VOV4.Êđê- Hdră grăp să sa mnơ̆ng dhơ̆ng (pia klah čŭn jing OCOP) ti čar Dak Lak dôk mâo klei đĭ kyar ktang. Ƀrư̆ hruê ƀrư̆ mâo lu mnơ̆ng dhơ̆ng OCOP mâo klei tŭ yap mơ̆ng 3 – 4 mtŭ. Bruă anei pŏk klei găl dưi mđĭ kyar mnơ̆ng dhơ̆ng boh mnga bruă lŏ hma alŭ wăl, mđĭ kyar bruă duh mkra alŭ wăl krĭng ƀuôn sang hluê êlan mđĭ ênoh boh mnga bruă lŏ hma.

Jing êpul êya mâo mta mnơ̆ng mơ̆ng boh makka djăp hnơ̆ng čuăn tŭ yap mta mnơ̆ng OCOP 4 mtŭ gưl čar, Anôk bruă Damaca Nguyên Phương ti să Phú Lộc, kdriêk Krông H’Nang dôk bi mlih hdră ngă bruă, ba yua kdrăp mrâo mrang, mđĭ hnơ̆ng tŭ jăk čiăng nao hgŭm hlăm bruă bi mklă mta mnơ̆ng OCOP gưl ala čar. Phạm Đình Nhân, khua adŭ bruă Maketing anôk bruă Damaca Nguyên Phương brei thâo: Leh mta mnơ̆ng dưi tŭ yap lehanăn ba yua anăn knăl OCOP mjing leh klei đăo knang hŏng mnuih blei yua, mnơ̆ng anei mŭt hlăm dŭm anôk siêu thị, anôk mkăp ênưih hĭn. Ênoh mnơ̆ng dhơ̆ng čhĭ ƀrư̆ hruê ƀrư̆ đĭ. Knŏng hlăm thŭn 2021, khădah hmăi mơ̆ng klei ruă Covid 19 ƀiădah anôk bruă dưi ba čhĭ leh hlăm brô 70 ton makka kơ wăl anôk mnia mblei.

“ Leh mâo djăp hnơ̆ng čuăn OCOP 4 mtŭ, anôk bruă amâo mdei mkra mđĭ hnơ̆ng tŭ jăk mnơ̆ng dhơ̆ng, hruh đŭng bi mlih kluôm dhuôm čiăng djŏ guôp hŏng hnơ̆ng čuăn mơ̆ng OCOP. Êngao anăn, hmei lŏ mkra mjing anôk mkra mđĭ hnơ̆ng mâo boh mnga bruă pla mjing čiăng nao hgŭm bi mklă OCOP 5 mtŭ gưl ala čar mđing truh kơ klei kuôl kă blei mnơ̆ng hlăm ala čar lehanăn ba čhĭ kơ ala tač êngao”.

Mă asăr mak ka

        Ƀuh klă boh tŭ mơ̆ng Hdră bruă grăp să sa mta mnơ̆ng dhơ̆ng amâo djŏ hlei pô mkăn ôh jing ƀĭng ngă lŏ hma – pô phŭn nao hlăm hdră anei. Drei dưi bi mklă nik anăn jing mta braih doh HTB mơ̆ng êpul hgŭm bruă lŏ hma kluôm Thăng Bình, să Čư̆ Kty, kdriêk Krông Bông. Mơ̆ng leh dưi tŭ yap jing mnơ̆ng OCOP 3 mtŭ, ênoh braih anei đĭ leh 2 blư̆ mkă hŏng êlâo, hnơ̆ng blei ăt đĭ mơ̆ng 200 truh 400 ton/thŭn, ba wĭt boh tŭ dưn kơ êpul hgŭm bruă ăt msĕ mơh mnuih hgŭm. Võ Văn Sơn, khua êpul hgŭm bruă lŏ hma kluôm Thăng Bình brei thâo:

“ Êlâo adih mta mnơ̆ng pô ka mâo wăl anôk mnia mblei mđing lu, bi ară anei dưi bi mklă OCOP snăn klă sĭt boh tŭ yuôm dưi mđĭ mlih lu hĭn, k’hưm dưi mđĭ mơh, mnơ̆ng dhơ̆ng ƀĭng ngă lŏ hma mâo klei găl dưi ba čhĭ lu hĭn, h’ĭt kjăp hĭn mơh. Kơ anôk mnia mblei hlăm čar wăt êngao čar”.

Anôk mkra mjing mak ka mơ̆ng Knơ̆ng bruă Damaca Nguyên Phương hlăm êpul hgŭm bruă lŏ hma Thăng Bình ksiêm dlăng kdrăn lŏ êlâo hrui wiă

       Hluê si Knơ̆ng bruă Lŏ hma mđĭ kyar krĭng ƀuôn sang čar Dak Lak, truh kơ ară anei, kluôm čar mâo leh 72 mta mnơ̆ng dưi bi mklă OCOP gưl čar. Hlăm anăn mâo 8 mta mnơ̆ng 4 mtŭ, lu jing kphê, cacao, makka. Dŭm mta mnơ̆ng anei dôk dưi duh bi liê mkra mđĭ hnơ̆ng tŭ jăk hluê hdră mđing truh hnơ̆ng čuăn 5 mtŭ gưl ala čar, mđĭ klei găl ba čhĭ kơ ala tač êngao. Dương Tín Đức, khua dŭ bruă kriê dlăng hdră mkŏ mkra krĭng ƀuôn sang mrâo čar Dak Lak brei thâo:

“ Hmei srăng gĭr ktưn hĭn mbĭt hŏng klei đru mơ̆ng knŭk kna srăng mkra mđĭ mnơ̆ng dhơ̆ng mơ̆ng 3 truh kơ 4 mtŭ, leh kơnăn mơ̆ng 4 truh kơ 5 mtŭ si srăng ngă čiăng dưi mâo dŭm hnơ̆ng čuăn klă sĭt, mơ̆ng anăn srăng bi hgŭm hŏng dŭm mta mnơ̆ng ti djăp krĭng kwar, boh nik mtrŭt mđĭ bruă mnia mblei. Tơdah mta mnơ̆ng 3 mtŭ snăn dŭm siêu thị, anôk čhĭ mnơ̆ng mkăn srăng tŭ ư, 4 mtŭ dưi nao ba chĭ hlăm kluôm ala lehanăn 5 mtŭ dưi nao ƀiă êdi 45 ala čar tơdah nao hgŭm hlăm hdră OCOP anei”.

        Hŏng dŭm klei găl mâo kơ dŭm mta mnơ̆ng lŏ hma, mnơ̆ng mkra mơ̆ng kiê kngan, čar Dak Lak dôk pŏk ngă tŭ jing hdră bruă OCOP kñăm mđĭ kyar bruă duh mkra krĭng ƀuôn sang, lŏ mkŏ dăp bruă duh mkra ngă lŏ hma, hluê ngă tŭ dưn mta kñăm mkŏ mkra krĭng ƀuôn sang mrâo, mđĭ mlih klei hdĭp mnuih ƀuôn sang./.

                                                    Pô mblang: H’Nêč Êñuôl