VOV4.Êđê- Aguah hruê 15-6, Anôk bruă ktuê dlăng klei ruă tưp Lâm Đồng brei thâo: Ară anei, čar Lâm Đồng dôk hluê ngă bi jăk hdră kčah kơ klei bi ktlah hjăn leh anăn ksiêm mkă kman SARS-CoV-2. Hŏng phung bi ktlah hjăn sa anôk, wưng bi ktlah hjăn jing 21 hruê yap mơ̆ng hruê mphŭn bi ktlah hjăn leh anăn ksiêm mkă amâo ƀuh kman SARS-CoV-2 ƀiă êdi 3 blư̆. Hŏng hdră bi ktlah hjăn ti sang, anôk dôk, wưng bi ktlah hjăn 14 hruê yap mơ̆ng hruê mphŭn bi ktlah hjăn, knhal tuič ksiêm mkă amâo ƀuh kman SARS-CoV-2 srăng nao ktrâo lač klei ktuê dlăng klei suaih pral ti sang 7 hruê. Phung bi ktlah ti sang, anôk dôk hluê ngă hdră mtrŭn mơ̆ng Knơ̆ng bruă sang čư̆ êa să, ƀuôn hgŭm, wăl krah anôk dộ; mbĭt anăn, tŭ klei đua klam mơ̆ng dŭm êpul gang mkhư̆ Covid-19 hlăm êpul êya. Phung knuă druh mdrao mgŭn ti alŭ wăl ktuê dlăng klei suaih pral phung bi ktlah hjăn grăp hruê, mkă hnơ̆ng hlơr asei mlei 2 blư̆/ hruê, rơ̆ng hdra wgang mkhư̆ klei ruă tưp hluê si hdră kčah mơ̆ng Phŭn bruă mdrao mgŭn.

Pô mblang: H’Zawut Ƀuôn Yă