Đuĕ hiu ktuê êlan bê tông doh siam, hŏng ƀlêč ƀlir djăp mta mnga dua nah êlan, mkŏ ƀuôn Ia Nueng truh kơ lăn mnga êa mơak Êa nueng, Khua mduôn Hmrick hŏng klei mơak yăl dliê, anei jing sa hlăm dŭm mta bruă mâo ngă mơ̆ng bruă mkŏ mkra krĭng ƀuôn sang mrâo, mâo knŭk kna duh bi liê ngăn prăk, mâo mnuih ƀuôn sang bi mguôp hrue ai mă bruă. Jih jang êlan klông hlăm ƀuôn doh siam, amâo mâo djŏ knŏng đru kơ ƀuôn Ia Nueng jing jăk siam, ƀiădah êlan anei lŏ jing klei găl kơ mnuih ƀuôn sang dŭ mdiăng boh mnga pô mâo. Ară anei, hlăm ƀuôn, grăp gŏ sang mâo mkra leh jăk sang tlô doh, amâo mâo lŏ phưi tha ŭn mnŭ mnơ̆ng rông gŭ krum sang ôh. Khua mduôn mtă mtăn nanao kơ anak čô brei tui ngă bi jăk hdră êlan mơ̆ng Đảng lehanăn knŭk kna:

“Să Biển Hồ ktưn mkŏ mkra krĭng ƀuôn sang mrâo kdlưn hĭn hŏng jih jang ênoh čuăn kčah. Hlăm thŭn 2024 anei hmei gĭr mtrŭt mnuih ƀuôn sang, thâo săng hĭn lehanăn mđrăm mbĭt bi mkŏ mkra krĭng ƀuôn sang mrâo, mđĭ ti ênoh kdlưn hĭn. Čiăng kơ mnuih ƀuôn sang hlăm ƀuôn brei mdrăm mbĭt hŏng bruă sang čư̆ êa, mâo klei mđĭ ai mnuih ƀuôn sang, čiăng kơ jih jang mnuih mâo klei sa ai mbĭt hŏng bruă sang čư̆ êa bi leh dŭm mta čuăn mâo mtrŭn’.

Ti djiêu ƀuôn Ia Nueng, jing ƀuôn Phung ăt mâo klei bi mlih leh jăk siam. Amâo mâo djŏ knŏng êlan betong jăk siam đuič ôh, lŏ mâo mkra wĭt sang bi kƀĭn ƀuôn jăk kjăp, jing leh anôk kơ mnuih ƀuôn sang djă yua lu. Đưk, jing khua ƀuôn, ƀuôn Phung brei thâo,  phung mniê hlăm ƀuôn mâo mkŏ mjing leh êpul hgŭm bruă pơ̆k mñam, ară anei dơ̆ng raih kjăp hlăm klei bi mbliư̆ mnia mnơ̆ng mnuă pô mâo , ƀrư̆ srăng mưng kjăp hŏng bruă hiu čhưn ênguê. Hlăm ƀuôn ară anei mâo leh êpul tông čing truh 43 čô, jing anôk bi hgŭm hlăm bruă dhar kreh, mơak mñai, êđăp ênang mơ̆ng phung hlăk ai. Đưk lŏ brei thâo, thŭn 2024, mnuih ƀuôn sang ƀuôn Phung lŏ dơ̆ng gĭr bi leh jih jang ênoh čuăn adôk ka leh:

“Mrâo anei ƀuôn Phung mrâo tŭ yap jing ƀuôn djăp ênoh cuăn mkŏ mkra krĭng ƀuôn sang mrâo, klei anei ba leh kơ mnuih ƀuôn sang mâo klei mơak kyua mâo Đảng, knŭk kna mâo klei mđing, lehanăn mnuih ƀuôn sang hlăm ƀuôn bi nao blei leh sơăi hră ênua bruă mdrao mgŭn. Mơ̆ng leh mâo klei mtrŭt mjhar snăn mnuih ƀuôn sang thâo ƀuh klei tŭ dưn tơdah tuôm hŏng klei ruă duam amâo liê đei ôh hlăm ngăn prăk. Tal dua, jing dŭm gŏ êsei ăt jih ai tiê đru hlăm bruă lŏ pŏk phai êlan klông, bi mdoh ƀuôn sang, gĭr ktĭr duh ƀơ̆ng mđĭ kyar klei hdĭp mda, leh kơ anăn bruă nao ngă định danh điện tử hmei gĭr đru čiăng bi ênŭm jih jang mnuih mâo ngă sơăi định danh điển tử”.

Tui si Đinh Thị Hoa- K’iăng khua knơ̆ng bruă sang čư̆ êa să Biển Hồ truh ară anei kluôm să mâo bi leh truh 16/19 ênoh čuăn mkŏ mkra krĭng ƀuôn sang mrâo ti hnơ̆ng kdlưn hĭn. Mơ̆ng anăn, jih jang êlan hlăm ƀuôn hŏng boh taih truh 20km mâo mkra hŏng bê tông leh sơăi, êbeh 17km êlan nao kơ hma mâo mkra kjăp mơh. Ti grăp bog ƀuôn, mnuih ƀuôn sang dơ̆ng tui hriăm bruă pla mjing hlue ênoh čuăn mrâo, êbeh 90% ênha pla mjing ară anei mâo ngă bruă hŏng kdrăp mrâo mrang, krih êa hjăn, lehanăn mâo mkiêt mkriêm lu ngăn prăk. Jih jang dŭm bruă mkăn msĕ si klei kơ êa doh, mâo anôk hlăp mbul, anôk mnuih ƀuôn sang hiu čhưn mâo mkra hŏng klei jăk. Siămdah kyua hŏng knhuah bhiăn mdê mdê, snăn mâo mơh dŭm ênoh čuăn knŏng mil 3% ênoh mnuih djiê ba čuh asei atâo, amâodah ênoh čuăn kơ bruă ngă định danh điện tử, mkŏ mjing klei duh ƀơ̆ng, kñăm ciăng lŏ bi leh hlăm thŭn tinăp.

“Thŭn anei grăp čô mnuih mâo hrui wĭt hlăm brô 57,6 êklăk/čô/thŭn jing kdlưn hĭn leh hŏng hdră kčah. Tal dua, bruă nah gŭ hlăm să mâo bi leh, êlan klông hlăm ƀuôn sang truh 97% lehanăn hlăk dôk bi leh jih hlăm thŭn 2023. Klei hdĭp mnuih ƀuôn sang mâo leh klei đĭ kyar klă mngač, mâo ênoh ba wĭt đĭ hĭn. Bruă mkŏ mkra krĭng ƀuôn sang mrâo klă sĭt ba wĭt leh klei tŭ dưn, djŏ hŏng hdră êlan kñăm mnuih ƀuôn sang thâo, mđrăm mbĭt mă bruă, lehanăn dưi dưn mơ̆ng bruă anăn”.

Hlăm klei bi sa ai găn bi dưi klei dleh dlan, bruă sang čư̆ êa, lehanăn mnuih ƀuôn sang să Biển Hồ, ƀuôn prŏng Pleiku hlăk lŏ dơ̆ng kut kat mkŏ mkra krĭng ƀuôn sang mrâo ƀrư̆ hrue bi mlih hĭn ti krĭng lăn čư̆ čhiăn Gia Lai anei.