VOV4.Êđê- Să Dă Chais, kdriêk Lạc Dương, čar Lâm Đồng mâo giăm 80% mnuih ƀuôn sang jing mnuih djuê ana K’Ho. Kyua dưi bi lar knhuah gru khăp kơ ala čar mơ̆ng krĭng phŭn bruă krŭ kdơ̆ng, mơ̆ng să phung jhŏng ktang jing mnuih ƀuôn sang, mbĭt hŏng klei uêñ mĭn, duh bi liê mơ̆ng Đảng leh anăn knŭk kna kơ djăp mta bruă, Dă Chais hmar dưi găn dŭm klei dleh dlan, gĭr ktưn tlaih mơ̆ng klei ƀŭn ƀin leh anăn jing să mâo ênŭm hnơ̆ng čoh čuăn mơ̆ng ala čar kơ bruă mkŏ mkra krĭng ƀuôn sang mrâo.

            Mơ̆ng ƀuôn prŏng Đà Lạt, găn êbeh 60 km êlan dơ̆ng prŏng mrô 27 C hluê êlan nao phă krĭng êa ksĭ Nha Trang jing krĭng lăn krŭ kgŭ kdơ̆ng Đồng Mang, ară anei jing Dă Chais mơ̆ng kdriêk Lạc Dương (Lâm Đồng) - krĭng lăn krŭ kgŭ kdơ̆ng dưi dlăng jing amâo dưi mŭt, jing anôk jưh knang kjăp, răng mgang klei êđăp ênang kơ lĭng kahan dăl hlăm wưng mblah bi kdơ̆ng Mi mtlaih ala lehanăn phung kahan jhat, krơ̆ng kjăp ktuê êlan phŭn mkŏ hŏng dŭm čar kwar Dhŭng lăn dap kngư hŏng Khánh Hòa, Ninh Thuận.

Hluê jơ̆ng kahan hđăp Kơ Dơng Ha Dương, ti alŭ Tu Poh, să Dă Chais, mâo 17 čô mnuih djuê ana K’ho săn leh asei mlei lehanăn dưi čih anăn bi Pŏk mdhă bi hdơr mơ̆ng să lehanăn kdriêk. Diñu jing gru mngač êdah êdi mơ̆ng phung kahan jhŏng ktang krĭng čư̆ dliê Lăn dap kngư sa ênuk gưl hrăm mbĭt leh hŏng ƀuôn sang mjing krĭng lăn krŭ kgŭ kdơ̆ng anei. Hruê anei, tinei jing leh să krĭng ƀuôn sang mrâo, hŏng lu klei găl mrâo čiăng lŏ dơ̆ng đĭ kyar, năng jing să Jhŏng ktang êpul kahan djă phao ktuang yang ƀuôn.

“Êlâo krĭng krŭ kgŭ kdơ̆ng kreh mbĕ nanao lu blư̆, ară anei rơ̆ng klei hdĭp mda h’ĭt kjăp leh, klei hdĭp amâo lŏ dleh dlan msĕ si êlâo adih ôh. Mâo knŭk kna mđing dlăng, ktrâo lač kơ hdră pla kphê, boh hồng, ƀơr, makka... mâo djăp mnơ̆ng pla kyua anăn klei hdĭp mnuih ƀuôn sang ƀrư̆ dưi h’ĭt kjăp. Hdră bruă mkŏ mkra krĭng ƀuôn sang mrâo dưi pŏk ngă, pui kmlă, êlan klông, sang hră, anôk mdrao mgŭn dưi duh bi liê, klei hdĭp đĭ kyar, djăp ênŭm, trei mđao.

Anôk bruă Sang čư̆ êa să krĭng ƀuôn sang mrâo Dă Chaih mdrŏng sah jăk siam

            Mơ̆ng sa să dleh dlan, kƀah êwư, ư̆ êpa nanao hŏng giăm 50% ênoh gŏ êsei ƀun, kyua pŏk ngă mđrăm mbĭt lehanăn ba wĭt klei tŭ dưn mơ̆ng dŭm hdră bruă, hdră mtrŭn mơ̆ng Đảng lehanăn knŭk kna, boh nik jhŏng ba yua kdrăp mrâo hlăm bruă duh mkra pla mjing, mđĭ ênhă pla ana mkra mjing sui thŭn... hnư hrui wĭt kah knar grăp čô mnuih mơ̆ng Dă Chais đĭ leh 43 êklăk prăk/thŭn, ênoh gŏ êsei ƀun ară anei knŏng êbeh 6%. Bruă sang hră m’ar mtô bi hriăm, bruă mdrao mgŭn, dhar kreh mâo leh klei đĭ kyar jăk, bruă răng mgang klei êđăp ênang bruă kđi čar lehanăn klei êđăp ênang yang ƀuôn dưi krơ̆ng kjăp. Ti anăp klei bi mlih mơ̆ng ƀuôn sang pô, Bon Tô Xa Nga, ti alŭ Đưng K’Sị, să Dă Chais brei thâo, srăng mtrŭt mjhar čô anak hgŭm kngan hŏng ƀuôn sang hluê ngă tŭ dưn dŭm hdră bruă mâo alŭ wăl mtrŭt mjhar, gĭr ba Dă Chais đĭ kyar hĭn hlăm grăp hruê:

