VOV4.Êđê - Krông Pač jing kdriêk mâo ênoh mnuih mrâo wĭt mơ̆ng ƀuôn prŏng Hồ Chí Minh leh anăn dŭm čar krĭng dhŭng lu hĭn ti čar Dak Lak hŏng êbeh 2.700 čô. Čiăng mnuih ƀuôn sang mrâo wĭt mâo anôk bi ktlah êđăp ênang, rơ̆ng mâo boh tŭ dưn hlăm bruă gang mkhư̆ klei ruă tưp Covid-19, kdriêk Krông Pač mâo leh lu bruă ngă djŏ guôp, mlih mrâo, đru kơ mnuih ƀuôn sang leh anăn gŏ sang mâo klei hơĭt. Hŏng klei ngă bruă djŏ guôp hŏng krĭng ƀuôn sang, dưi dưn yua hŏng alŭ wăl mkăn ti krĭng Lăn Dap Kngư.

Wĭt mơ̆ng čar Bình Dương mơh Đồng Thanh Hiếu lehanăn sa čô mah jiăng mbĭt hŏng ñu dôk ngă klei bi ktlah hlăm pưk sa boh hma jing war kphê ti alŭ Cao Bằng, să Êa Knuêč, kdriêk Krông Pač. Ñu brei thâo, êbeh kơ 3 mlan amâo mâo bruă knuă mă dôk hlăm krah anôk mâo klei ruă tưp, ênoh prăk mâo mkuôm pioh ăt dơ̆ng jih. Leh Bình Dương mâo klei dưi pŏk ƀăng, ñu đĭ êdeh wĭt kơ ƀuôn sang mtam. Kyua gŏ sang amâo mâo ôh anôk pioh ngă klei bi ktlah hjăn ñu, snăn ñu mâo bruă sang čư̆ êa dăp brei ñu dôk mbĭt hŏng sa čô mkăn hlăm sa boh pưk ti war kphê:

“Leh wĭt truh kơ ƀuôn sang, mâo amĭ ama lehanăn alŭ dăp mkra brei sa boh pưk mâo dua čô ayŏng adei wĭt mbĭt dôk bi ktlah tinei. Grăp hrue amĭ ama ba mnơ̆ng ƀơ̆ng, amĭ ama dưm ti kbưi, leh amĭ ama blŭt đuĕ snăn hmei nao mă. Čoh čuăn đuĕ wĭt snăn hmei ƀuăn ngă klei bi ktlah hŏng klei sĭt êmĭt”.

Triệu Văn Đường, jing k’iăng kiă kriê alŭ Cao Bằng, să Êa Knuêč brei thâo, hlăm dŭm hrue êgao, alŭ mâo drông leh lu mnuih wĭt mơ̆ng dŭm čar nah Dhŭng. Čiăng dăp anôk bi ktlah bi jăk, rơ̆ng mâo klei êđăp ênang kơ bruă gang mkhư̆ klei ruă tưp djŏ hŏng mta mtrŭn, Êpul kiă kriê alŭ nao ksiêm dlăng hlăm grăp gŏ êsei mâo pưk hlăm hma kphê, mâo sang lui huôn, lehanăn bi trông hŏng dŭm gŏ êsei pioh mañ yua ngă anôk bi ktlah kơ mnuih mrâo wĭt. Bruă ksiêm dlăng mnuih ngă klei bi ktlah mâo Êpul kiă kriê alŭ lehanăn Êpul Covid   yang ƀuôn hlăm alŭ hlue ngă hŏng klei sĭt êmĭt:

“Leh wĭt bi ktlah snăn mtă mtăn kơ phung ƀuôn sang hlue ngă bi kjăp 5 mta klei mtă čiăng bi mâo klei êđăp ênang kơ phung ƀuôn sang, lehanăn mnuih riêng gah hŏng pô. Grăp hrue ăt bi ksiêm dlăng ngă kjăp mơ̆ klei bi ktlah amâodah hơăi, kyuadah lu mnuih dôk kƀah klei thâo săng, snăn pô mâo klei čiăng mta nanao”.

