Mâo ƀô̆ mta ti anôk phŭn krŭ kdơ̆ng H9 čar Dak Lak ară anei, grăp čô ƀuh sơăi klei mlih krĭng lăn krŭ kdơ̆ng: Dŭm boh sang kdrưh kơăm mbĭt hŏng dŭm sang krum, dŭm anôk pla teinan leh anăn kdrăn lŏ mtah, hgăm hlăm dŭm wăl dliê hrông, hlăm dliê knŭk kna mkuôm Čư̆ Yang Sin, dưi răng mgang kjăp. Y-Thu Niê, mnuih djuê ana Mnông, ti ƀuôn Dăk Tuôr, să Čư̆ Pui, kdriêk Krông Bông brei thâo, êlâo dih gŏ sang ñu jing gŏ sang ƀun hĭn hlăm ƀuôn, ară anei mâo 10 drei êmô leh anăn pla 5 sao teinan. Hnư hrui wĭt mơ̆ng bruă rông mnơ̆ng, pla mjing grăp thŭn mâo 100 êklăk prăk leh anăn dưi tlaih ƀun.

 “Gŏ sang kâo rông êmô, ŭn, teinan. Sang kâo tlaih ƀun mâo dua thŭn leh. Mâo prăk brei anak nao sang hră mơar, rŭ mdơ̆ng sang dôk, blei tivi, êdeh p’phŭt đru kơ klei hdĭp aguah tlam”.

Tuôm nao hlăm klei bi blah êjai hlăk mrâo êdam ngiêk, ară anei jing leh khua ƀuôn ti ƀuôn Čam A, să Čư̆ Drăm, kdriêk Krông Bông, Y-Lăng Êban hơ̆k mơak êjai ƀuh dŭm klei mlih mơ̆ng ƀuôn pô. Ñu brei thâo, dŭm thŭn êgao, mâo klei duh bi liê mơ̆ng Đảng, knŭk kna, bruă mkŏ mkra, êlan klông ti krĭng taih kbưi anei ƀrư̆ ƀrư̆ bi mâo ênŭm. Pui kmlă leh anăn êa jua mâo truh kơ grăp gŏ sang, sang kƀĭn ƀuôn dưi rŭ mdơ̆ng kdrưh kơăm…jing klei bi klă kơ dŭm klei mlih ti krĭng krŭ kdơ̆ng.

 “Ară anei ƀuôn Čam A mâo êlan ƀê tông, anôk mdrao mgŭn, sang hră leh anăn sang dhar kreh. Phung hdeh nao sang hră mâo klei găl. Mnuih ƀuôn sang mâo klei đru êmô, ŭn wĭt rông mđĭ kyar klei hdĭp mda. Mnuih ƀuôn sang đăo knang hluê Đảng, knŭk kna leh anăn hur har mă bruă knuă mđĭ kyar klei hdĭp mda bi hrŏ ƀun.”

Mơ̆ng dŭm să krĭng tlâo dleh dlan mơ̆ng čar Dak Lak, êlan klông dleh dlan, ƀiădah kyua mâo klei đru mơ̆ng Đảng, knŭk kna, ară anei 100% ƀuôn êlan ti krĭng krŭ kdơ̆ng H9 mâo leh êlan ƀê tông. Dŭm să dưi ngă mơ̆ng 14/19 hnơ̆ng čuăn krĭng ƀuôn sang mrâo kơ dlông. Hlăm anăn dŭm hnơ̆ng čuăn čiăng mâo lu ênoh prăk msĕ si êlan klông, knơ̆ng kdơ̆ng êa, bruă mdrao mgŭn, sang hră mơak…dưi ngă leh. Hồ Duy Nam – khua kiă kriê Êpul kriê dlăng hdră rŭ mdơ̆ng kdriêk Krông Bông brei thâo, wưng thŭn 2021 – 2025, êngao kơ 4 să krĭng H9, 3 să mơ̆ng kdriêk dưi mâo klei đru kluôm. Jih jang mâo leh 127 êklai prăk mơ̆ng hdră bi hrŏ ƀun 1719 mơ̆ng knŭk kna dưi duh bi liê kơ 7 să. Ară anei êpul dôk ngă ktang phĭt bruă rŭ mkra 22 bĭt êlan, sang dôk, sang hră mơar leh anăn mnuôr êa đru kơ mnuih ƀuôn sang.

 “Êpul kriê dlăng hră bi mguôp hŏng phung ngă bruă bi hmar klei ngă bruă kñăm kơ hnơ̆ng tŭ jăk čiăng dưi ba yua hnưm hĭn, bi êran tŭ dưn hĭn. Hluê anăn, mkŏ mjing klei găl dŭ mdiăng mnơ̆ng dhơ̆ng, mđĭ kyar klei hdĭp mda kơ mnuih ƀuôn sang ti dŭm să dleh dlan anei.”

Krĭng krŭ kdơ̆ng H9 čar Dak Lak ti dŭm să Hoà Phong, Čư̆ Pui, Čư̆ Drăm leh anăn Yang Mao. 4 să ară anei mâo 41.500 čô hŏng êbeh 80% jing mnuih Êđê, M’Nông, Thái, Mông, Dao, Tày, Nung…bi hdĭp mda. Hlue si Nguyễn Ngọc Pháp – k’iăng khua Bruă sang čư̆ êa kdriêk Krông Bông, hlăm ênuk mblah Mi, khădah klei hdĭp dleh dlan, ƀiădah mnuih ƀuôn sang thâo bi mguôp, bi blah răng mgang ƀuôn sang, đru mdăp phung knuă druh, lĭng kahan. Dŭm thŭn êgao, pluă mbĭt hŏng dŭm hdră đru mơ̆ng čar leh anăn gưl dlông, kdriêk mkŏ mjing leh dŭm hdră êlan kơ bruă bi hrŏ ƀun leh anăn dưi mâo dŭm boh tŭ dưn jăk. Bruă mkŏ mkra ƀrư̆ ƀrư̆ dưi bi leh kluôm, klei hdĭp mnuih ƀuôn sang dưi mđĭ hĭn, hnơ̆ng gŏ sang ƀun ƀin hrŏ hŏng grăp thŭn. Nguyễn Ngọc Pháp brei thâo:

 “Grăp thŭn kdriêk kah 1% ênoh kreh bi liê mkŏ wĭt bruă rông mnơ̆ng, pla mjing ti dŭm să Čư̆ Pui, Čư̆ Drăm, Yang Mao leh anăn Hoà Phong. Mtrŭt mjhar mnuih ƀuôn sang pŏk mlar bruă rông êmô, ŭn leh anăn mtô pŏk mlar anôk pla teinan. Boh nik, mkŏ mjing hdră êlan mđĭ kyar bruă hiu čhưn ênguê ti dŭm să krĭng krŭ kdơ̆ng.”

Hŏng bruă mnuih ƀuôn sang lŏ dơ̆ng gĭr hlăm klei mă bruă knuă, gĭr ktưn tlaih ƀun, Bruă Đảng, Bruă sang čư̆ êa ktang phĭt hlăm hdră tă mđĭ kyar bruă duh mkra ala ƀuôn, krĭng krŭ kdơ̆ng H9 leh anăn dŭm să dleh dlan ti kdriêk Krông Bông jing anôk hrah kơ bruă mtô mjuăt knhuah gru cách mạng, nao mbĭt hŏng mđĭ kyar bruă hiu čhưn ênguê yang ƀuôn srăng dưi bi leh hlăm wưng kơ anăp./.