn ênguê êpul êya ƀuôn kač rup Tơ̆ng Jŭ lŏ mkŏ mjing klei bi lông tŭk knă kơ phung mniê hlăm să Ea Kao. Phung amai adei hlăm grăp alŭ, ƀuôn mkŏ mjing sa êpul, mprăp hlao êsei hŏng dŭm mta mnơ̆ng ƀơ̆ng djuê ana pô. Hŏng pô bi ala phung mniê, phung tuê hriê čhưn dlăng ti wăl hiu čhưn ênguê anei srăng ƀơ̆ng leh anăn brei puăng mnơ̆ng ƀơ̆ng mơ̆ng dŭm êpul. Anei jing bruă ngă kñăm mđĭ kyar hiu čhưn ênguê êpul êya ti alŭ wăl.

 Ăt mâo lu êpul tuê mơ̆ng dŭm čar ăt hriê tinei ƀơ̆ng mnơ̆ng ƀơ̆ng djuê ana leh anăn dlăng tông čing, hiu dlăng dhar kreh djuê ana. Hmei ăt mbha grăp čô sa bruă, si tôhmô mâo sang pla djam, sang rông ŭn, rông mnŭ, đa sang knă kpiê čeh.”

Rang mdah bruă hrĭ mñam leh anăn mkra mjing kdrăp tông ayŭ

 Ti dŭm anôk mkăn msĕ si Sang kriê pioh mnơ̆ng dhơ̆ng Dak Lak, ƀuôn akŏ Dhông, phung tuê dưi hiu dlăng bruă hrĭ mñam, mkra kdrăp tông ayŭ hŏng mơô leh anăn mnăm kpiê čeh mnuih Êđê. Ayŏng Hảng A Chu, djuê ana Mông, ti kdriêk Dak Glong, čar Dak Nông nao hlăm klei lông mnăm kpiê čeh đưm êtuh thŭn brei thâo:

Klei bhiăn hdĭp mda mnuih ƀuôn sang tinei mdê snăk hŏng djuê ana pô leh anăn pô ăt ƀrư̆ thâo lu mta, lu klei hĭn. Klă klơ̆ng kơ kpiê čeh, ñu mdê hŏng djuê ana pô, amâodah msĕ si mnơ̆ng ƀơ̆ng huă snăn ăt mdê mơh. Mâo dŭm mta kâo hriê tinei snăn ăt dưi hriăm lu mta mơh.

 Leh sa wưng sui hmaĭ mơ̆ng Covid-19, dŭm anôk hiu čhưn ênguê êpul êya ti ƀuôn prŏng Ƀuôn Ama Thuôt lŏ wĭt pŏk ƀăng hŏng lu bruă ngă. Hlăm anăn, hiu čhưn ênguê dhar kreh dŭm djuê ana tinăn mtam jing klei mdê hjăn mơ̆ng ƀuôn prŏng, dưi mkra mrâo, bi êlam hĭn leh sa thŭn, čiăng grăp blư̆ hriê tinei, phung tuê lŏ mâo thiăm klei hiu dlăng jăk mơak. Leh anăn mnuih ƀuôn sang ktưn hưn kriê pioh knhuah dhar kreh djuê ana pô hưn mthâo hŏng phung tuê klei jăk siam ƀuôn sang./.

                                               Pô mblang: H’Zawut Ƀuôn Yă