VOV4.Êđê- Hruê 26-7, Lâm Đồng lŏ dơ̆ng čih yap mâo thiăm 5 čô mnuih ruă Covid-19, mđĭ ênoh mnuih ruă hlăm kluôm čar truh 40 čô mnuih. Hlăm ênoh anei, mâo 6 čô mnuih dưi mdrao hlao klei ruă. Hlăm ênoh 5 čô ruă Covid-19 mrâo, mâo 2 čô jing pô mgăt êdeh dŭ mdiăng wĭt mơ̆ng ƀuôn prŏng Hồ Chí Minh, 2 čô jing F1 - mô̆ leh anăn ung mơ̆ng sa čô hlăm 2 čô mgăt êdeh anei leh anăn 1 čô jing ƀuh leh ksiêm mkă hlăm êpul êya. Djŏ tuôm kơ mnuih ruă mrâo, êpul bruă djŏ tuôm čar Lâm Đồng ngă leh klei hiu duah mâo 66 čô F1, 189 čô F2, mbĭt anăn lŏ dơ̆ng pŏk ngă bruă čuăn krĭng, ksiêm dlăng klei ruă tưp leh anăn tui duah phung djŏ tuôm ti 15 alŭ wăl mâo klei huĭ tưp lar ti 2 kdriêk Đức Trọng leh anăn Đơn Dương.

Alŭ Finôm, să Hiệp Thành, kdriêk Đức Trọng, čar Lâm Đồng dôk bi ktlah yang ƀuôn hluê si  asăp mtrŭn mrô 16

Êngao kơ hiu duah phung djŏ tuôm kơ 5 čô mnuih ruă mrâo hlăm čar, Lâm Đồng ăt dôk mjêc hiu duah phung bi tuôm giăm hŏng mnuih ruă mrô 95575 ti Ninh Thuận. Êlâo anăn, mnuih ruă anei dôk leh anăn mă bruă ti Đà Lạt, mâo klei bi tuôm hŏng lu mnuih. Yap truh 12 mmông yang hruê 26-7, Lâm Đồng čih yap mâo 40 čô mnuih ruă Covid-19. Kluôm čar dôk hluê ngă bi ktlah hjăn 5.643 čô mnuih. Hdră gang mkhư̆ klei ruă tưp Covid-19 mâo êpul bruă djŏ tuôm dôk gĭr pŏk ngă.

Pô mblang: H’Zawut Ƀuôn Yă