“Mkŏ mkra krĭng ƀuôn sang mrâo brei gĭr ktưn mđĭ kyar bruă duh mkra, mkra mđĭ hnư hrui wĭt lehanăn grăp čô mnuihƀuôn sang brei mđĭ klei thâo săng nao hgŭm. Pô mđĭ hdră mtô mblang, mtrŭt mjhar, atăt phung hđeh gưl mrâo hluê ngă snăn brei pô ba akŏ hluê ngă êlâo”.

Anôk bruă nah gŭ dưi duh bi liê prŏng, siam, mphŭn bi êdah klei jăk siam ƀuôn prŏng

            Hlê hŏng dŭm boh tŭ dưi mâo, să Dă Chais dôkgĭr ktưn srăng bi leh djăp hnơ̆ng čuăn krĭng ƀuôn sang mrâo kdlưn hĭn hlăm thŭn 2022. Hluê si Liêng Jrang Ha Thuyên, K’iăng khua anôk bruă sang čư̆ êa să Dă Chais, kyua hmăi mơ̆ng klei ruă Covid 19 anăn bruă bi leh hnơ̆ng čuăn anei djŏ hdră kčah jing klei dleh dlan êdi. Khă snăn, ti anăp dŭm boh tŭ dưn klă sĭt mơ̆ng bruă hdĭp hlăm boh klei mrâo hlăm hdră gang mkhư̆ klei ruă Covid 19 mơ̆ng knŭk kna, mbĭt hŏng klei hgŭm kngan, hgŭm ai mơ̆ng mnuih ƀuôn sang lehanăn jih anôk bruă kđi čar, Dă Chais srăng gĭr jih ai tiê pô čiăng mâo djăp hnơ̆ng čuăn mkŏ mkra krĭng ƀuôn sang mrâo hlăm thŭn anei:

            “Mơ̆ng klei hgŭm ai, hgŭm kngan mơ̆ng mnuih ƀuôn sang snăn să dưi mâo leh 19 hnơ̆ng čuăn mkŏ mkra krĭng ƀuôn sang mrâo hlăm thŭn 2019,. Čiăng lŏ dơ̆ng mđĭ lar dŭm boh tŭ dưi mâo, rơ̆ng dŭm hnơ̆ng čuăn dưi mâo leh mbĭt anăn mđing truh kơ să krĭng ƀuôn sang mrâo hlăm thŭn 2022 lehanăn dŭm thŭn ti anăp, êngao kơ klei mđing dlăng, duh bi liê mơ̆ng Đảng lehanăn Knŭk kna, brei mâo klei hgŭm mơ̆ng jih anôk bruă kđi čar hrăm mbĭt mă bruă. Hlăm anăn, mđing mđĭ lar bruă klam mơ̆ng phung kahan hđăp, mnuih mâo k’hưm ti dŭm ƀuôn sang čiăng mtrŭt mđĭ hdră mtô mblang, mtrŭt mjhar mnuih ƀuôn sang nao hgŭm, sa ai čiăng hrăm mbĭt bi leh hnơ̆ng čuăn mkŏ mkra krĭng ƀuôn sang kdlưn hĭn”.

            Dă Chais jing să Jhŏng ktang êpul kahan djă phao ktuang yang ƀuôn, jing krĭng lăn krŭ kgŭ kdơ̆ng mbĭt hŏng phung čô anak jhŏng ktang hlăm ênuk kdơ̆ng mblah lehanăn jih ai tiê mă bruă duh mkra pla mjing hruê anei. Kyua anăn, đăo knang, mta kñăm bi leh hnơ̆ng čuăn mkŏ mkra krĭng ƀuôn sang mrâo kdlưn hĭn srăng hnưm dưi ngă leh hlăm mgi dih, pral mkŏ mkra Dă Chais jing sa hlăm dŭm krĭng mâo hdră duh mkra đĭ kyar mơ̆ng kdriêk Lạc Dương lehanăn mơ̆ng čar Lâm Đồng./.

                                                                                    Pô mblang: H’Nêč Êñuôl