VOV4.Êđê- Să Quảng Khê hlăm kdriêk Dak Glong, čar Dak Nông, sa hlăm dŭm kdriêk ƀun hĭn kluôm ala. Hŏng lu ênoh mnuih ƀuôn sang djuê ƀiă, klei hdĭp dôk lu klei dleh dlan, ƀiădah mnuih ƀuôn sang hrăm mbĭt sa ai tiê hŏng bruă sang čư̆ êa alŭ wăl ngă tŭ dưn hdră mkŏ mkra krĭng ƀuôn sang mrâo.

Sa boh sang điêt dlăng khuăt, siam mơ̆ng gŏ sang K’Prum ti ƀuôn Phi Mur, să Quảng Khê, mơak mñai hŏng asăp blŭ tlao. Hruê anei anak čô leh anăn găp djuê jĕ giăm hriê čhưn mơak yan mnga mrâo. Ñu brei thâo, mrâo anei hrui pĕ mâo 3 tôn kphê, ba čhĭ êbeh 120 êklăk prăk. Anak neh prŏng leh anăn dôk ung mô̆ jih leh, kyuanăn ênoh prăk anei ăt ênŭm kơ 2 ung mô̆ hdĭp mda leh anăn duh bi liê kơ pưk hma. K’Prum lač, amâo djŏ knŏng gŏ sang ñu, ƀiădah jih jang mnuih ƀuôn sang hlăm ƀuôn mâo klei hdĭp jăk sơăi kyua hrăm mbĭt mkŏ mkra krĭng ƀuôn sang mrâo.

“Mơ̆ng hruê mâo êlan mrâo, mâo sang dôk jăk kâo ƀuh mnuih ƀuôn sang hlăm ƀuôn mâo klei hdĭp mda đĭ kyar hĭn, jăk găl hĭn, anak neh nao sang hră mơar jăk hĭn mơh, êrô êbat nao čuă găp djuê hlăm ƀuôn jing ênưih hĭn. Hlăm bruă mkŏ mkra krĭng ƀuôn sang mrâo, mnuih ƀuôn sang hmei tinei sa ai myơr lăn mkra êlan, rŭ mdơ̆ng dŭm bruă mkŏ mkra hlăm ƀuôn.

Êlan nao ti ƀuôn Phi Mur

Yăl dliê kơ klei hdĭp mrâo, K’Krang, khua mduôn ti ƀuôn Phi Mur, hơ̆k mơak yăl dliê: Ară anei sang anei ăt msĕ hŏng sang dih, mâo leh sang dôk kdrưh k’ang. Anăn jing kyua mâo klei sa ai, klei bi mguôp, bi đru hdơ̆ng pô mđĭ kyar bruă duh mkra. Êdah hĭn jing bruă mkŏ mkra krĭng ƀuôn sang mrâo, êjai knŭk kna mâo hdră êlan ngă bruă mkŏ mkra, mnuih ƀuôn sang mprăp ai tiê myơr lăn, đru mguôp hruê ai mă bruă. Msĕ si gŏ sang ñu myơr leh 60m lăn ti anăp sang leh anăn êbeh 100m lăn găn hma, čiăng pŏk bi prŏng êlan hlăm ƀuôn leh anăn anôk mă bruă. Khua mduôn K’Krang brei thâo:

“Mnuih ƀuôn sang ti ƀuôn Phi Mur anei, yuăn ăt msĕ hŏng mnuih djuê ƀiă mâo klei bi mguôp mbĭt, hrăm mbĭt đru bi ngă êlan klông, kyuanăn mâo hĕ êlan jăk msĕ ară anei, êlan nao hlăm hma ăt prŏng čiăng ênưih dŭ mdiăng mnơ̆ng dhơ̆ng, boh mnga bruă lŏ hma…Yuăn leh anăn mnuih djuê ƀiă ti nei hdĭp mâo klei bi mguôp, amâo mâo duah bi mmiă, bi msao, hrăm mbĭt mđĭ kyar ƀuôn sang.”

Ti kdriêk Dak Glong, sa hlăm dŭm kdriêk ƀun ƀin hĭn hlăm ala čar dưi mâo hdră đru 30A, să Quảng Khê mâo ênoh mnuih ƀuôn sang lu hlăm anăn jing mnuih djuê ƀiă. Nguyễn Tiến Duẩn, khua bruă sang čư êa să Quảng Khê brei thâo, dŭm thŭn êgao, bruă duh bi liê mơ̆ng knŭk kna mâo leh klei sa ai, klei tŭ ư mơ̆ng mnuih ƀuôn sang. Hdră mơ̆ng Đảng djŏ hŏng ai tiê mnuih ƀuôn sang đru leh kơ să Quảng Khê dưi bi leh 19 hnơ̆ng čoh čuăn mkŏ mkra krĭng ƀuôn sang mrâo. Truh kơ ară anei, 9 boh ƀuôn leh anăn 3 alŭ hlăm să mâo sơăi leh êlan klông jăk, bruă mkŏ mkra jăk. Mơ̆ng să dleh dlan mâo krah wah ênoh mnuih ƀuôn sang jing gŏ sang ƀun ƀin, ară anei Quảng Khê knŏng dôk mă ka mâo ôh 7% gŏ sang ƀun ƀin leh anăn 8% gŏ sang giăm ƀun ƀin.

Wăl krah Quảng Khê

Čiăng kơ krĭng ƀuôn sang ƀrư̆ hruê ƀrư̆ mlih mrâo, êpul bruă hđeh êđam êra alŭ wăl dưi rơ̆ng leh hruê čŏng mă bruă tal 7, knăm kjuh mtah, hrăm mbĭt hŏng mnuih ƀuôn sang bi doh wăl hdĭp mda, pla thiăm lu ana kyâo mtah hlăm grăp êlan klông. Êngao kơ anăn klei duh bi liê mơ̆ng knŭk kna, anôk bruă Đảng nah gŭ, êpul kiă kriê alŭ ƀuôn leh anăn phung mâo klei đăo knang hlăm yang ƀuôn, ăt mâo nanao klei mđĭ ai mnuih ƀuôn sang lŏ gĭr ktưn mă bruă knuă, răng kriê ƀuôn sang pô, ƀrư̆ hruê ƀrư̆ mdrŏng siam. Nguyễn Tiến Duẩn brei thâo:

Bi kơ hdră mkŏ mkra krĭng ƀuôn sang mrâo, mnuih ƀuôn sang mâo klei sa ai, kyuanăn truh thŭn 2021 să Quảng Khê dưi tŭ yap jing krĭng ƀuôn sang mrâo. Hdră mtrŭn mơ̆ng bruă Đảng čar leh anăn hdră mtrŭn mơ̆ng êpul gơ̆ng bruă ƀuôn sang hlăm să ăt lŏ mâo dŭm hdră êlan duh bi liê kơ bruă mkŏ mkra, mđĭ ai mnuih ƀuôn sang hrăm mbĭt, sa ai mkŏ mkra krĭng ƀuôn sang mrâo bi hmô hlăm hruê mmông kơ anăp.

Sa yan mnga mrâo lŏ truh, hmăng hmưi lŏ mâo lu klei mlih mrâo ti krĭng taih kbưi să Quảng Khê, kdriêk Dăk Glong, čar Dak Nông.

Pô mblang: Y-Ƀel Êban