Leh êbeh 2 thŭn pŏk ngă Klei bi mklă 749 mơ̆ng Khua knŭk kna, truh kơ ară anei 60% ênoh hră m’ar gưl să mơ̆ng čar Kon Tum dưi msir mghaih hluê êlan mạng, dưi mâo mta kñăm kčah mtrŭn truh kơ thŭn 2025. Êngao anăn, êbeh 16.800 ha mnơ̆ng pla, 142 anôk rông mnơ̆ng dưi ba yua kdrăp mrâo lehanăn êbeh 116.600 gŏ sang ngă bruă lŏ hma bi mnia mblei hluê hdră điện tử; gru hmô alŭ 3, să Tân Lập, kdriêk Kon Braih rơ̆ng djăp klei găl alŭ kreh dhar…

Khă snăn, hluê Đặng Trần Huân, K’iăng khua knơ̆ng bruă Lŏ hma lehanăn mđĭ kyar krĭng ƀuôn sang čar Kon Tum, čar ăt dôk tlă anăp hŏng lu klei lông dlăng hlăk hluê ngă hdră mlih mrô hlăm bruă mkŏ mkra krĭng ƀuôn sang mrâo.

“Bruă thâo săng kơ hdră mlih mrô hlăm bruă mkŏ mkra krĭng ƀuôn sang mrâo amâo bi knar. Klei thâo săng mơ̆ng mnuih mă bruă hlăm klei hluê ngă bruă klam bi mlih mrô dôk êdu kƀah. Anôk bruă nah gŭ lehanăn kdrăp hâo hưn ti dŭm să ka năng hŏng klei čiăng lehanăn bruă klam bi mlih mrô”.

Hŏng 68% ênoh mnuih mơ̆ng čar hdĭp ti krĭng ƀuôn sang lehanăn 73% ênoh mnuih mă bruă lŏ hma, dliê kmrơ̆ng, čar Kon Tum bi mklă bruă mlih mrô jing hdră  yuôm bhăn čiăng mđĭ kyar bruă lŏ hma, krĭng ngă lŏ hma hluê hdră mrâo đru kơ mnuih ngă lŏ hma hŏng ênoh bi liê ƀiă khă snăn ăt dưi mâo prăk mnga lu.

Hluê si Đặng Thanh Long, Khua Êpul hgŭm bruă kreh knhâo – kdrăp mrâo čar Kon Tum, kyua bruă duh mkra – ala ƀuôn dôk dleh dlan, bruă bi mlih mrô hlăm hdră lŏ hma lehanăn krĭng ngă lŏ hma mơ̆ng čar tal êlâo hĭn brei hgao jih klei gun kpăk, anăn jing êmưt klei ba yua kdrăp maĭ mŏk, ƀiă ba yua kdrăp mrâo, hdră pla mjing lu jing hluê si klei thâo mơ̆ng ƀĭng ngă lŏ hma… Lač kơ hdră bi mlih mrô hlăm bruă lŏ hma mđing truh kơ bruă lŏ hma ênuk mrâo, Đặng Thanh Long, brei thâo:

“Êlâo hĭn anăn jing hdră hâo hưn mtô mblang čiăng thâo săng klă bruă klam, k’hưm, klei yuôm bhăn lehanăn klei kpĭ mơ̆ng hdră mlih mrô hlăm bruă mđĭ kyar hdră lŏ hma, anei jing klei dôk mâo. Mđĭ hnơ̆ng tŭ jăk mnuih mă bruă wăt hŏng phung khua anôk bruă duh mkra pla mjing, mâo dŭm gŏ êsei mnuih ngă lŏ hma, êpul hgŭm bruă, anôk bruă duh mkra lehanăn êpul knuă druh nao hgŭm hlăm hdră mlih mrô bruă lŏ hma. Mkŏ mjing tur knơ̆ng mrô lehanăn hră m’ar mrô. Leh anăn jing klei hgŭm mbĭt mơ̆ng jih anôk bruă kđi čar, dŭm gưl bruă Đảng, bruă knŭk kna, dŭm anôk bruă duh mkra hlăm bruă pla mjing.

Truh ară anei, čar Kon Tum mâo leh 48/86 să djăp hnơ̆ng čuăn krĭng ƀuôn sang mrâo, hlăm anăn mâo 7 să krĭng ƀuôn sang mrâo kdlưn hĭn lehanăn 2 să krĭng ƀuôn sang ênuk mrâo. Mbĭt anăn čar ăt mâo 21 să djăp hnơ̆ng čuăn krĭng mnuih ƀuôn sang dôk ênuk mrâo, 65/498 alŭ, ƀuôn mnuih djuê ƀiă djăp hnơ̆ng čuăn krĭng ƀuôn sang mrâo. Anei jing sa hlăm dŭm tur knơ̆ng yuôm bhăn čiăng kơ čar hluê ngă dŭm hdră mrâo lehanăn djŏ guôp kñăm mtrŭt mđĭ hdră mlih mrô hlăm bruă lŏ hma lehanăn mđĭ kyar krĭng ngă lŏ hma thâo mĭn, kreh dhar./.