VOV4.Êđê - Anôk bruă djuê ana čar Lâm Đồng brei thâo, leh sa wưng hrŏng ruah, ksiêm dlăng hluê hŏng klei hâo hưn mơ̆ng mnuih ƀuôn sang djuê ƀiă ti dŭm alŭ, ƀuôn... truh ară anei, tŭ ư leh bruă bi mklă 479 čô mnuih mâo k’hưm. Ênoh anăn anei mâo leh Anôk bruă sang čư̆ êa čar tŭ ư bi mklă. Mnuih dôk hlăm ênoh anei jing mnuih mâo k’hưm, êdah kdlưn, mâo lu klei đru mguôp lehanăn mâo klei hmăi truh kơ găp djuê ênuê êpul, ƀuôn sang lehanăn gưl să, kdriêk, ƀuôn prŏng... Diñu jing êpul ba anăp hlăm hdră mđĭ kyar bruă duh mkra, mtrŭt mjhar găp djuê lehanăn êpul êya hluê ngă jăk dŭm klei bhiăn, klei kuôl kă, lăm lui klei bhiăn amâo jăk mơ̆ng hđăp đưm, hluê ngă knhuah hdĭp mrâo. Phung mâo k’hưm, êdah kdlưn hlăm kluôm čar hluê ngă leh hdră mtrŭt mjhar mnuih ƀuôn sang djuê ƀiă gĭr mă bruă knuă, hluê ngă jăk dŭm hdră êlan mtrŭn, hdră bhiăn mơ̆ng Đảng, Knŭk kna, đru hluê ngă tŭ jing mta kñăm mđĭ kyar bruă duh mkra – ala ƀuôn, krơ̆ng kjăp klei êđăp ênang bruă kđi čar, klei êđăp ênang yang ƀuôn ti alŭ wăl./.

H Nêč pô mblang