VOV4.Êđê- Yap truh hruê mbruê, čar Lâm Đồng mâo leh 259 čô mnuih mâo klei ruă tưp Covid-19. Hlăm anăn mâo 187 čô mnuih ruă dưi mdrao hlao lehanăn wĭt kơ sang. Lạc Dương jing sa kdriêk ka mâo ôh mnuih ruă ti čar Lâm Đồng. Năng mđĭng hĭn, hlăm dŭm čô mâo klei ruă tưp Covid-19 ti čar, mâo êbeh 70% mnuih mâo klei ruă tưp Covid-19 dưi mdrao hlao lehanăn wĭt kơ pưk sang. 72 čô mkăn ăt dôk ksiêm dlăng lehanăn mdrao mgŭn hlăm dŭm anôk bruă mdrao mgŭn ti čar.

Khădah klei ruă tưp hlăm čar dơ̆ng dưi ksiêm dlăng leh ƀiădah ăt dôk dleh ktuê dlăng, êpul khua bruă Đảng čar Lâm Đồng mâo leh klei hâo hưn mtă kơ bruă sang čư̆ êa čar, êpul gĭt gai lehanăn anôk bruă gĭt gai bruă gang mkhư̆ klei ruă tưp Covid-19 hlăm čar lŏ kñăm gĭt gai kơ dŭm alŭ wăl, dhar bruă, anôk bruă amâo ngă ngơi mang, luič klei răng, boh nĭk mđĭ bruă ksiêm dlăng phung mgăt êdeh, pô pŭ suai mnơ̆ng hlăm êdeh djŏ hŏng klei bhiăn.

Pô mblang: Y-Ƀel Êban