VOV4.Êđê- Hruê 8-6, Knơ̆ng bruă sang čư̆ êa čar Lâm Đồng  mtrŭn leh hră mơar mjêč dưi brei lŏ dŭ mdiăng tuê  ƀiădah brei ngă bi jăk dŭm hdră gang mkhư̆ klei ruă Covid-19. Čiăng rơ̆ng hluê ngă tŭ dưn” hdră kñăm mdua” ngă hdră gang mkhư̆ klei ruă Covid-19 êjai leh anăn mđĭ kyar bruă duh mkra êjai, Knơ̆ng bruă sang čư̆ êa čar Lâm Đồng mtă kơ dŭm knơ̆ng, dhar bruă, êpul bruă leh anăn Knơ̆ng bruă sang čư̆ êa dŭm kdriêk, ƀuôn prŏng hlăm čar, yap mơ̆ng 14h00 tlam 8-6, dưi brei dŭ mdiăng tuê ƀiădah brei rơ̆ng hluê ngă bi jăk hdră gang mkhư̆ klei ruă Covid-19.

Knơ̆ng bruă sang čư̆ êa čar Lâm Đồng ăt gĭt gai Knơ̆ng bruă êlan klông dŭ mdiăng čar bi trông , mă bruă hŏng Knơ̆ng bruă êlan klông dŭ mdiăng dŭm čar, ƀuôn prŏng djŏ tuôm čiăng bi tŭ ư hdră msir kriê dlăng bruă dŭ mdiăng, rơ̆ng ktuê dlăng phŭn mtưp klei ruă ƀiădah amâo kăm čhĭ mnia, amâo ngă gun kpăk amâodah hmaĭ amâo jăk kơ bruă mkra mjing mnia blei, bi ktlah mdrao mgŭn hŏng phung hriê mơ̆ng krĭng mâo klei ruă tưp, đŭ bi kmhal bi djŏ phung amâo hưn amâodah hưn klei suaih pral amâo kpă.

Pô mblang: H’Zawut Ƀuôn Yă