V0V4.Êđê- Phŭn bruă Lŏ hma mđĭ kyar krĭng ƀuôn sang mrâo mâo Hră mdah ba m’ĭt kơ Khua knŭk kna kơ bruă bi mklă Hdră mđĭ kyar bruă hiu čhưn ênguê krĭng ƀuôn sang hlăm bruă mkŏ mkra krĭng ƀuôn sang mrâo wưng thŭn 2021-2025. Kdrêč anei hruê anei hưn mthâo kơ klei anei.

Hluê anăn, kluôm ênoh prăk ngă hdră mĭn tĭng hlăm brô 2 êbâo 500 êklai prăk, hluê ngă hdră ala čar kñăm mkŏ mkra krĭng ƀuôn sang mâo wưng thŭn 2021 – 2025. Hlăm anăn, ngăn prăk mơ̆ng gưl dlông đru klă anăp kơ hdră ala čar kñăm mkŏ mkra krĭng ƀuôn sang mâo hlăm brô 500 êklai prăk, ngăn prăk alŭ wăl 550 êklai prăk, ngăn prăk pluă mbĭt mơ̆ng dŭm hdră ngă bruă mkăn 560 êklai prăk, ngăn prăk iêo mkrum mơ̆ng dŭm ai dưi yang ƀuôn hlăm brô 890 êklai prăk.

Hdră mtrŭt mđĭ klei đĭ kyar bruă hiu čhưn ênguê krĭng ƀuôn sang nao mbĭt hŏng bi lar klei găl, ai ktang mơ̆ng bruă lŏ hma, ƀuôn ngă bruă đưm, dhar kreh leh anăn wăl hdĭp mda alŭ wăl. Mbĭt anăn mđĭ hĭn hnơ̆ng tŭ jăk hlăm klei hdĭp, ai tiê mnuih ƀuôn sang krĭng ƀuôn sang, đru mkŏ wĭt bruă duh mkra krĭng ƀuôn sang hluê êlan bi lu jơr klei yuôm bhăn leh anăn đĭ kyar kjăp.

            Mta kñăm truh ti thŭn 2025 jing đĭ kyar, bi klă dŭm anôk truh lehanăn mnơ̆ng dhơ̆ng bruă hiu čhưn ênguê krĭng ƀuôn sang. Klă klơ̆ng ti grăp čar, ƀuôn prŏng gĭr ktưn mâo ƀiă êdi 1 anôk hiu čhưn ênguê krĭng ƀuôn sang mâo klei tŭ yap nao mbĭt hŏng klei găl bruă lŏ hma, dhar kreh, ƀuôn ngă bruă đưm amâodah wăl hdĭp mda alŭ wăl, mâo ƀiă êdi 500 anôk bruă mkra mjing mnia mblei bruă hiu čhưn ênguê krĭng ƀuôn sang dưi tŭ yap mâo ênŭm hnơ̆ng čoh čuăn ngă bruă kơ phung tuê hiu čhưn ênguê.

Hdră mtrŭt mđĭ klei đĭ kyar bruă hiu čhưn ênguê krĭng ƀuôn sang nao mbĭt hŏng bruă mlih mrô leh hdră grăp sa 1 mnơ̆ng dhơ̆ng OCOP leh anăn mâo ƀiă êdi 80 mta mnơ̆ng dhơ̆ng bruă hiu čhưn ênguê yang ƀuôn leh anăn anôk hiu čhưn ênguê krĭng ƀuôn sang mâo ênŭm hnơ̆ng čoh cuăn OCOP mơ̆ng 3 mtŭ kơ dlông djăp leh ênoh čuăn. hlăm anăn ƀiă êdi 50% dŭm mta bruă hiu čhưn ênguê yang ƀuôn leh anăn anôk hui čhưn ênguê yang ƀuôn dưi mlih mrô leh anăn mkŏ hŏng dŭm mbah hưn mdah, mtrŭt mđĭ bruă hiu čhưn ênguê hŏng kdrăp mrâo mrang mrô.

