VOV4.Êđê -  Ti anăp klei mâo dleh dưi ksiêm dlăng mơ̆ng klei ruă Covid 19, čar Lâm Đồng lŏ dơ̆ng hyuă kjăp hdră ngă bruă mơ̆ng 15 anôk ksiêm dlăng klei ruă ti alŭ wăl. Mơ̆ng anăn, hmao ƀuh lu mnuih đing mâo klei ruă Covid 19 lehanăn hluê ngă hdră bi ktlah djŏ si klei kčah mtrŭn. Êbeh mkrah mlan êgao, anôk ksiêm dlăng, gang mkhư̆ klei ruă Covid 19 ti kdriêk Dă Huai, čar Lâm Đồng, hlăm êlan dơ̆ng prŏng mrô 20 mkŏ Đà Lạt hŏng ƀuôn prŏng Hồ Chí Minh ngă bruă jih hruê mlam.

Kyua anei jing êlan dơ̆ng prŏng mkŏ dŭm čar kwar Dhŭng hŏng Lâm Đồng kyua anăn ênoh êdeh êdâo lehanăn mnuih găn êrô lu, kyua anăn êpuk djŏ tuôm ba nao leh êbeh 30 čô mnuih, kah mbha 4 êpul dôk gak răng kñăm rơ̆ng kjăp hdră ksiêm dlăng klei ruă tưp. Kah knar grăp hruê, Lâm Đồng mâo êbeh 6.500 kdrăp êdeh êdâo djăp mta, hlăm brô 14 êbâo čô mnuih găn êrô ti dŭm anôk ksiêm dlăng, gang mkhư̆ klei ruă tưp Covid 19. Jih jang rơ̆ng hluê ngă s’aĭ hdră ksiêm dlăng hnơ̆ng hlơr asei mlei, hưn mthâo klei suaih pral. Mơ̆ng anăn, pral hmao ƀuh 48 čô jing F1 lehanăn hluê ngă hdră bi ktlah djŏ si klei kčah mtrŭn./.

H Nêč pô mblang