VOV4.Êđê- Hŏng dŭm hdră Kuič mngač êlan ƀuôn sang, phung êdam êra ti čar Dak Lak dôk đru mguôp mđĭ klei thâo săng mnuih ƀuôn sang hlăm bruă hrăm mbĭt mkŏ mjing dŭm ktuê êlan, ƀuôn sang “mngač -mtah- doh-siam”. Anei jing Hdră bruă klă sĭt mơ̆ng phung mda asei hgŭm hŏng alŭ wăl mkŏ mkra krĭng ƀuôn sang mrâo.

Nanao mơ̆ng 6h tlam hlăm grăp hrue, dŭm boh ăngpul pui êliktrik mâo ktit yơh hlăm êlan klông ti alŭ mrô 1, să Êa Tiêu, kdriêk Čư̆ Kuiñ, čar Daklak. Lê Đắc Cừ, phung ƀuôn sang hdĭp djiêu êlan anei yăl dliê, mơ̆ng leh mâo pui mtrang mngač hlăm êlan klông, snăn amâo jăk lŏ mâo klei bi tlĕ dăp ôh hlăm ƀuôn sang, phung ƀuôn sang mâo klei mơak, mmăt mlam kbiă nao hlăm êlan klông, amâodah êbat čiăng mjuăt asei jăk mơh. Klei thâo bi khăp čiăng hlăm ƀuôn sang đĭ hĭn.

Êlâo dih hlăm êlan ka mâo ôh pui mtrang mngač, snăn dôk tuôm hŏng lu klei bi tlĕ dăp. Ƀiădah leh mâo kă pui êliktrik, snăn phung ƀuôn sang ƀuh hơĭt hĭn. Hlăm êlan klông mngač tač, lehanăn êđăp ênang hĭn, jih jang mnuih mơak snăk, leh mâo pui mtrang mngač hlăm êlan klông.

Hdră bruă kuič mngač êlan ƀuôn sang mâo phung mda asei Čư̆ Kuin ngă ti alŭ 1, să Ea Tiêu

Bruă kă pui êliktrik hlăm êlan klông truh êbeh 1,2km, hŏng ênoh bi liê jih jang truh 25 êklăk prăk, mơ̆ng bruă êdam êra kdriêk Čư̆ Kuiñ đru, phung êdam êra să Êa Tiêu, lehanăn phung ƀuôn sang hlăm alŭ wăl bi mguôp hrue ai mă bruă mkŏ mkra, mâo ngă mơ̆ng mlan 3 truh kơ ară anei. Mai Văn Hùng, khua bruă Đảng alŭ mrô 1, să Êa Tiêu brei thâo, mơ̆ng hrue mâo mkŏ mkra pui êliktrik, phung ƀuôn sang hlăm alŭ mtluk mtlak mơak mñai bi hwuai mdoh êlan klông, jah waih ƀur kyâo čiăng kơ êlan klông mngač tač doh siam. Mbĭt hŏng anăn, alŭ ăt tiŏ nao sa êpul kiă kriê, kăp ktue dlăng êlan klei pui, kñăm čiăng thâo yua pui hŏng klei tŭ dưn lehanăn rơ̆ng.

Leh ruĕ mkra êlan klei pui êliktrik snăn hmei mâo klei bi kƀĭn phung ƀuôn sang kơ anei, lehanăn êpul khua kiă kriê mkŏ mjing mtam êpul răng kriê êlan klei pui êliktrik, lehanăn kăp hrui mă prăk pui čiăng bi khuăt. Bi kơ bruă bi mkrum prăk pui snăn jih jang phung ƀuôn sang bi sa ai sơăi, sitôhmô leh mâo êlan klei pui mtrang mngač, snăn amâo mâo djŏ hŏng phung dôk hlăm krĭng anei ôh, ƀiădah hŏng phung kreh găn êrô ăt bi mguôp mơh.

Dŭm hdră bruă yua kƀŏng pui ênuk mrâo, pui êran hŏng pil yang hruê

Tui si amai Đặng Thị Vân, Khua bruă êdam êra kdriêk Čư̆ Kuiñ, jih jang bruă mkra êlan klei pui mtrang mngač kơ ƀuôn sang mơ̆ng êpul bruă êdam êra mkra mơ̆ng hlăk thŭn 2017 snăn mâo ngă leh hlăm djăp êlan klông ti dŭm boh ƀuôn hlăm kdriêk. Amâo mâo djŏ knŏng knang kơ ngăn prăk mơ̆ng bruă êdam êra mơ̆ng dlông đuič ôh mkăp, ƀiădah jih jang êpul bruă êdam êra nah gŭ jih ai tiê mơh bi mguôp. Mơ̆ng anăn, hlăm dŭm thŭn leh êgao, dŭm pluh km êlan hlăm dŭm boh alŭ, ƀuôn mâo leh sơăi êlan klei pui mtrang mngač, mjing klei găl jăk kơ phung ƀuôn sang êrô hiu êjai mmăt mlam. Lehanăn mdul mơh klei truh tơl hlăm êlan klông, rơ̆ng kjăp kơ klei êđăp ênang yang ƀuôn hlăm alŭ wăl:

Nanao mơ̆ng thŭn 2017 truh kơ ară anei, bruă mkra êlan klei pui mtrang mngač hlăm grăp kdrêč êlan ƀuôn sang, anăn yơh jing mta kñăm pioh đru kơ phung ƀuôn sang mâo klei găl ênưih hlăm klei êrô hiu adiê mmăt mlam. Lehanăn anei mơh jing bruă yuôm bhăn mơ̆ng êpul êdam êra hrăm mbĭt hlăm bruă mkŏ mkra krĭng ƀuôn sang mrâo.

Hdră bruă pui kmlă mtrang ngač đru bi mlih ktuê êlan, duh kơ mnuih ƀuôn sang găn êrô jăk hĭn

            Mơ̆ng thŭn 2014, jih jang bruă mkra êlan pui mtrang mngač hlăm ƀuôn sang mâo phung êdam êra čar Daklak bi mguôp hŏng anôk bruă pui êliktrik mâo ngă leh ti lu anôk hlăm čar. Hlăm anăn mđing hĭn jing truh hlăm dŭm boh ƀuôn krĭng taih kbưi, krĭng dleh dlan, krĭng knông lăn. Hlăm dŭm thŭn giăm anei, mbĭt hŏng klei ba yua ăngpul mta mrâo, lehanăn pui bi êran hŏng pil yang hrue pioh lŏ mkŏ mkra, rơ̆ng čiăng bi mâo klei êđăp ênang lehanăn kriêt mkriêm. Bruă anei mâo đru mguôp leh kơ klei bi mlih boh jăk siam kơ êlan klông, pioh kơ klei êrô êbat mơ̆ng phung ƀuôn sang knư̆ hrue knư̆ jăk hĭn./.

Pô mblang: Y-Khem Niê