VOV4.Êđê- Anôk kriê dlăng bruă Đảng čar Dak Lak mrâo mkŏ mjing Klei bi kƀĭn ksiêm wĭt 10 thŭn hluê ngă hdră mtrŭn 03 lehanăn pŏk ngă Hdră mtrŭn mrô 08 mơ̆ng bruă Đảng čar kơ bruă mkŏ mkra krĭng ƀuôn sang mrâo. Hlăm 10 thŭn hŏng klei hgŭm mơ̆ng anôk bruă kđi čar mơ̆ng čar truh kơ nah gŭ, boh nik klei sa ai mơ̆ng mnuih ƀuôn sang hlăm čar, Dak Lak mâo leh dŭm boh tŭ dưn yuôm hlăm hdră mkŏ mkra krĭng ƀuôn sang.

Dak Lak gĭr truh ti thŭn 2025 mâo êbeh 65% ênoh să djăp hnơ̆ng čuăn mkŏ mkra krĭng ƀuôn sang mrâo, mâo 4/15 êpul êya gưl kdriêk djăp hnơ̆ng čuăn krĭng ƀuôn sang mrâo, hlăm anăn, mâo mơ̆ng 1 truh kơ 2 êpul êya gưl kdriêk djăp hnơ̆ng čuăn krĭng ƀuôn sang mrâo kdlưn hĭn, hnư hrui wĭt kah knar grăp čô krĭng ƀuôn sang đĭ 1,3 blư̆ mkă hŏng thŭn 2020, mâo 200 mta mnơ̆ng OCOP dưi mkăp hră tŭ yap mơ̆ng 3 mtŭ kơ dlông. Dưi mâo mta kñăm anei, bruă Đảng čar Dak Lak akâo kơ dŭm gưl bruă Đảng ksiêm dlăng hdră mđĭ kyar bruă lŏ hma, krĭng ƀuôn sang, ƀĭng ngă lŏ hma jing bruă mđing tal êlâo mơ̆ng anôk bruă kđi čar lehanăn klei đua klam mơ̆ng kluôm yang ƀuôn, mđĭ hĭn klei thâo săng, mlih mrâo klei mĭn mđĭ kyar bruă lŏ hma, krĭng ƀuôn sang, mnuih ƀuôn sang hlăm hdră mkŏ mkra krĭng ƀuôn sang mrâo./.

Pô mblang: H’Nêč Êñuôl