VOV4.Êđê- Bruă êlan klông ăt jing bruă phŭn čiăng mđĭ kyar hdră duh mkra – ala ƀuôn krĭng ƀuôn sang. Khă snăn, ti kdriêk Čư̆ Mgar, čar Dak Lak, mnuih ƀuôn sang ăl čôñ êdi hlăk Êlan dơ̆ng prŏng čar mrô 8, kdrêč găn să Êa Kpam mrâo duh bi liê mkra mđĭ ƀiădah jhat rai leh, ngă luič klei êđăp ênang êlan klông. Mbĭt anăn, bruă mkra ăt mâo lu klei dleh kpăk, ngă kơ ktuê êlan anei ba lu klei huĭ hyưt kơ mnuih găn êrô.

Êlan dơ̆ng mrô 8 găn ti să Ea Kpam, kdriêk Čư̆ Mgar hlăm lu thŭn dôk hlăk klei jhat rai, găn êrô dleh dlan êdi. Thŭn 2021, êlan dơ̆ng anei mâo knơ̆ng bruă êlan klông leh anăn dŭ mdiăng čar Dak Lak bi klă hdră mkra wĭt. Leh truh kơ knhal jih thŭn dưi mkra bi leh. Klei hơ̆k mơak sa sui ôh, mnuih ƀuôn sang tinei amâo mâo tŭ ư kyua êlan mrâo mkra jhat rai leh, mâo lu ƀăng ƀlŭng. Sa čô mnuih ƀuôn sang ti alŭ 1, să Ea Kpam brei thâo, êlan anei hlŏng jhat rai leh mrâo mkra leh anăn mâo lu klei huĭ hyưt mâo klei truh hlăm êlan klông, boh nik jing mmăt mlam.

         “Dleh kpăk êdi, knŏng mrâo mkra bhiâo riâo rĭt, mkra ti anăp hluh ti tluôn, ară anei ƀăng hluh mơai, msir anôk anei lŏ hluh anôk dih. Mmăt hruê mdih mâo mnuih amâo mâo yŏng dlăng tuôm hŏng băng ƀlung leh anăn lĕ kơ êdeh. Sitôhmô ară anei dah tăp lĕ hlăm ƀăng hluh knŏng djiê đuč yơh, si thâo lŏ hdĭp.”

Hlăm ktuê êlan mâo lu kdrêč  jhat leh, ba klei huĭ hyưt kơ phung găn êrô

Nguyễn Hữu Chung, k’iăng khua bruă sang čư êa čar Ea Kpam brei thâo, êlan dơ̆ng mrô 8 mrâo duh bi liê ƀiădah jhat rai leh ngă kơ mnuih ƀuôn sang hlăm alŭ wăl amâo mâo tŭ ư. Lu klei truh hlăm êlan klông hlăm mlam mmăt kyua mnuih ƀuôn sang đĭ êdeh amâo mâo yŏng ƀuh ƀăng hluh. Mnuih ƀuôn sang mâo leh lu blư̆ hưn mdah hŏng dŭm gưl mâo klei dưi, boh nik hlăm dŭm klei bi tuôm hŏng phung bi ala bruă kƀĭn ala leh anăn Êpul gơ̆ng bruă ƀuôn sang dŭm gưl. Ƀiădah truh kơ ară anei êlan anei ka dưi wĭt mkra mơh, ngă kơ klei êrô êbat mơ̆ng mnuih ƀuôn sang mâo lu klei huĭ hyưt tuôm hŏng klei truh hlăm êlan klông.

         “Êlan jhat rai ngă leh kơ lu mnuih mâo klei truh hlăm êlan klông. Jăk ƀiă msĕ hŏng êlâo ñu jhat rai jih, mnuih ƀuôn sang găn êrô dôk mâo klei răng. Tinei hlei mưng găn đuč thâo, tơdah ƀăng hluh prŏng hlŏng jăk ƀiă, msĕ tinei hluh điêt điêt ƀiădah êlam, tơdah amâo mâo mưng găn, tăp lĕ ƀăng blŭng hlŏng lĕ mtam yơh.

Mnuih ƀuôn sang Ea Kpam amâo tŭ ư ôh leh êlan dơ̆ng dưi duh bi liê ƀiădag jhat rai leh

            Hdră wĭt mkra êlan dơ̆ng mrô 8, kdrêč êlan Km12+300 truh kơ Km14+950 hŏng boh taih êbeh 2,4km mâo knơ̆ng bruă êlan klông leh anăn dŭ mdiăng čar Dak Lak bi klă mkra wĭt hlăk mlan 4 thŭn 2021 hŏng kluôm ênoh 9 êklai prăk. anôk bruă đru kčĕ mkra mjing jing knơ̆ng bruă tuh tia mnia mblei duh bi liê APP Việt Nam, bi kơ pô ngă bruă jing knơ̆ng bruă tuh tia mnia mblei Nam Sơn.

            Djŏ tuôm hŏng klei êlan dơ̆ng mrô 8 jhat rai, ti hruê kăm knhal krah mlan 7, bruă sang čư êa kdriêk Čư̆ Mgar ăt mâo leh hră mơĭt kơ knơ̆ng bruă êlan klông leh anăn dŭ mdiăng čar Dak Lak brei mgaih msir dŭm klei dôk mâo. Hluê si bruă sang čư êa kdriêk Čư̆ Mgar, ti êlan gŭ drŏng mâo lu ƀăng hluh, êlan jhat rai. Mbĭt anăn, bruă duh bi liê kơ êlan mđuê̆ êa kam hrăm mbĭt ngă kơ êa amâo amâo dưi đuê̆ ôh, dlai hlăm êlan, mŭt hlăm sang mnuih ƀuôn sang, ngă čhŏ djhan wăl hdĭp mda, ênưih mâo klei truh hlăm êlan klông.

Pô mblang: Y-Ƀel Êban