VOV4.Êđê - Hruê 25/5, knơ̆ng bruă mdrao mgŭn čar Lâm Đồng brei thâo, mâo leh 241 čô mnuih djŏ tuôm hŏng mnuih ruă 3141 amâo mâo ƀuh kman gưl tal 3 hŏng kman Covid-19. Hlăm ênoh mnuih anei, mâo 121 čô mnuih dưi kƀiă đuê̆ mơ̆ng anôk bi ktlah wĭt kơ sang pô lehanăn lŏ dơ̆ng bi ktlah ti sang 7 hruê djŏ hŏng klei bhiăn. Ară anei čar Lâm Đồng lŏ dôk bi ktlah 355 čô mnuih, Hlăm anăn mâo 152 čô mnuih djŏ tuôm hŏng mnuih ruă 3141, dŭm čô adôk jing dŭm čô wĭt mơ̆ng dŭm alŭ wăl mâo klei ruă tưp.

Hlăm ênoh anei, mâo 21 čô mnuih dưi bi ktlah hlăm dŭm anôk mdrao mgŭn, 259 čô mnuih dôk bi ktlah hlăm anôk bi ktlah mbĭt lehanăn 75 čô dôk ti ktlah ti sang pô. Tui hluê knơ̆ng bruă mdrao mgŭn čar Lâm Đồng, khădah ka mâo ôh mnuih mâo klei ruă tưp Covid-19 hlăm čar, ƀiădah ti anăp klei dưi dleh ksiêm dlăng klei ruă tưp, dŭm hdră êlan gang mkhư̆ klei ruă tưp Covid-19 dưi dôk ngă kjăp mơ̆ng dŭm anôk bruă djŏ tuôm čar Lâm Đồng. Čar Lâm Đồng mâo leh lu hdră êlan čiăng bi mdrơ̆ng hŏng klei ruă tưp tơdah mâo mnuih mâo klei ruă tưp Covid-19.