Hdră gĭr ktưn 100% anôk bruă hiu čhưn ênguê yang ƀuôn dưi hưn mdah, 50% anôk hiu čhưn ênguê krĭng ƀuôn sang dưn yua klei tla prăk hŏng kdrăp điện tử hlăm bruă hiu čhưn ênguê. Grăp kdriêk krĭng ƀuôn sang mrâo mâo klei găl bruă hiu čhưn ênguê mkŏ mjing ƀiă êdi 1 klei bi hmô čuê bi mguôp bruă hiu čhưn ênguê bruă lŏ hma. Ƀiă êdi 70% phung kiă kriê anôk bruă hiu čhưn ênguê krĭng ƀuôn sang dưi mâo klei mtô bi hriăm bruă kriê dlăng bruă hiu čhưn ênguê… Boh nik srăng mâo klei čih pioh leh anăn mnơ̆ng ktrâo anôk mrô dŭm anôk hiu čhưn ênguê krĭng ƀuôn sang hlăm kluôm ala.

            Čiăng hluê ngă hdră, dŭm dhar bruă djŏ tuôm srăng ksiêm dlăng, bi kluôm hdră ngă bruă, hdră êlan kơ klei đĭ kyar bruă hiu čhưn ênguê krĭng ƀuôn sang. Mkŏ mjing hdră tă klei mđĭ kyar bruă hiu čhưn ênguê krĭng ƀuôn sang leh anăn bi mbŏ hlăm hdră čuăl mkă mđĭ kyar bruă duh mkra ala ƀuôn, hdră čuăl mkă bruă hiu čhưn ênguê ala čar leh anăn krĭng ƀuôn sang mrâo. Dŭm alŭ wăl mâo klei găl bruă hiu čhưn ênguê mkŏ mjing dŭm hdră êlan, hdră čuăl mkă mđĭ kyar bruă hiu čhưn ênguê krĭng ƀuôn sang wưng thŭn 2022 – 2025, nao mbĭt hŏng bruă ksiêm dlăng dŭm anôk hiu čhưn ênguê krĭng ƀuôn sang djŏ guôp hŏng dŭm hdră čuăl mkă djŏ tuôm.

Mbĭt anăn, hdră mkŏ mjing leh anăn bi leh hdră kčah, hnơ̆ng čuăn, klei ngă bruă kơ klei hiu čhưn ênguê krĭng ƀuôn sang, ksiêm dlăng, bi mbŏ dŭm hdră êlan mtrŭt mđĭ, iêo mthưr klei duh bi liê. Mđĭ kyar bruă hiu čhưn ênguê krĭng ƀuôn sang, mtrŭt mđĭ klei bi mguôp knŭk kna – êngao knŭk kna, knŭk kna – êngao knŭk kna – yang ƀuôn, phung duh mkra leh anăn êpul êya hlăm klei đĭ kyar bruă hiu čhưn ênguê krĭng ƀuôn sang.

Hdră srăng dưi iêo mthưr, pluă mbĭt leh anăn dưn yua mâo boh tŭ dưn dŭm ai dưi kơ klei đĭ kyar bruă hiu čhưn ênguê krĭng ƀuôn sang duh bi liê, boh nik jing dŭm knơ̆ng bruă, êpul êya. Hdră srăng mtô mjuăt leh anăn mđĭ hĭn klei thâo kơ mnuih mă bruă hiu čhưn ênguê krĭng ƀuôn sang. Ba dŭm mta phŭn bruă mtô bi hriăm kơ bruă hiu čhưn ênguê hlăm hdră mtô bri hriăm kơ dŭm anôk mtô mjuăt bruă mă ti alŭ wăl.

Boh nik, dưn yua kdrăp mrâo mrang, mtrŭt mđĭ klei mlih mrô hlăm bruă mđĭ kyar bruă hiu čhưn ênguê krĭng ƀuôn sang. Hdră srăng mkŏ mjing mnơ̆ng ktrâo anôk mrô kơ dŭm mta mnơ̆ng dhơ̆ng bruă hiu čhưn ênguê krĭng ƀuôn sang, đru mkŏ dŭm mta mnơ̆ng thơ̆ng anăn hŏng dŭm mnơ̆ng dhơ̆ng bruă hiu čhưn ênguê mkăn, đru kơ bruă mtrŭt mđĭ klei hiu čhưn ênguê krĭng ƀuôn sang. Mta mkăn mkŏ mjing klei čih pioh mơ̆ng gưl dlông truh kơ alŭ wăl, đru kơ bruă ksiêm dlăng, hưn mdah leh anăn mtrŭt mđĭ bruă hiu čhưn ênguê krĭng ƀuôn sang, amâodah ba dŭm kdrăp yua điện tử wĭt kơ krĭng ƀuôn sang.

Pô mblang: Y-Ƀel Êban