VOV4.Êđê- Đăk Bu So jing să knông lăn ti kdriêk Tuy Đức, sa hlăm 2 kdriêk ƀun hĭn čar Dak Nông dưi dưn hdră 30a mơ̆ng Knŭk kna. Ară anei mnuih ƀuôn sang dŭm djuê ana ti krĭng knông lăn anei dôk hrăm mbĭt sa ai tiê mđĭ kyar bruă duh mkra ala ƀuôn, gĭr ktưn čiăng kơ Đăk Bu So jing să tal êlâo mơ̆ng kdriêk truh hdră kñăm krĭng ƀuôn sang mrâo.

Hlăm sa boh sang jăk siam, khua mduôn Điểu Gay, ti Bon Bu Ndrung, să Dak Buso, kdriêk Tuy Đức hŏng klei mhač jum tue. Jing mnuih ba akŏ hlăm bruă duh ƀơ̆ng ti krĭng knông lăn, ñu yăl dliê, ară anei thŭn leh khua, amâo lŏ mâo ai tiê nao kơ hma ôh, snăn ñu mbha jih lăn hma anăn kơ phung anak, kah knar kơ grăp čô 2 ha. Ară anei ñu lŏ dơ̆ng bi mguôp hŏng bruă sang čư̆ êa, dŭm dhar bruă êpul êya čiăng hâo hưn mtrŭt phung ƀuôn sang amâo duah hmư̆ ôh klei phung mplư bi čhĭ lăn ala, ƀiădah gĭr tui hriăm hdră pla kphê, tiu bi mboh, gĭr duh ƀơ̆ng čiăng tlaih mơ̆ng klei knap mñai.

Boh sĭt hlăm klei hdĭp phung ƀuôn sang mnuih djuê ana Mnông ti Bon Bu Ndrung anei adôk lu klei dleh dlan snăk, phung ƀuôn sang kƀah klei thâo săng, duah ƀơ̆ng dleh dlan mơh. Tui si kâo mĭn jih jang phung ayŏng adei Mnông ti Bu Ndrung, Bu Boong hmei anei mâo msĕ sơăi klei mĭn, dơ̆ng mơ̆ng knuă druh hlŏng truh kơ jih djăp gưl, bi sa ai mtrŭt phung ƀuôn sang, bi tơdah knŏng lui kơ sa čô hjăn khua mduôn amâo mâo dưi ôh. Mtrŭt phung ƀuôn sang nao mđrĭng hŏng bruă ngă, leh phung ƀuôn sang ƀuh kơh diñu tui srăng mâo klei tŭ dưn.

Bon Bu Ndrung, să Đăk Bu So

Tui si Điểu Lim, Khua Bon Bu Boong, klei dleh dlan hŏng phung ƀuôn sang jing hlăm klei duah ƀơ̆ng, msĕ si bruă pla kphê, pla tiu dôk lĕ hlăm klei bi mnia mblei amâo mâo hơĭt. Khă snăn, mâo klei knŭk kna đru lehanăn klei jih jang phung ƀuôn sang bi sa ai, snăn bruă nah gŭ ti knông lăn dưi bi leh, klei hdĭp mda phung ƀuôn sang Mnông kơ anei dơ̆ng bi mlih:

Bruă mkra êlan klông hlăm krĭng ƀuôn sang, bruă msir klei ư̆ êpa bi hrŏ klei ƀun knap kơ phung ƀuôn sang jing sa hlăm dŭm mta kñăm kơ bruă mkŏ mkra krĭng ƀuôn sang mrâo, mơ̆ng đru mđĭ klei hdĭp mda phung ƀuôn sang. Čiăng dưi bi leh mta kñăm, snăn phung ƀuôn sang brei thâo bi mguôp, thâo bi đru hdơ̆ng găp hlăm klei hdĭp mda, mơ̆ng bruă mkra êlan, hlŏng truh kơ klei ngă lŏ hma, pla tiu, pla kphê, bi đru gŏ sang ƀun ƀin dleh dlan mkăn...

