Tinăn phung duh mkra hmư̆ phung khua kiă kriê dŭm phŭn dhar bruă hưn mdah hdră êlan bi hgŭm, klei iêo jak duh bi liê. Phung duh mkra  Saudi Arabia bi mni kơ dŭm klei bi mlih hlăm bruă duh bi liê mkŏ klei thâo bi hgŭm bruă duh mkra mnia mblei, mjing klei găl mtrŭn agha êlam hĭn hlăm wưng tinăp.

Blŭ hrăm ti anăn, Khua knŭk kna lač, Việt Nam srăng mjing djăp klei găl đru kơ phung duh mkra ngă bruă tŭ jing hĭn ti Việt Nam. Khua knŭk kna čang hmăng kơ Việt Nam lehanăn Saudi Arabia mâo klei bi mguôp kjăp hĭn bi đru hdơ̆ng găp hlăm jih jang bruă dôk mâo klei găl, pŏk mlar ti ASEAN lehanăn GCC.

Ăt hlăm hruê 19/19, Khua knŭk kna Phạm Minh Chính drông leh Khua phŭn bruă duh mkra leh anăn Hdră kčah Saudi Arabia leh anăn Khua phŭn bruă mnuih mă bruă leh anăn mđĭ kyar ala ƀuôn Saudi Arabia. Hlăm klei bi tuôm, Khua knŭk kna Phạm Minh Chính hơêč hmưi klei tŭ dưn prŏng mơ̆ng Saudi Arabia hlăm bruă bi lu jơr leh anăn mđĭ kyar dŭm bruă duh mkra êa pui êwa čuh, mđĭ hdră kreh knhâo kdrăp mrâo, mlih mrâo mbruă, mđing mđĭ kyar mtah, hơĭt kjăp, mđing kơ klei hlue ngă hdră kñăm Hdră bruă “Hnơ̆ng trah dlăng 2030”. Bi mklă klei bi hgŭm Việt Nam- Saudi Arabia dôk đĭ kyar jăk siam leh anăn lu klei găl čiăng mđĭ klei bi hgŭm, Khua knŭk kna mtă kơ dua tĭng mđĭ klei mkŏ, bi hgŭm mkŏ mjing bruă mnia mblei, bi liê, hlăm anăn mđing kơ bruă êa pui, ngăn prăk, mđĭ klei bi hgŭm hlăm bruă mrâo msĕ si bi hgŭm mkra mjing mnơ̆ng dhơ̆ng Halal, mlih mrô…