VOV4.Êđê- Leh sa wưng sui mjưh mdei ngă bruă kyua hmaĭ mơ̆ng klei ruă Covid-19, ară anei dŭm anôk bruă duh mkra hiu čhưn ênguê ti Dak Lak pŏk ƀăng čiăng grăp knhuang kơrŭ wĭt bruă ngă. Hŏng klei mkra mđĭ mnơ̆ng dhơ̆ng ară anei mâo leh, lu anôk bruă dôk duah hdră mđĭ kyar thiăm dŭm mta mnơ̆ng dhơ̆ng mrâo kñăm mđĭ bruă hiu čhưn ênguê ti alŭ wăl.

Leh giăm 8 mlan mdei hĕ êjai jih jang bruă kyua klei ruă tưp, dơ̆ng mơ̆ng wưng tết nguyên đán truh kơ ară anei, alŭ wăl hiu čhưn ênguê lăn mnga êa siam lehanăn yang ƀuôn Akŏ Tam, ti Ƀuôn Ama Thuôt, čar Daklak lŏ wĭt pŏk ƀăng leh pioh drông tue. Êlâo anăn, khădah mdei leh êbeh 8 mlan amâo lŏ drông ôh tue hriê čhưn, ƀiădah ăt tla mơh prăk mlan kơ 20 čô mnuih ngă bruă dlăng kriê mjut mjing mnga, ana kyâo bi msiam, phung gak răng, lŏ dơ̆ng bi hriăm mbŏ mnuih ngă bruăư kơ dŭm homestay.

Jih wưng mdei ngă bruă, dŭm anôk bruă ngă bruă hiu čhưn ênguê ăt gĭr hriăm, mđĭ mnơ̆ng dhơ̆ng hiu čhưn  ênguê

Mơ̆ng leh lŏ wĭt pŏk ƀăng drông tue, pŏk nga dŭm tuôr hiu čhưn ênguê tui si phung tue akâo. Lehanăn hlue ngă jăk jih jang bruă răng mgang klei ruă tưp. Aduôn Nguyễn Thị Ngọc Anh, Khua Êpul Gơ̆ng kiă kriê knơ̆ng bruă hiu čhưn ênguê lăn mnga êa siam yang ƀuôn Akŏ Tam brei thâo:

Akŏ tam mkŏ mjing lu bruă kơ hiu čhưn ênguê, msĕ si kơ bruă rông mnơ̆ng, pla mjing, kphê, rông kan luê êa lehanăn mâo lu bruă mkăn đa. Bi êdah kơ dhar kreh thŭn anei hmei mâo hdră êlan amâo mâo mnăm kpiê čeh ôh, knŏng tông čing lehanăn kdŏ čhuang hlue êpul, amâo mâo mkŏ mjing dôk bi ngi ôh. Jih jang bruă hmei ngă srăng tui si klei phung tuê akâo, lehanăn hmei lông ngă ya mta klei anăn jing jăk găn mơ̆, lehanăn bi mâo hrue mmông mprăp, hưn hĕ êlâo dăp bruă, snăn amâo mâo dưi duah ngă tui si jing ôh.

Ba yua klei găl kơ lăn êa, dhar kreh čiăng mđĭ kyar hiu čhưn ênguê hluê si klei čiăng drông tuê

Ăt duh mĭn kơ dŭm mta mnơ̆ng mrâo, čiăng iêo jak lu tue truh, knơ̆ng bruă hiu čhưn ênguê Dămsăn ti ƀuôn prŏng Ƀuôn Ama Thuôt lŏ ruah sa hdră bi hmô jăk kơ bruă hiu čhưn ênguê anăn jing hiu čhưn ênguê mtah pioh mđĭ lar bruă knuă. Lê Hoàng Cơ, Knơ̆ng khua kiă kriê bruă hiu čhưn ênguê brei thâo, mơ̆ng klei găl lăn ala yan adiê, dliê kmrơ̆ng, lehanăn kơ lăn ala êa jua, mjing leh kơ klei găl čiăng kơ knơ̆ng bruă mkŏ mjing hdră hiu čhưn ênguê bruă pla mjing, hiu čhưn dhing mdei msăn, hŏng êwa êđăp jăk siam, lehanăn mâo bruă dlăng kriê klei suaih pral. Lehanăn, knơ̆ng bruă bi mguôp hŏng dŭm êpul êya mơ̆ng dŭm čar Daknông; Khánh Hoà kñăm bi mguôp mbĭt mkŏ mjing dŭm tuôr hiu čhưn ênguê mbĭt dơ̆ng nao hlăm kdrăn lŏ, nao mnei lŭ, mdei msăn. Lê Hoàng Cơ lač:

                Phung duh mkra hlăk mđing kơ bruă hiu čhưn ênguê mtah, boh nik mđĭ kyar bruă hiu čhưn êngue bruă lŏ hma, lehanăn atăt kơ tue truh čiăng mâo klei mdei msăn. Ară anei lăn ala dliê kmrơ̆ng ya adiê đru leh kơ pô prŏng snăk, sitôhmô dŭm đang war, lehanăn djŏ hlăm wưng anei jing găl êdi kơ bruă mkŏ mjing, msĕ si bruă dlăng kriê kphê, snăn drei atăt tue nao hlăm dŭm đang kphê ksiêm dlăng si bruă mjut mjing kphê bi nik hĭn, lehanăn hlăm anăn mơh jing dôk mâo êwa doh siam mngač tač jăk kơ bruă mdei msăn. Dămsăn mâo mkŏ leh bruă mơ̆ng Daknông kyuadah Dămsăn hlăk dlăng kơ ƀuôn Čuah, kdriêk Krông Knô jing kdrăn lŏ prŏng hlăm krĭng lăn čư pui Bazan snăn jing mdê hĭn hŏng krĭng Dap Mnai lehanăn lu krĭng mkăn.

