Blŭ hrăm hlăm klei bi kƀĭn, Võ Tấn Đức – pô mâo klei dưi Khua Knơ̆ng bruă sang čư̆ êa čar Đồng Nai brei thâo: Hlue ngă hdră bruă krĭng ƀuôn sang, kdriêk Xuân Lộc jing alŭ wăl ba anăp nanao hlăm bruă hlue ngă krĭng ƀuôn sang “4 mâo”, krĭng ƀuôn sang mrâo, krĭng ƀuôn sang mrâo kdlưn hĭn leh anăn krĭng ƀuôn sang mrâo bi hmô. Boh tŭ mơ̆ng kdriêk Xuân Lộc hlăm bruă mkŏ mjing krĭng ƀuôn sang mrâo jing yuôm bhăn hŏng klei đĭ kyar bruă duh mkra- ala ƀuôn mơ̆ng kdriêk Xuân Lộc leh anăn ti čar. Boh nik mjing leh mta mrâo kơ klei đĭ kyar mơ̆ng hdră krĭng ƀuôn sang mrâo.

Kơ tĭng alŭ wăl, Nguyễn Thị Cát Tiên -  Khua Knơ̆ng bruă sang čư̆ êa kdriêk Xuân Lộc bi mklă, klei tŭ jing hlăm bruă mkŏ mjing krĭng ƀuôn sang mrâo jing mơ̆ng dŭm gưl mnuih ƀuôn sang, 80% klei găl kơ prăk leh anăn mnuih mă bruă kơ klei mkŏ mjing krĭng ƀuôn sang mrâo hlăm mnuih ƀuôn sang.