VOV4.Êđê- Să Hoà Thuận, ƀuôn prŏng Ƀuôn Ama Thuôt čar Daklak mkŏ mjing leh knăm tŭ mă klei bi mklă să djăp ênoh čuăn krĭng ƀuôn sang mrâo ti hnơ̆ng đĭ hĭn. Anei jing să tal êlâo hlăm čar Daklak mâo bi klă boh tŭ dưn anei. Leh giăm 7 thŭn mkŏ mjing să krĭng ƀuôn sang mrâo ti hnơ̆ng lŏ mđĭ, snăn klei jing ti să Hoà Thuận mâo nanao klei bi mlih êdi, êlan klông pưk sang mâo rŭ mkra jăk, klei hdĭp phung ƀuôn sang dưi lŏ mđĭ. Thŭn 2021, hnơ̆ng hrui wĭt kah knar grăp čô mnuih êbeh 48 êklăk prăk.

Hnơ̆ng ênoh gŏ êsei ƀun kgŭ 1%. Bruă să Hoà Thuận jing leh anôk tal êlâo hlăm čar Daklak mâo khua knơ̆ng bruă sang čư̆ êa čar tŭ yap jing să djăp ênoh čuăn krĭng ƀuôn sang mrâo ti hnơ̆ng đĭ hĭn, amâo mâo djŏ knŏng jing klei myưng m’ang prŏng kơ bruă Đảng, bruă sang čư̆ êa lehanăn phung ƀuôn sang hlăm să ƀiădah lŏ jing klei bi hmô tal êlâo yuôm bhăn êdi čiăng kơ ƀuôn prŏng lŏ dơ̆ng bi lar hlue ngă tŭ jing bruă rŭ mdơ̆ng să krĭng ƀuôn sang mrâo ti hnơ̆ng đĭ hĭn hlăm ƀuôn prŏng hlăm dŭm thŭn tinăp./.

Pô mblang: Y-Khem Niê