VOV4.Êđê- Aguah mbruê 6/8, čar Lâm Đồng bi klă mâo 4 čô mnuih ruă Covid-19 dưi hmao ƀuh hlăm anôk mâo klei ruă jing knơ̆ng bruă tă kčoh DWS - knơ̆ng bruă êwei mrai ti să Trạm Hành, ƀuôn prŏng Đà Lạt. Êlâo kơ anăn, aguah hruê 5/8, anôk bruă mdrao mgŭn ƀuôn prŏng Đà Lạt nao truh kơ knơ̆ng bruă anei lehanăn mă mta ksiêm mkă kman kơ mnuih mă bruă lehanăn mâo 4 čô đĭng mâo klei ruă tưp. Leh kơ anăn, anôk bruă ksiêm dlăng klei ruă tưp čar Lâm Đồng mă mta ksiêm mkă PCR ăt ƀuh mâo klei ruă tưp Covid-19.

Knơ̆ng bruă anei mâo êbeh 200 čô mnuih mă bruă, mmông dôk mă mta ksiêm mkă kman mâo êbeh 100 čô mnuih dôk mă bruă. leh hmao ƀuh dŭm čô mâo klei ruă tưp Covid-19 êpul êya djŏ tuôm ngă leh bruă hrŏng ruah lehanăn ba giăm 90 čô jing F1 nao bi ktlah mbĭt, mbĭt anăn lŏ ngă bruă tui duah dŭm čô djŏ tuôm mkăn. Bruă tui duah, čuăl krĭng dôk dưi ngă mơ̆ng dŭm anôk bruă djŏ tuôm čar Lâm Đồng.

Pô mblang: Y-Ƀel Êban