Nao ti dŭm krĭng ƀuôn sang mơ̆ng kdriêk Châu Thành, čar Sóc Trăng hlăm dŭm hruê mlan 6 anei, hmei ƀuh leh klei bi mlih mơ̆ng krĭng buôn sang êlâo adih dôk lu klei dleh dlan. Bi tuôm hŏng Danh Mô Ry ti alŭ Giồng Chùa A, să An Hiệp hlăk ñu dôk jik rơ̆k, dlăng kriê đang mnga 2 nah ping êlan, ñu lač, ktuê êlan anei dưi ngă mkra mơ̆ng lu thŭn hŏng anei leh, bi hgŭm hŏng lu alŭ wăl mkăn mơ̆ng kdriêk, msĕ si să An Hiệp, Thuận Hòa, wăl krah Châu Thành… msir mghaih klei čiăng găn êrô, dŭ mdiăng mnơ̆ng kơ mnuih ƀuôn sang. Ktrâo kngan phă đang mnga, ana bi msiam mrâo krih êa, kdrăp pui mtrang mngač lehanăn lač, ară anei mnuih ƀuôn sang thaoa hgŭm kngan bi mdoh êlan klông čiăng mjing wăl anôk doh siam, kreh dhar ti anôk pô dôk. Danh Mô Ry, brei thâo:

 Ară anei êlan klông dưi rŭ mkra prŏng siam leh, siam leh ƀiădah hŏng mnuih ƀuôn sang pô ăt brei thâo hgŭm kngan, đru dlăng kriê mnga 2 nah ping êlan, buč rơ̆k, krih êa čiăng kơ mnga đĭ jing jăk, mtah siam, mjing wăl anôk siam hĭn kơ krĭng ƀuôn sang pô”.

Čiăng dưi mâo boh tŭ dưn, sa hlăm dŭm klei gĭr mơ̆ng kdriêk Châu Thành jing anôk bruă mặt trân čar kwar dŭm gưl dôk mtrŭt mđĭ bruă hluê ngă tŭ dưn hdră mtrŭt mjhar “Jih jang mnuih ƀuôn sang hgŭm mguôp mkŏ mkra krĭng ƀuôn sang mrâo, kreh dhar ƀuôn prŏng” hŏng hdră êlan “Yua ai tiê mnuih ƀuôn sang mđing dlăng kriê klei hdĭp mnuih ƀuôn sang”. Hluê anăn, hlăm 5 thŭn êgao, anôk bruă mặt trận dŭm gưl hlăm kdriêk gĭt gai, bi hgŭm pŏk ngă, krơ̆ng kjăp, mđĭ lar lu gru hmô ngă bruă êdah êdi msĕ si “Êpul mnuih ƀuôn sang čŏng pô răng mgang wăl hdĭp mda, msir mghaih djah djâo”, “Êpul mnuih ƀuôn sang bi kdơ̆ng hŏng phung ngă soh, klei truh jŭ jhat hlăm yang ƀuôn, phung ngă soh matuĭ”, “ Ƀăng jang mnuih ƀuôn sang pô răng mgang”,  “Camera răng mgang klei êđăp ênang”, “Kliăng răng mgang klei êđăp ênang”, “Guh mngač êlan klông ƀuôn sang, mkŏ mkra ktuê êlan siam, hla čhiăm gru ala čar, pla ana bi msiam”…. Boh nik, bi hgŭm mtrŭt mjhar mnuih ƀuôn sang đru mguôp djăp ai dưi, klei mâo, myơr lăn, mkra anôk bruă nah gŭ, mđĭ kyar bruă duh mkra, bi hrŏ ƀun hpwĭt kjăp, mkŏ mkra klei hdĭp dhar kreh, răng mgang wăl hdĭp mda. Mơ̆ng anăn, mtrŭt mjhar mnuih ƀuôn sang myơr 15.000 m2 lăn, đru mguôp êbeh 1,5 êklai prăk lehanăn êbeh 19.000 hruê ai mă bruă mkŏ mkra krĭng ƀuôn sang mrâo. Tĭng truh knhal jih thŭn 2023, kluôm kdriêk mâo 25.300 gŏ sang djăp hnơ̆ng čuăn gŏ sang dhar kreh, truh êbeh 98% lehanăn 100% krĭng mnuih ƀuôn sang dôk djăp hnơ̆ng čuăn kr ĭng ƀuôn sang dhar kreh. Lâm Hiệp, ti să Phú Tân jing sa hlăm dŭm gŏ sang mâo lu klei đru mguôp hlăm hdră mkŏ mkra krĭng ƀuôn sang mrâo brei thâo:

