Gŏ sang Nông Minh Thước ti alŭ Đức An, să Thuận An, kdriêk Dak Mil, čar Dak Nông mâo 2ha pla kphê, thŭn anei mĭn tĭng hrui wĭt êbeh 800 êklăk prăk. Dŭm thŭn êgao ñu hgŭm mkra mjing kphê hnơ̆ng jăk hŏng êpul hgŭm bruă, ênoh đĭ nanao hĭn mkă hŏng anôk ba čhĭ mơ̆ng 500-700 prăk/kg. Čiăng mâo ênoh jăk, Nông Minh Thước mkra mjing kphê hlue ngă kjăp hnơ̆ng čuăn jăk, kphê knŏng hrui pĕ tơdah ksă 90% kơ dlông.

“Ară anei mkra mjing kphê guôn ksă jing yuôm bhăn hĭn. Bi pĕ mtah tal sa amâo djăp hnơ̆ng jăk, tal dua hnơ̆ng hrŏ. Mnuih ƀuô sang pô ară anei hlue si OCOP snăn hnơ̆ng čuăn čiăng kơ ksă čiăng dưi ba čhĭ mâo ênoh yuôm hĭn.”

Mbĭt hŏng Thước, jih 114 čô hlăm Êpul hgŭm bruă Công Bằng Thuận An, kdriêk Dak Mil, hlue ngă hlue si hdră mkra mjing kphê doh, kphê jăk. Kphê kpŭng mơ̆ng Êpul hgŭm bruă mâo Knơ̆ng bruă sang čư̆ êa čar Dak Nông bi mklă djăp hnơ̆ng čuăn OCOP 4 mtŭ. Kphê Thuận An ba čhĭ leh ti dŭm anôk ba čhĭ mâo hnơ̆ng jăk msĕ si Japon leh anăn dŭm ala čar Ơ Rôp. Ayŏng Nguyễn Quốc Vương, kriê dlăng êpul hgŭm bruă brei thâo:

 “Êpul hgŭm bruă mđing kơ bruă kphê dôk hlăk krĭng djăp  hnơ̆ng čuăn OCOP mâo bi mklă jing amâo bi rai wăl hdĭp mda. Mơ̆ng klei ktrâo lač hdră mnêč kriê dlăng ana pla mjing truh kơ djăp mta klei snăn êpul hgŭm bruă mtô leh kơ phung hlăm êpul, anăn krĭng pla mjing srăng ngă jăk. Hlăm hdră hrui pĕ snăn mđing kơ kphê ksă, hnơ̆ng ksă lu.”

 Hlăm krĭng pla mjing kphê phŭn ti čar Dak Nông, mơ̆ng sa ƀĭng lŏ hma,Trương Thị Thanh Lam, ti alŭ Kẻ Đọng, să Đức Minh, kdriêk Dak Mil ăt tŭ jing leh hlăm bruă mkŏ mjing anăn knăl kphê đeh. Hgŭm hlăm hdră grăp să sa mta mnơ̆ng, gŏ sang ñu mâo klei đru mơ̆ng dŭm gưl, dŭm dhar bruă hlăm bruă mkŏ mjing anăn knăl, mkra kdô, mrô bi mklă phŭn agha. Dŭm mta mnơ̆ng dhơ̆ng kphê kpŭng, kphê đeh hŏng pui mơ̆ng gŏ sang mrâo bi mklă djăp hnơ̆ng čuăn OCOP mơ̆ng 3-4 mtŭ.

“Tơdah pô 3 mtŭ đĭ 4 mtŭ ăt jing mâo kơhưm leh ƀiădah amâo djŏ kyua anăn ôh pô mdei hĕ. 6 sang pla kphê kơ hmei snăn pô lač hŏng gŏ êsei ƀĭng lŏ hma mđĭ hnơ̆ng ksă 100% čiăng mđĭ hnơ̆ng jăk. Si tô hmô ênoh anôk ba čhĭ ară anei arăng blei 23.000prăk/kg snăn kâo blei thiăm 8.000prăk/kg.”

Ară anei, lu ƀĭng lŏ hma ti kdriêk Dak Mil, čar Dak Nông mkŏ mjing leh hdră bi hgŭm mkra mjing, mkŏ mjing anăn knăl leh anăn mđĭ ênoh yuôm tơdah hgŭm hlăm hdră grăp să sa mta mnơ̆ng. Ayŏng Phan Gia Long, ti să Đức Minh, jhŏng ngă bruă hŏng klei mĭn mkra mjing dŭm mta mnơ̆ng mơ̆ng mtei mtah. Dŭm mta mnơ̆ng dhơ̆ng msĕ si kpŭng mtei mtah, klŏ kpŭng mtei mtah bi luk hŏng êa hnuê, ƀung mtei mtah… ƀrư̆ mâo phung blei yua leh anăn bi mklă djăp hnơ̆ng čuăn OCOP 3 mtŭ. Ayŏng Phan Gia Long brei thâo.

“Bi klin dŭm mta snăn ênoh puăng bi mklă OCOP djŏ guôp snăk kyua hlue si hnơ̆ng čuăn snăn kâo bi mklă êlan pô nao, hdră kâo ngă jing djŏ.  Anăn jing sa bruă ngă djŏ klă kơ phung mă bruă jih ai tiê. Ƀrư̆ ngă pô ƀrư̆ ƀuh pô nao djŏ êlan leh anăn bruă bruă OCOP anei djŏ jing brei djăp hnơ̆ng jăk.”

 Nguyễn Văn Tuấn, Khua adŭ bruă lŏ hma leh anăn mđĭ kyar krĭng ƀuôn sang kdriêk Dak Mil, čar Dak Nông brei thâo, leh 6 thŭn pŏk ngă hdră grăp să sa mta mnơ̆ng, truh ară anei mâo leh 19 mnơ̆ng djăp hnơ̆ng čuăn OCOP 4 mtŭ leh anăn 3 mtŭ. Dŭm mta mnơ̆ng dhơ̆ng đru hưn mdah anăn knăl, mđĭ prăk hrui wĭt kơ ƀĭng lŏ hma, mbĭt anăn đru msir boh klei mnuih mă bruă ti alŭ wăl.

“Hlăm hdră hlue ngă snăn mnuih ƀuôn  sang mbruă leh anăn pral kdal, ksiêm êmuh, tui hriăm, ăt msĕ mơh hgŭm hlăm knăm mơak, bo hgŭm hŏng dŭm anôk bruă mkăn, leh anăn ba hlăm anôk ba čhĭ online čiăng mđĭ, hưn mdah rup, anăn knăl mnơ̆ng dhơ̆ng lŏ hma Dak Mil.”

 Hdră grăp să sa mta mnơ̆ng ti kdriêk Dak Mil, čar Dak Nông brei ƀuh boh tŭ klă sĭt kơ klei đĭ kyar hlăm lam, mđĭ ênoh yuôm bruă duh mkra ti krĭng ƀuôn sang. Mđĭ lar klei găl alŭ wăl, mkŏ mjing hdră bi hgŭm mkra mjing hlue si hnơ̆ng čuăn hnơ̆ng jăk, mkŏ mjing anăn knăl, mnơ̆ng dhơ̆ng lŏ hma Dak Mil, čar Dak Nông hlăk grăp knhuang mđĭ kyar anôk ba čhĭ./.