VOV4.Êđê - Tlam 28-6, Êpul bi ala bruă kƀĭn ala čar Dak Lak gưl XIV mkŏ mjing klei bi kƀĭn Ksiêm wĭt bruă ngă wưng thŭn 2016 - 2021. Êpul bi ala bruă kƀĭn ala čar Dak Lak gưl XIV mâo 9 čô. Hlăm anăn mâo 4 čô bi ala mơ̆ng gưl dlông mgơ̆ng, 5 čô mơ̆ng alŭ wăl mgơ̆ng. Mơ̆ng akŏ wưng păn bruă truh ară anei, Êpul bi ala bruă kƀĭn ala gĭt gai leh anăn bi hgŭm hŏng dŭm anôk bruă djŏ tuôm mkŏ mjing 20 klei bi kƀĭn mă klei blŭ mguôp hlăm 56 hdră bhiăn.

Bruă bi tuôm hŏng phung bi ala kơ mnuih ƀuôn sang hlăm wưng păn bruă mâo Êpul ksiêm dlăng mlih mrâo hluê hdră boh sĭt. Êpul mkŏ mjing leh 140 klei bi tuôm hŏng phung bi ala kơ mnuih ƀuôn sang, hŏng êbeh 23 êbâo gưl phung bi ala nao leh anăn 2.950 gưl klei blŭ mguôp. Mbĭt hŏng anăn, Êpul bi ala bruă kƀĭn ala čar Dak Lak mđing dlăng kơ bruă hdĭp mda ala ƀuôn, boh nik hŏng gŏ sang knŭk kna dlăng ba, gŏ sang mâo ai hŏng cách mạng, gŏ sang mnuih djuê ƀiă mâo klei hdĭp dleh dlan, krĭng taih kbưi… Hlăm 5 thŭn êgao, Êpul bi ala bruă kƀĭn ala čar Dak Lak gĭr êmuh kña, mkŏ mjing dŭm mta bruă hlăm klei hdĭp mnuih ƀuôn sang ba yua ti čar hŏng ênoh êbeh 6 êklai prăk.

H Zawut pô mblang