Bi ti să Êa Yiêng, să krĭng 3 hlăm kdriêk krông Pač, kyua ênoh sang pưk mdơ̆ng hlăm hma knŏng ƀiă, bruă sang čư̆ êa ba yua mbĭt hŏng sang bi kƀĭn ƀuôn mơ̆ng găp boh ƀuôn, lehanăn dŭm boh sang mkăn hlăm ƀuôn pioh ngă anôk bi ktlah, lehanăn yap anei jing sang đru bi rông ba. Hlăm grăp anôk dưi păng hŏng mnal nilon tui hlue hŏng ênoh mnuih ngă klei bi ktlah. Êpul kiă kriê ƀuôn alŭ, bi mguôp hŏng Êpul Covid yang ƀuôn lehanăn êdam êra ba anăp nao iêo jak kei bi mkrum mnơ̆ng ƀơ̆ng huă, dăp mbha mnuih nao bi tŭk knă mnơ̆ng ƀơ̆ng, mbha kơ mnuih dôk ngă klei bi ktlah. Êpul êdam êra alŭ wăl mâo mkŏ mjing leh hdră bi mkrum mguôp mnơ̆ng ƀơ̆ng huă, čiăng kơ jih jang mnuih ngă klei bi ktlah hơĭt ai tiê dôk bi ktlah. Trần Đức Hậu, k'iăng khua Êpul hgŭm phung êdam êra kdriêk Krông Pač lač:

"Êpul hgŭm phung êdam êra kdriêk mkŏ mjing leh bruă bi đru êsei huă kơ Êpul kiă kriê lehanăn mkăp êsei huă tlam, snăn hmei lŏ đru mnơ̆ng dhơ̆ng kơ êpul kiă kriê alŭ ƀuôn tŭk knă, lehanăn mbha kơ êpul bi ktlah ti alŭ wăl”.

Ti kdriêk krông Pač, čar Daklak, hlăm ênoh êbeh 2 êbâo 700 čô mnuih mrâo wĭt mơ̆ng ƀuôn prŏng Hồ Chí Minh, lehanăn dŭm čar nah Dhŭng snăn mâo 11 čô mnuih hlăk dôk bi ktlah sa anôk ti kdriêk, 54 čô ngă klei bi ktlah sa anôk ti dŭm să, lehanăn 2.670 čô mnuih bi ktlah ti sang. Čiăng dưi rơ̆ng mâo klei bi ktlah hŏng klei kjăp, knơ̆ng bruă sang čư̆ êa kdriêk jao leh bruă klam kơ grăp êpul êya djŏ tuôm. Hlue anăn, dhar bruă mdrao mgŭn ngă leh bruă test pral kơ mnuih ƀuôn sang 3 hrue sa blư̆, grăp hrue iêo đĭng blŭ brei mnuih ngă klei bi ktlah čŏng mkă hnơ̆ng h’uh asei mlei, ksiêm dlăng klei suaih pral pô, dhar bruă kahan ksiêm đru bi răng mgang klei êđăp ênang hlăm anôk bi ktlah, dŭm êpul êya bruă bi mtrŭt mjhar mkrum mguôp ngăn prăk, mnơ̆ng mnuă yua kơ phung ƀuôn sang, bi đru mđrăm mbĭt hŏng knŭk kna. Aduôn Nguyễn Thị Kim Oanh, k’iăng khua knơ̆ng bruă sang čư̆ êa kdriêk krông Pač lač:

“Kdriêk mâo leh lu hră mtrŭn pioh gĭt gai hlue ngă dŭm bruă mbĭt hŏng êpul covid yang ƀuôn ti dŭm wăl krah ksiêm dlăng jih jang gŏ êsei mâo mnuih bi ktlah, lehanăn kăp hưn nanao kơ Êpul kiă kriê bruă mdrơ̆ng hŏng klei ruă tưp hlăm să sa hrue dua blư̆. Kdriêk ăt mkŏ mjing êpul đru ba kơ klei hdĭp mda, êpul anei mâo bruă klam kăp mtrŭt mjhar phung thâo bi đru, čiăng iêo mkrum mnơ̆ng dhơ̆ng kơ mnuih dôk hlăm anôk bi ktlah êjai hlăm wưng dôk găn klei dleh dlan kyua klei ruă tưp covid 19”.

Kyua mâo hdră mă bruă djŏ guôp, bruă ngă klei bi ktlah mnuih mrâo wĭt mơ̆ng ƀuôn prŏng Hồ Chí Minh, lehanăn dŭm čar nah Dhŭng ti kdriêk krông Pač hlăk mâo lu klei sa ai mơ̆ng phung ƀuôn sang. Khădah ƀuh yơh jing lu klei dleh dlan, lehanăn klei huĭ hyưt kơ anăp, ƀiădah hŏng klei mprăp êmiêt kjăp mơ̆ng dŭm gưl, dhar bruă, lehanăn klei sa ai mơ̆ng jih jang phung ƀuôn sang, bi đăo knang Krông Pač srăng dưi gang mkhư̆ tŭ jing klei ruă tưp covid 19 hlăm kdriêk./.