Jing anôk bi knông plah wah 2 să Dak Nuê leh anăn Dak Liêng kyuanăn ti êlan dơ̆ng mrô 27, kdrêč găn ƀuôn Tơ, să Dak Liêng, kdriêk Lak, čar Dak Lak êlâo jing “Anôk čhŏ” kyua klei bi hwiê djah djâo mâo boh taih giăm 100m. Čiăng mgaih msir boh klei anei, êpul phung êdam êra dua să Dak Liêng leh anăn Dak Nuê jêñ jêñ ngă bruă hrui êmiêt leh anăn ba čuh djah, mbĭt anăn mdưm camera ktuê dlăng čiăng hmao ƀuh leh anăn ƀuah mkra phung hwiê djah djâo plă plia. Hluê si amai Sao Mai Len, khua bruă êdam êra să Dak Liêng, klei kčĕ “Mdưm camera ktuê dlăng lăm lui dŭm anôk hwiê djah” dưi ngă mơ̆ng knhal jih mlan 7/2023, hmar dưi bi lar boh tŭ dưn.

Êlâo dih hmei ăt kpơ̆ng pŏk mdhă “Amâo mâo hwiê djah”, ƀiădah amâo mâo tŭ dưn ôh. Leh hmei mdưm camera ăt hmao ƀuh dua čô, sa čô hmei mtă brei lŏ mă jih djah anăn. Bi sa čô tal dua mâo bruă sang čư êa să bi klă đŭ bi kmhal, ênoh đŭ jing 1 êklăk prăk. Klă sĭt leh mdưm Camera lu mnuih ƀuôn sang thâo leh anăn bi hrŏ klei hwiê djah. Klei thâo săng mnuih ƀuôn sang dưi mđĭ hĭn, ka lŏ mâo pô ngă soh ôh.

Amai Phan Thị Hoa, ti ƀuôn Tơ, să Dak Liêng, dôk hdĭp giăm anăn, ăt čih yap dŭm klei mlih jăk:

Mơ̆ng hriê mdưm camera ƀuh dưi bi hơĭt mơ̆ng 70 – 80%, ară anei mâo mâo lŏ mâo phung tuh djah ti anăn ôh. Si srăng ngă čiăng kơ wăl hdĭp mda, êlan klông doh, pô srăng nao hgŭm, kyuadah anăn jing bruă ngă tŭ dưn kơ yang ƀuôn.

Kñăm mgaih msir jih hnơ̆ng dŭm anôk tuh djah ti alŭ wăl bi knông, phung êdam êra 2 să Dak Liêng leh anăn Dak Nuê lŏ ngă bruă pla ana mnga, ana rơ̆k ktuê êlan. Truh kơ ară anei, alŭ wăl anei kčưm mâo leh dŭm knuh mnga siam blang hlăm hla piêk.

 Hluê si Phạm Ngọc Thắng, Khua bruă êdam êra kdriêk Lak, mdưm camera leh anăn pla mnga čiăng lui hĕ dŭm anôk hwiê djah jing leh klei bi hmô mrâo, mbruă, djŏ guôp hŏng boh sĭt ti alŭ wăl. Hluê anăn đru mđĭ hĭn bruă klam mơ̆ng phung êdam êra hlăm bruă răng mgang wăl hdĭp mda, êngao kơ dŭm gưl trŭn kơ bruă Hrăm mbĭt răng mgang wăl hdĭp mda, knăm 6 čŏng pô mă bruă amâodah Knăm 7 mtah ăt dưi mkŏ mjing mơ̆ng êlan truh kơ ară anei. Bruă mdưm camera leh anăn dưn yua dŭm hdră bi kmhal amâo mâo kñăm mă prăk đŭ, ƀiădah hŏng klei ƀuah mkra phung ngă bruă anăn srăng dưi bi lar truh hŏng mnuih ƀuôn sang, đru kơ diñu thâo săng hĭn hlăm bruă hrui êmiêt djah djâo.

 “Hŏng klei bi hmô anăn jing jăk leh anăn djŏ guôp, phung êdam êra dưi đru hlăm bruă răng mgang wăl hdĭp mda. Hlăm wưng kơ anăp, Êpul khua bruă êđam êra kdriêk mĭn tĭng srăng hluê ngă hrăm mbĭt hlăm 11 să, wăl krah, grăp să srăng ngă sa anôk. Leh kơnăn să srăng lŏ bi mguôp hŏng êpul kiă kriê dŭm alŭ ƀuôn čŏng pŏk mlar klei bi hmô anei. Mdưm camera anei jing mphŭn kčưm dưi mđĭ klei thâo săng mơ̆ng mnuih ƀuôn sang, mbĭt anăn srăng yua dŭm hdră bhiăn, mơ̆ng anăn mdưi mđĭ hĭn klei thâo săng. Ăt hmăng hmưi srăng mtrŭt mjhar phung êdam êra mkŏ mjing dŭm êpul hgŭm bruă hrui mă djah, tơdah mâo klei sa ai mơ̆ng mnuih ƀuôn sang bi mkrum mguôp srăng jăk êdi.”

Ăt hluê si Phạm Ngọc Thắng, klei mčĕ mdưm camera leh anăn pla mnga gang mkhư̆ klei hwiê djah mplă plia, khădah dưi bi lar boh tŭ dưn, ƀiadah amâo mâo dưi mgaih msir jih hnơ̆ng boh klei. Amâo mâo hwiê anôk anei, diñu săng nao hwiê anôk mkăn, kyuadah lu alŭ ƀuôn, să ară anei ka mâo anôk bi kƀĭn djah leh anăn ka mâo bruă hrui mă djah. Prăk duh bi liê kơ bruă hrui mă, bi mklin, čuh djah ka dưi mgaih msir hrăm mbĭt, dŭm camera, đang mnga, anak rơ̆k kơh dưi bi lar boh tŭ dưn hlăm wưng sui.