Klei êdah êdi hlăm bruă mkŏ mkra krĭng ƀuôn sang mrâo ti Dak Buso jing phung ƀuôn sang dơ̆ng thâo dưn yua ƀrư̆ ƀrư̆ klei găl pô mâo msĕ si knhuah gru dhar kreh djuê ana pô, čiăng pŏk êlan kơ klei duh ƀơ̆ng, ngă bruă hiu čhưn ênguê. Aduôn Phạm Thị Dung, Khua Bon Bu Ndrung, brei thâo, Bon mâo mkŏ mjing leh êpul hgŭm bruă dhar kreh djuê ana pô, amâo mâo djŏ knŏng dưi mghaih msir bruă knuă ti mmông dôk mang đuič ôh, ƀiădah bruă anei dưi đru leh kơ phung ƀuôn sang mâo prăk kăk mơh:

Hlăm dŭm thŭn êgao hmei ăt dôk krơ̆ng nanao êpul tông čing, lehanăn mkŏ mjing êpul knă kpiê čeh, mjing bruă knuă mă kơ phung amai adei hlăm Bon, lehanăn kơ phung mduôn khua thâo hrĭ mñam bŭn bai, ê i knguôr, bi phung amĭ phung aduôn bi kprư̆ mñam mnơ̆k msa. Gĭr bi kriê pioh knhuah gru dhar kreh djuê ana Mnông.

Đak Bu So dôk gĭr ktưn jing să krĭng ƀuôn sang mrâo bi hmô ti kdriêk Tuy Đức

Ngô Văn Thương, Khua knơ̆ng bruă sang čư̆ êa să Dak Buso jing jai brei thâo, truh kơ ară anei să mâo leh 16/19 ênoh čuăn krĭng ƀuôn sang mrâo. Klei hdĭp mda phung ƀuôn sang knư̆ hrue knư̆ mâo mđĭ kyar, ênoh mâo ba wĭt kah knar hlăm thŭn 2021 truh 40 êklăk prăk/čô mnuih. Anei jing boh mơ̆ng bruă hlue ngă hdră êlan ala čar kñăm, mđing duh bi liê kơ dŭm boh ƀuôn mnuih djuê ƀiă, đru kơ phung ƀuôn sang duh ƀơ̆ng thâo hĭn, tă brei êlan kơ Dak Buso ktưn čiăng dưi jing să tal êlâo ti krĭng knông lăn Tuy Đức truh kơ anôk kčah hlăm bruă mkŏ mkra krĭng ƀuôn sang mrâo, hlăm 3 thŭn kơ anăp.

Să mâo 2 boh bon lehanăn sa boh alŭ dôk hlăm klei dleh dlan hĭn êdi. Hlăm bruă čiăng bi hrŏ ƀun, snăn mbĭt hŏng bruă hâo hưn kčĕ mtô phung ƀuôn sang, snăn ai ktang mơ̆ng knŭk kna mâo dŭm hdră êlan dưi ba hriê duh leh tal êlâo kơ dŭm boh bon anei čiăng kơ phung ƀuôn sang mđĭ kyar klei hdĭp mda. Tal êlâo jing, mjuăt bi hriăm hdră duh ƀơ̆ng, tal dua duh bi liê kơ bruă nah gŭ, tal 3 mkŏ mjing dŭm bruă bi hmô kơ klei duh ƀơ̆ng čiăng lŏ pŏk bi lar, mđĭ klei thâo săng, mâo bruă đua klam, lehanăn ƀrư̆ ƀrư̆ mđĭ klei hdĭp mda phung ƀuôn sang, boh nik ti dŭm boh ƀon jing anôk bi hmô kơ bruă bi hrŏ ƀun hlăm kdriêk.

Đăo knang kơ klei duh bi liê mâo mta kñăm mơ̆ng knŭk kna, lehanăn klei gĭr jih ai tiê mơ̆ng phung ƀuôn sang djăp djuê ana, să Dak Buso srăng pral djăp 19 ênoh čuăn mkŏ mkra krĭng ƀuôn sang mrâo, jing să tal êlâo mơ̆ng kdriêk Tuy Đức djăp ênoh čuăn krĭng ƀuôn sang mrâo./.

Pô mblang: Y-Khem Niê