Mkŏ mkra êlan klông snăn mnuih ƀuôn sang hơ̆k mơak êdi. Đảng, Knŭk kna mđing dlăng kơ mnuih ƀuôn sang msĕ snei jăk êdi yơh. Tĭng nah dih kâo ăt đru mguôp ai tiê mkra mnuôr êa, pô gĭr si srăng ngă čiăng kơ mnuih ƀuôn sang dưi găn êrô jăk găl. Tĭng anei đĭ êdeh dưi leh, tĭng adih snăn mơh, tĭng anei êdeh 3 boh pông dưi mơh, bi tĭng adih 2 boh pông đuič.

Lê Hoàng Nuôi, Khua anôk bruă mặt trận Việt Nam kdriêk Châu Thành brei thâo, kdriêk Châu Thành mâo êbeh 50% ênoh mnuih djuê ƀiă hdĭp mda, hlăm anăn lu jing mnuih djuê ana Khmer. Pŏk ngă dŭm hdră êlan mtrŭn mơ̆ng Đảng, hdră mtrŭn bruă djuê ana ƀrư̆ ƀrư̆ mŭt leh hlăm klei hdĭp, mnơ̆ng dhơ̆ng, ai tiê klei mĭn mơ̆ng mnuih ƀuôn sang dưi mkra mđĭ jăk, khă snăn, ăt dôk gŏ sang mđing uêñ klei kơ sang dôk, klei hdĭp adôk dleh dlan. Kyua anăn, hdră mtrŭt mjhar keh “Kyua mnuih ƀun” mâo kdriêk pŏk ngă kjăp. Mơ̆ng thŭn 2019 truh kơ ară anei, kdriêk mtrŭt mjhar lehanăn mâo čar mkăp giăm 29 êklai prăk, mbĭt hŏng dŭm să, wăl krah mtrŭt mjhar 1 êklai 670 êklăk prăk, kdriêk dưi rŭ mdơ̆ng 358 boh gŏ sang lehanăn lŏ mkra 12 boh sang Bi hgŭm mguôp. Êngao anăn, đru mdrao klei ruă, blei ênua mdraomgŭn kơ 390 čô mnuih, hŏng ênoh prăk êbeh 18 êklai prăk, mơ̆ng anăn đru mbĭt hŏng alŭ wăl bi hrŏ ênoh gŏ êsei ƀun adôk gŭ 2,45%. Lê Hoàng Nuôi lŏ brei thâo:

Mặt trận kdriêk mlih mrâo leh mta phŭn, hdră ngă bruă, hŏng mta kñăm jĕ giăm mnuih ƀuôn sang lehanăn mâo klei đua klam hŏng mnuih ƀuôn sang, răng mgang klei tŭ dưi djŏ hdră bhiăn mơ̆ng mnuih ƀuôn sang. Mbĭt anăn, anôk bruă mặt trận ăt pŏk ngă mđrăm mbĭt dŭm hdră msir hluê ngă hdră hdơr knga tla ai, msir klei ư̆ êpa bi hrŏ klei ƀun knap, nao hgŭmh lăm hdră mkŏ mkra bruă sang čư̆ êa, đru mkŏ mkra Đảng doh mngač. Kjăp ktang. Anei ăt jing sa hlăm dŭm bruă klam phŭn mơ̆ng bruă mặt trận mtrŭt mjhar mguôp hŏng hdră mkŏ mkra krĭng ƀuôn sang mrâo lehanăn kreh dhar ƀuôn prŏng hlăm wưng êgao.

Hdră mtrŭt mjhar anei dưi bi mguôp lu bruă klă sĭt, krŭ wĭt ai tiê hgŭm mguôp, mâo lu mnuih ƀuôn sang sa ai, đru mguôp hŏng Đảng, Knŭk kna, bruă sang čư̆ êa alŭ wăl hgao klei dleh dlan, lông dlăng, rơ̆ng hdră đru kơ yang ƀuôn, krŭ wĭt djăp ai dưi, klei mâo hlăm mnuih ƀuôn sang đru mguôp hluê ngă tŭ dưn bruă klam kđi čar, duh mkra, dhar kreh lehanăn ala ƀuôn./.