Tui si knơ̆ng bruă Dhar kreh - mjuăt asei mlei lehanăn hiu čhưn ênguê Daklak, hlăm wưng tết nguyên đán leh êgao mâo leh hlăm brô 144 êbâo gưl čô tue truh hŏng čar Daklak hriê čhưn dhing mdei msăn, hlăp mbul lehanăn lông hiu čuă truh 21 anôk hiu čhưn ênguê, đĭ hĭn leh êgao kơ mkrah mkă hŏng wưng anei thŭn dih. Tui si aduôn Nguyễn Thị Phương Hiếu, k’iăng khua knơ̆ng bruă dhar kreh - mjuăt asei mlei čar Daklak, anei jing klei bi knăl jăk kyuadah êbeh kơ 2 thŭn leh êgao, bruă hiu čhưn ênguê tŭ leh lu klei hmăi amâo mâo jăk, bruă knuă mă lĕ nanao hlăm klei dleh dlan.

Dak Lak mâo lu anôk jăk siam, wăl prŏng čiăng mđĭ kyar hiu čhưn ênguê

Ăt tui si aduôn Hiếu, ară anei, bruă hiu čhưn ênguê hlăk ƀrư̆ ƀrư̆ dơ̆ng lŏ kơrŭ wĭt, lehanăn lŏ mđĭ klei bi mguôp, bi hgŭm bruă hŏng dŭm alŭ wăl, bi mguôp hlăm klei mđĭ kyar bruă hoiu čhưn ênguê, lehanăn čŏng bi mrâo jih jang hdră êlan kơ bruă hiu čhưn ênguê ti alŭ wăl, čiăng iêo jak lu tue hriê čhưn. Mbĭt hŏng bruă ksiêm dlăng kjăp klei ruă tưp ti dŭm anôk hiu čhưn ênguê, dhar bruă hoiu čhưn ênguê hlăk dôk gĭr mâo klei bi mguôp, iêo jak, tui duah klei bi mnia mblei djăp mta mnơ̆ng kơ bruă hiu čhưn ênguê mâo leh hlăm alŭ wăl jing klei ktang kơ čar pôl:

              Mkŏ mjing bruă ksiêm dlăng, tui duah dŭm mta mnơ̆ng mrâo, dar hlăm 4 kdriêk lehanăn đuĕ nao truh hlăm krĭng knông lăn, kơ phung duh mkra. Hlăm wưng anei srăng hrăm mbĭt hŏng alŭ wăl mkŏ mjing dŭm hdră êlan mrâo kơ klei hiu čhưn ênguê. Mrâo anei, hmei ksiêm dlăng leh čiăng mkŏ mjing bruă mrâo klei hiu čhưn ênguê ti ƀuôn prŏng Ƀuôn Ama Thuôt djŏ tuôm hŏng kphê, bruă lŏ hma pla mjing, lehanăn yang ƀuôn. Tui si klei găl mdê mdê bi alŭ wăl, snăn êjai dôk găn klei ruă tưp, mkă hnơ̆ng klei ruă tưp êdu ktang si bĕ srăng mkŏ mjing čiăng kơ phung duh mkra mprăp kơ dŭm bruă mrâo, lehanăn ngă bi mrâo bruă knuă mơ̆ng dŭm knơ̆ng bruă hiu čhưn ênguê.

Hiu čhưn ênguê lŏ hma jing hdră mđĭ kyar anôk bruă hiu čhưn ênguê ti Dak Lak hrŏng ruah čiăng iêo jak phung tuê

Leh sa wưng ksiêm dlăng lehanăn mkŏ mjing, dưi mkŏ mjing leh dŭm tuôr msĕ si “Famtrip Caraval - Lăn Dap Kngư hing ang”, hdră kưt muiñ “Êpa mhao Dămsăn”, dŭm bruă dhar kreh - kdŭ mmuiñ- mmjuăt asei mlei mâo mkŏ mjing ti hnơ̆ng kluôm ala dưi mkŏ mjing ti čar Daklak, mâo čang hmăng jing sa hlăm dŭm anôk kñăm, lehanăn boh kdrŭt prŏng pioh kơrŭ wĭt, lehanăn mđĭ kyar bruă hiu čhưn ênguê hlăm čar. Boh nik, hŏng bruă lŏ pŏk ƀăng hiu čhưn ênguê hŏng ala tač êngao dơ̆ng ngă leh ară anei, Daklak čang hmăng bruă hiu čhưn ênguê srăng ƀrư̆ ƀrư̆ dưi kơrŭ wĭt kjăp, dưi dưn yua jih klei găl mâo, anăp truh kơ mta kñăm drông êbeh 900 êbâo gưl čô tue truh hŏng čar Daklak hlăm thŭn anei./.

Pô mblang: Y-Khem Niê