VOV4.Êđê - Aguah mbrue (23/7), čar Lâm Đồng lŏ mâo 2 čô mnuih djŏ kman mrâo jing mgăt êdeh, lehanăn pô đru mgăt êdeh djŏ tuôm hŏng Ƀuôn prŏng Hồ Chí Minh. Dua čô mrâo djŏ jing mnuih ruă mrô 78.434, 78.435, jing mnuih mgăt êdeh, lehanăn đru mgăt êdeh êlan kbưi, tuôm êrô hiu hŏng ƀuôn prŏng Hồ Chí Minh.

Leh thâo kơ dua čô mgăt êdeh, pô đru mgăt êdeh mâo kman, knơ̆ng bruă mdrao mgŭn čar Lâm Đồng mâo leh asăp mtrŭn mjêč tui duah mnuih ti dŭm anôk diñu găn hlăm kdriêk Đức Trọng, lehanăn ƀuôn prŏng Bảo Lộc. Lehanăn jih jang êpul bruă djŏ tuôm hlăm čar ăt mjêč tui duah phung jing F1; F2 bi tuôm giăm hŏng mnuih ruă. Ară mâo bi klă leh 14 čô jing F1, lehanăn 50 čô jing F2, hlăm anăn jing dŭm čô mnuih čhĭ djam ti kdriêk Đức Trọng. Snăn, truh yang hrue dơ̆ng mbrue (23/7), Lâm Đồng mâo leh jih jang 28 čô mâo klei ruă covid 19, hlăm anăn mâo 10 čô jing phung mgăt êdeh lehanăn pô đru mgăt êdeh./.

Y Khem pô mblang